ޕާކިސްތާނުގެ މަރުކަޒީ ބޭންކަށް ސައުދީ އަރަަބިއްޔާއިން ދެ ބިލިއަން ޑޮލަރު ޑިޕޮސިޓް ކުރުމުން ޕާކިސްތާނުގެ ސަރުކާރުން ޝުކުރު އަދާކޮށްފި އެވެ.
ޑޮލަރުގެ ދަތިކަން ކުރިމަތިވެ، އިގުތިސާދި ގޮންޖެހުންތައް ކުރިމަތިވެފައިވާ ޕާކިސްތާނަށް އެހީވުމަށް ތިން ބިލިއަން ޑޮލަރުގެ ލޯނެއް ދިނުމާ ގުޅޭ އިންޓަނޭޝަނަލް މަނިޓަރީ ފަންޑް (އައިއެމްއެފް) ބައްދަލުވުން ވަރަށް އަވަހަށް އޮންނާނެ އެވެ.
ފިނޭންސް މިނިސްޓަރު އިސްހާގް ދާރް ދެއްވި ވީޑިއޯ ބަޔާނެއްގައި ވަނީ ސައުދީގެ ވައުދު ފުއްދުމުން ޝުކުރު އަދާކޮށް، އެ ފައިސާގެ ސަބަބުން ބޮޑެތި ފައިދާތަކެއް ލިބޭނެ ކަމަށް ވިދާޅުވެފަ އެވެ.
މިދިޔަ ހަފުތާގައި ބޭރު ފައިސާގެ ރިޒާވް 9.6 ބިލިއަން ޑޮލަރަށް ވެއްޓުނު އިރު، ދާރް ވިދާޅުވީ ސައުދީގެ ޑިޕޮސިޓާ އެކު ރިޒާވް 11.6 ބިލިއަން ޑޮލަރަށް އުފުލިފައިވާ ކަމަށެވެ.
ބޮޑު ވަޒީރު ޝެހްބާޒް ޝަރީފް ކުރެއްވި ޓްވީޓެއްގައި ވަނީ ސައުދީއަށް ޝުކުރު އަދާކޮށް، އިގުތިސާދު ރަނގަޅު ކުރަން މަސައްކަތް ކުރާނެ ކަމަށް ވިދާޅުވެފަ އެވެ.
