ބ. ތުޅާދޫ، ށ. ބިލެތްފަހި، އަދި ތ. ވިލުފުށީގައި ޑޮމެސްޓިކް އެއާޕޯޓް އަޅަން ބޭނުންވާ ބިން ހިއްކަން ކެޕިޓަލް މެރިން އެންޑް ކޮންސްޓްރަކްޝަން ޕްރައިވެޓް ލިމިޓެޑްއާ ހަވާލުކޮށްފި އެވެ.
އެ މަސައްކަތުގެ އެއްބަސްވުމުގައި ކެޕިޓަލް މެރިން އާ އެކު ސަރުކާރުން ސޮއިކުރީ ހައުސިން މިނިސްޓްރީގައި އެކަމަށް ޓަކައި މިއަދު ބޭއްވި ރަސްމިއްޔާތެެއްގަ އެވެ. އެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ހައުސިން މިނިސްޓްރީގެ ޑިރެކްޓަރް ޖެނެރަލް ފާތިމަތު ޝާނާ ފާރޫގެވެ. ކެޕިޓަލް މެރިން އެންޑް ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ސިވަރާޖާ މަނިވައްނަން އެވެ.
މި މަޝްރޫއުގެ އަގަކީ 42،450،783.48 ޑޮލަރު (654 މިލިއަން ރުފިޔާ) އެވެ. އަދި މި ތިން ރަށުގެ ބިން ހިއްކަން ކެޕިޓަލް މެރިން އެންޑް ކޮންސްޓްރަކްޝަން ޕްރައިވެޓް ލިމިޓެޑަށް ދީފައިވަނީ 280 ދުވަހުގެ މުއްދަތެކެވެ.
ތިން ރަށުން ހިއްކާ ބިމުގެ ތަފްސީލު:
- ށ. ބިލެތްފަހި: 56.34 ހެކްޓަރު
- ބ. ތުޅާދޫ: 44.70 ހެކްޓަރު
- ތ. ވިލުފުށި: 44.70 ހެކްޓަރު
ހަ ރަށެއްގައި ޑޮމެސްޓިކް އެއާޕޯޓްތަކެއް ތަރައްގީކޮށްދޭނެ ފަރާތްތައް ހޯދަން ސަރުކާރުން އިއުލާންކުރީ 2021 ވަނަ އަހަރުގެ ޑިސެމްބަރު ގައެވެ. އެއާޕޯޓުއަޅަން ނިންމާފައިވާ ރަށްތަކަކީ ހދ. މަކުނުދޫއާއި، ށ. ބިލެތްފަހިއާއި، ބ. ތުޅާދޫއާއި، ރ. ބެރިޔަންފަރު، ފ. މަގޫދޫގެ އިތުރުން ތ. ވިލުފުށްޓެވެ. މީގެ ތެރެއިން އަމަލީ މަސައްކަތް އަދި ފެށީ މަގޫދޫ އެއާޕޯޓުގެ އެކަންޏެވެ.
