މިއުނިކް (ޖުލައި 17) - އިންގްލެންޑްގެ ކެޕްޓަން ހެރީ ކޭން ބަޔާން މިއުނިކްއާ ގުޅޭނެ ކަމުގެ ޔަގީންކަން އެބައޮތް ކަމަށް ބަޔާންގެ ރައީސް އުއީ ހޯންސް ބުނެފި އެވެ.
ރިޕޯޓްތަކުން ބުނާގޮތުގައި ޓޮޓެންހަމް ހޮޓްސްޕާގެ ވެސް ކެޕްޓަން ކަމަށްވާ ކޭން ،29، ވަނީ ބަޔާންގެ ހުށަހެޅުމަށް އެއްބަސްވެފަ އެވެ. އެކަމަކު، އޭނާގެ ޓްރާންސްފާއާ ގުޅޭގޮތުން ބަޔާން އާއި ޓޮޓެންހަމްއާ ދެމެދު އަދި އެއްބަސްވުމަކަށް ނާދެވެ އެވެ.
ބަޔާނުން ކޭންގެ ޓްރާންސްފާ އަށް ހުށަހެޅި 70 މިލިއަން ޔޫރޯ އަށް ޓޮޓެންހަމް އިން އެއްބަހެއްނުވި އެވެ. ރިޕޯޓްތަކުން ބުނާގޮތުގައި ކޭންގެ ޓްރާންސްފާ ފީ އަށް ޓޮޓެންހަމް އިން މަދުވެގެން 100 މިލިއަން ޔޫރޯ ބޭނުންވެ އެވެ.
މީޑިއާއާ ވާހަކަދައްކަމުން ހޯންސް ބުނީ ބަޔާންއާ ގުޅެން ކޭން ބޭނުންވާ ކަމަށާއި ކޭން އެގޮތުގައި ދެމިހުރެއްޖެނަމަ، ޓޮޓެންހަމް އަށް ގޮސް ދޫކުރަން ޖެހޭނެ ކަމަށެވެ.
"މިހާތަނަށް ކޭންއާ ދެއްކި ވާހަކަތަކުން އެނގޭކަމަކީ އޭނާ މި ކްލަބަށް އަންނަން ބޭނުންވާކަން. ކޭން އެގޮތުގައި ހިފަހައްޓައިފިނަމަ، ވަކި ހިސާބަކުން ޓޮޓެންހަމް އިން ޖެހޭނީ ދޫދޭން،" ހޯންސް ބުންޏެވެ.
ހޯންސް ބުނީ ކުރިއަށް އޮތް ސީޒަންގައި ޔޫރަޕްގެ މުބާރާތެއްގައި ޓޮޓެންހަމް އަށް ނުކުޅެވުމަކީ ބަޔާން އަށް އަންނަން އޭނާ ބޭނުންވާ އެންމެ މުހިންމު ސަބަބު ކަމަށެވެ.
"ދުނިޔޭގެ އެންމެ މޮޅު އެއް ޓީމަށް ކުޅުމުގެ ފުރުސަތު ކޭން އަށް ލިބިފައި މި އޮތީ،" ހޯންސް ބުންޏެވެ.
ޓޮޓެންހަމްއާއެކު ކޭން ހަދާފއިވާ ކޮންޓުރެކްޓް ހަމަވާނީ އަންނަ އަހަރެވެ.
