ރިޔާސީ އިންތިހާބަށް ދަ ޑިމޮކްރެޓްސްއިން ތައްޔާރު ކުރާ މެނިފެސްޓޯގެ މަސައްކަތް ބެލެހެއްޓުމުގެ އިސްކޮށް އުޅޭ މެމްބަރުންގެ ގޮތުގައި އެސްޓީއޯގެ ކުރީގެ މެނޭޖިން ޑިރެކްޓަރު ހުސައިން އަމްރާއި ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އިލްޔާސް ލަބީބް ހަމަޖައްސައިފި އެވެ.
ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އިސްވެ އުފައްދަވާ ޕާޓީ ރަޖިސްޓްރީވުމަށް ފަހު މިހާރު ހިނގަނީ އިންތިގާލީ މަރުހަލާ އެވެ. އިންތިގާލީ މަރުހަލާގައި އެ ޕާޓީ ހިންގާނެ ކޮމިޓީތަކެއް ހެދުމަށް ޕާޓީގެ އިންތިގާލީ ކައުންސިލުން ވަނީ ފާސްކޮށްފަ އެވެ.
އެ ކޮމިޓީތަކުގެ ތެރެއިން އެއް ކޮމިޓީއަކީ ރިޔާސީ އިންތިހާބަށް ޕާޓީން ހުށަހަޅާ މެނިފެސްޓޯ ތައްޔާރު ކުރުމުގެ މަސައްކަތް އިސްވެ ބެލެހެއްޓުން ހަވާލުކުރާން އެކުލަވާލާފައިވާ ކޮމިޓީގަ އެވެ. އޭގައި ދެ މެމްބަރުން ހިމަނަން ނިންމައި، އެއީ އަމްރާއި އިލްޔާސް ކަމަށް ވަނީ ކަނޑައަޅައިފަ އެވެ.
އޭގެ އިތުރުން، ޑިމޮކްރެޓްސްގެ ރިޔާސީ ޕްރައިމަރީގެ ކަންކަން ބަލަހައްޓަން ކޮމިޓީއަކާއި މާލީ މުއާމަލާތްތައް ބަލަހައްޓަން ފަސް މެމްބަރުންގެ ކޮމިޓީއެއް އެކުލަވާލާފައިވެ އެވެ.
ޕްރައިމަރީގެ އިންތިހާބީ ކޮމިޓީ
- މުހައްމަދު އިބްރާހިމް މަނިކު، ހުޅުމާލެ ލޮޓް 11329
- ހުސައިން ރަޝީދު، މ. ހުދުހުދާމަލަ، ކ. މާލެ
- އައިޝަތު ޝާޒްލީ، މ. ސެވޯއީ، ކ. މާލެ
މާލީ މުއާމަލާތްތަކުގެ ކޮމިޓީ
- އަހުމަދު ޝާހިދު، މއ. ޗަނބޭލީމާގެ، ކ. މާލެ
- އަހުމަދު މައުސޫމް، ގ. ޕެލެސެންޓް ވޭވްސް، ކ. މާލެ
- އިސްމާއިލް ޝަފީގު، މއ. ސަމިޓް، ކ. މާލެ
- މަރިޔަމް ޖެނިފާ މުސްތަފާ، ގ. ބޮޑުފެންވަޅުގެ، ކ. މާލެ
- މުހައްމަދު ޝާޒު، ގ. މެޑޯ، ކ. މާލެ
ޑިމޮކްރެޓްސްގެ އިންތިގާލީ ކައުންސިލަށް ހިމަނަން ޕާޓީގެ މުއައްސިސް އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ކަނޑައަޅާ 12 މެމްބަރުންނާއި ކައުންސިލަށް ހިމަނަން ކައުންސިލުން ފާސްކޮށްފައިވާ އަށް ފަންނީ މީހުން ވެސް ވަނީ ކަނޑައަޅައި ނިންމައިފަ އެވެ.
