ރަޝިއާގެ ސިފައިންގެ ޔުނިޓެއްގެ ގޮތުގައި މަސައްކަތް ކުރަން ދިން ދައުވަތު ވާގްނާ ގްރޫޕުން ގަބޫލުނުކުރި ކަމަށް ރަޝިއާގެ ރައީސް ލެޑިމިއަ ޕުޓިން ވިދާޅުވެއްޖެ އެވެ.
ކޮމަސާންޓް ނޫހަށް ދެއްވި އިންޓަވިއުއެއްގައި ޕުޓިން ވިދާޅުވީ ވާގްނާގެ ލީޑަރެއްގެ ދަށުން ރަޝިއާ ސިފައިންނާ ގުޅޭ ވާގްނާގެ އާއްމު މެމްބަރުން ޝައުގުވެރިކަން ފާޅުކުރި ކަމަށެވެ.
އެހެން ނަމަވެސް ކުލީ ސިފައިންގެ ގްރޫޕުގެ ވެރިޔާ ޔެވްގެނީ ޕްރިގޯޝިން އެ ވިސްނުމާ ދެކޮޅު ކަމަށާއި މެމްބަރުން އެގޮތް ބޭނުން ނުވާ ކަމަށް ބުނި ކަމަށް ޕުޓިން ވިދާޅުވި އެވެ.
ވާގްނާއިން ރަޝިއާގެ ސިފައިންނާ ގުޅުމަށް ދައުވަތު ދިނީ މިދިޔަ މަހު އެ ގްރޫޕުން ރަޝިއާ ސިފައިންގެ ލީޑާޝިޕާ ދެކޮޅަށް ބަގާވާތެއް ހިންގަން މަސައްކަތް ކުރި ފަހުންނެވެ.
އޭރު ރަޝިއާއިން އެންގީ ވާގްނާގެ ސިފައިންނަށް ރަޝިއާގެ ރަސްމީ ސިފައިންގެ މެމްބަރުންނަށް ވުމުގެ ފުރުސަތު އެބަ އޮތް ކަމަށާއި އެހެން ނޫން ނަމަ ޖެހޭނީ ގައުމު ދޫކޮށް ބެލަރޫސްއަށް ދާން ކަމަށެވެ.
ހުކުރު ދުވަހު ބެލަރޫސްގެ ޑިފެންސް މިނިސްޓްރީން ބުނީ ވާގްނާގެ ސިފައިން މިހާރު ހަރަކާތްތެރި ވަނީ އެ ގައުމުގެ ސިފައިންނަށް ތަމްރީނުދޭ އަަސްކަރީ އިންސްޓްރަކްޓަރުންގެ ގޮތުގައި ކަމަށެވެ.
