ރިޔާދު، ސައުދީ އަރަބިއްޔާ (ޖުލައި 13) - ލާޒިއޯ އަށް ކުޅެމުން އައި ސާބިއާގެ މިޑްފީލްޑަރު، ސާގޭއި މިލިންކޮވިޗް-ސަވިޗް، ސައުދީ ޕްރޮފެޝަނަލް ލީގު (ޕްރޯ ލީގު)ގެ ކްލަބް އަލް-ހިލާލް އަށް ސޮއިކޮށްފި އެވެ.
އަލް-ހިލާލް އިން ވަނީ މީގެ ކުރިން، ވުލްވްސްގެ ކެޕްޓަން، ރުބެން ނެވޭސް އާއި ޗެލްސީގެ ޑިފެންޑަރު، ކަލީދޫ ކުލިބާލީގެ ސޮއި ވެސް ހޯދައިފަ އެވެ. މިލިންކޮވިޗް-ސަވިޗް، 28، ތިން އަހަރުގެ ކޮންޓްރެކްޓެއްގައި ސޮއިކުރިއިރު، އޭނާ ހޯދަން، އަލް-ހިލާލް އިން ވަނީ ލާޒިއޯ އަށް 40 މިލިއަން ޑޮލަރުގެ ފީއެއް ދައްކައިފަ އެވެ.
ނެވޭސް، މިލިންކޮވިޗް-ސަވިޗް އަދި ކުލިބާލީ ގަންނަން ޖުމްލަ އެކު، އަލް-ހިލާލް އިން ވަނީ 100 މިލިއަން ޑޮލަރު ހޭދަކޮށްފަ އެވެ. އަލް-ހިލާލް އަކީ ސައުދީ ފުޓްބޯޅައިގެ އިތުރުން އޭޝިއާ ފުޓްބޯޅައިގެ ވެސް ގަދަ ބާރެެކެވެ. އެ ގޮތުން، އަލް-ހިލާލް އިން ވަނީ ސައުދީ ލީގު 18 ފަހަރު ހޯދުމުގެ އިތުރުން އޭޝިއަން ޗެމްޕިއަންސް ލީގު ހަތަރު ފަހަރު ކާމިޔާބު ކޮށްފަ އެވެ.
ސާބިއާ ގައުމީ ޓީމުގެ މިޑްފީލްޑަރު، މިލިންކޮވިޗް-ސަވިޗް ވަނީ ލާޒިއޯގައި ހޭދަކުރި އަށް އަހަަރަށް ބަލާއިރު، މިދިޔަ އަހަރުތަކުގައި އެ ޓީމުގެ ކެޕްޓަންކަން ވެސް ކޮށްފަ އެވެ. އޭނާ ވަނީ ލާޒިއޯ އަށް 341 މެޗުން 69 ގޯލު ޖަހައިދީފަ އެވެ.
މި ފަހަރުގެ ޓްރާންސްފާގައި ސައުދީ ކްލަބްތަކަށް އައި ކުޅުންތެރިންނަށް ބަލާއިރު، އަލް އިއްތިހާދުން ވަނީ ރެއާލް މެޑްރިޑްގެ ކަރިމް ބެންޒެމާ އާއި ޗެލްސީގެ އެންގޯލޯ ކާންޓޭ އަދި ސެލްޓިކްގެ ޖޮޓާގެ ސޮއި ހޯދައިފަ އެެވެ. އަލް އަހްލީ އިން ވަނީ ލިވަޕޫލްގެ ރޮބާޓޯ ފިރްމީނޯ އާއި ޗެލްސީގެ އެޑޮއާޑް މެންޑީގެ ސޮއި ހޯދައިފަ އެވެ. އަދި އަލް ނަސްރުން ވަނީ އިންޓަ މިލާނުގެ މާސެލޯ ބްރޮޒޮވިޗް ގަނެފަ އެވެ.
ލިވަޕޫލްގެ ޖޯޑަން ހެންޑަސަން އާއި ފަބީނިއޯ ވެސް ސައުދީގެ ކްލަބްތަކާ ވާހަކަ ދައްކަމުން އަންނަކަމަށް ރިޕޯޓްތައް ބުނެ އެވެ. ހެންޑަަސަން އަށް ފުރުސަތު އޮތީ ސްޓީވެން ޖެރާޑް ކޯޗުކޮށްދޭ އަލް އިއްތިފާގުންނެވެ. އަދި ފަބީނިއޯ އަށް އަލް އިއްތިހާދުގެ ހުށަހެޅުން ވަނީ ލިބިފަ އެވެ.
