އިންޓަ ރިސޯޓް ކްރިކެޓް މުބާރާތުގެ ޗެމްޕިއަންކަން ވަން އެންޑް އޮންލީ ރީތި ރަށުން ހޯދައިފި އެވެ.
ކުޅިވަރު އެކުވެނި ކްރިކެޓް ދަނޑުގައި މިއަދި ބޭއްވި މި އަހަރުގެ އިންޓަ ރިސޯޓް ކްރިކެޓް މުބާރާތުގައި ވަނީ ޖުމްލަ އަށް ރިސޯޓަކުން ވާދަކޮށްފަ އެވެ.
މި މުބާރާތުގެ ޗެމްޕިއަންކަން ރީތި ރަށުން ހޯދީ ފައިނަލުގައި ވިލަމެންދޫ އައިލޭންޑާ ބައްދަލުކޮށް 49 ލަނޑުން މެޗު ކާމިޔާބު ކޮށްގެންނެވެ.
ފައިނަލް މެޗުގައި ގުރުދިމާވުމުން ރީތި ރަށުން ނިންމީ ކުޅެން އެރުމަށެވެ. ކުޅެންއަރައި 6 އޯވަރުގައި 115 ލަނޑު ހެދި އެވެ. އެންމެ ރަނގަޅަށް ކުޅުނީ 18 ލަނޑު ހެދި ޖަޔަންތަ އާއި 22 ލަނޑު ހެދި ސަމަން މުނަވީރަ އަދި 23 ލަނޑު ހެދި ސަތީޝް އެެވެ. މި އިނިންގްސްގައި ވިލަމެންދޫ އައިލޭންޑުން އެންމެ ރަގަޅަށް އުކީ 29 ލަނޑަށް އެއް ވިކެޓް ނެގި ސެލްވަރާޖް އާއި 19 ލަނޑަށް އެއް ވިކެޓް ނެގި ސަތިޔާ ކުމާރު އެވެ.
ޖަވާބުގައި ވިލަމަންދޫ ކުޅެންއަރައި 6 އޯވަރު ހަމަވިއިރު ފަސް ކުޅުންތެރިން ނުބައިވެގެން ހެދިފައިވަނީ 66 ލަނޑެވެ. އެ ޓީމުން އެންމެ ރަނގަޅު ކުޅުމެއް ދެއްކީ 23 ލަނޑު ހެދި އަނީސް އެވެ. ރީތި ރަށު ޓީމުން އެންމެ ރަގަޅަށް އުކީ 14 ލަނޑަށް އެއް ވިކެޓް ނެގީ ސަތީޝް އާއި ހަ ލަނޑަށް ދެ ވިކެޓް ނެގި ޖަގަތު މިލޯން އެވެ.
ފައިނަލް މެޗުގެ އެންމެ މޮޅު ކުޅުންތެރިއަކަށް ހޮވިފައިވަނީ ރީތި ރަށުގެ ސަތީޝް އެވެ.
މުބާރާތުގެ އިންޑިވިޖުއަލް ވަނަތަކަށް ބަލާއިރު، އެންމެ މޮޅު ބެޓްސްމަނަކީ ކުރުނބާ މޯލްޑިވްސްގެ ސަނަކާ އެވެ. މުބާރާތުގެ އެންމެ މޮޅު ބޯލަރަކަށް ވިލަމެންދޫގެ ޖަޔަން ޗަތުރާންގަ ހޮވުނުއިރު، މުބާރާތުގެ އެންމެ މޮޅު ފީލްޑަރަކީ ރީތި ރަށުގެ ޕަސިންދު އަސިރި އެވެ.
މުޅި މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ހަތަރު ވަނަ އަށް ދިޔަ ކުރުނބާގެ ސަނަކާ އެވެ.
މިއީ، ކްރިކެޓް ބޯޑް އޮފް މޯލްޑިވްސް އިން ރިސޯޓްތަކަށް ހާއްސަކޮށްގެން ބޭއްވި 14 ވަނަ ކްރިކެޓް މުބާރާތެވެ.
