ކުރިއަށް އޮތް ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ތާއީދުކުރައްވާނެކަން އިއުލާންކުރެއްވި ނަމަވެސް، ނައިބު ރައީސް ފައިސަލް ނަސީމް އަދިވެސް ހުންނެވީ ޖުމްހޫރީ ޕާޓީގައި ކަމަށް އެޕާޓީން ބުނެފި އެވެ.
ސަރުކާރު ކޯލިޝަނުގައި އޮތް ޖޭޕީ އިން ރިޔާސީ އިންތިހާބުގައި ވަކިން ވާދަކުރަން ނިންމި ހިސާބުން ނައިބު ރައީސް ވަނީ އެމަނިކުފާނުގެ ތާއީދުކުރައްވާނީ ރައީސް ސޯލިހަށް ކަމަށް ވިދާޅުވެފަ އެވެ. އެއާއެކު ޖޭޕީ ދޫކުރައްވާ ފައިސަލް އެމްޑީޕީއާ ގުޅިވަޑައިގަންނަވާނެކަމުގެ އަޑުތައް ވަނީ ފެތުރިފަ އެވެ.
ރަސްމީކޮށް ކެމްޕޭން ފެށުމުގެ ކުރިން އެމްޑީޕީން އެ ޕާޓީގެ މެނިފެސްޓޯ އެކުލަވާލުމަށް މިއަދު ބޭއްވި ބައްދަލުވުމުގައިވެސް ފައިސަލް ، ރައީސް ސޯލިހުގެ އަރިހުގައި އިންނެވި ފޮޓޯތައް ސޯޝަލް މީޑިއާއަށް އައުމުން އެއް ބަޔަކު ސުވާލު އުފެއްދީ އޭނާ އެމްޑީޕީއާ ގުޅިވަޑައިގެންނެވީތޯ އެެވެ.
ނައިބު ރައީސް ފައިސަލް ޖޭޕީން ވަކިވެވަޑައިގެންނެވީތޯ "އަދަދު" އިން ސުވާލުކުރުމުން ޖޭޕީގެ ތަރުޖަމާނު އަލީ ސޯލިހު ވިދާޅުވީ ނައިބު ރައީސް އެ ޕާޓީ ދޫކުނުކުރައްވާ ކަމަށާއި އެކަމަށް އެދިވަޑައިގެންފައި ވެސް ނުވާ ކަމަށެވެ.
"އަޅުގަނޑަށް އަދި ނުފެނޭ ތި އިވެންޓުގެ ފޮޓޯއެއް، ޕާޓީގެ ތެރޭގައި އަދި ތިކަމާ ބެހޭގޮތުން މަޝްވަރާއެއް ނުކުރެވޭ، މިވަގުތު އެއްޗެއް ދަންނަވާލަން ދަތި" އަލީ ވިދާޅުވި އެވެ.
ޖޭޕީން މިހާރު ގެންދަނީ އެ ޕާޓީގެ ރިޔާސީ ކެންޑިޑޭޓު އަދި ލީޑަރު ގާސިމް އިބްރާހިމަށް ތާއީދު ހޯދުމަށް ރަސްމީކޮށް މާލެއާއި އަތޮޅުތަކުގައި ކެމްޕޭން ފަށާފަ އެވެ.
މިކަމާ ގުޅޭގޮތުން ސުވާލުކުރުމުން އެމްޑީޕީގެ ޗެއާޕާސަން ނައިބު އިދާރީ، އިބްރާހިމް ވަހީދު "އަދަދު" އަށް ވިދާޅުވީ ނައިބު ރައީސް އެމްޑީޕީއާ ގުޅިވަޑައިނުގަންނަވާ ކަމަށާއި އެހެން ނަމަވެސް ހުންނެވީ ރައީސް ސޯލިހަށް ތާއީދުކުރައްވައިގެން ކަމަށެވެ.
"ނައިބު ރައީސް ފައިސަލް ނަސީމް ހުންނެވީ ރައީސް ސޯލިހަށް ދެވަނަ ދައުރަކަށް ތާއީދު ކޮށްގެން" އޭނާ ވިދާޅުވި އެވެ.
ނައިބު ރައީސް ފައިސަލް ނަސީމަކީވެސް ރައީސް ސޯލިހު މި އަހަރުގެ ރިޔާސީ އިންތިހާބުގައި ރަނިންމޭޓުގެ މަގާމު ދެއްވަފާނެ ބޭފުޅުންގެ ލިސްޓުގައި ގުނާލެވޭ ބޭފުޅެކެވެ.
