މިދިޔަ ސީޒަނުގައި ކްލަބް ވެލެންސިއާ އަށް ކުޅުނު ބިދޭސީ ކުޅުންތެރިންނަށް ނުދީ ހުރި މުސާރަ މައްސަލައިގައި ދުނިޔޭގެ މައި ފުޓްބޯޅަ އިދާރާ، ފީފާ އިން ވަނީ ވެލެންސިއާ އަށް ފިޔަވަޅު އަޅައިފި އެވެ.
"އަދަދު" އަށް އެނގިފައިވާ ގޮތުގައި މީގެ ދެ ދުވަހެއް ކުރިން ފީފާ އިން ވަނީ އަނެއްކާ ވެސް ވެލެންސިއާ އަށް ފިޔަވަޅު އަޅައިފަ އެވެ. އެއީ، އިންޓަނޭޝަނަލް އަދި ލޯކަލް ޓްރާންސްފާ ބޭން އެކެވެ. މާނަ އަކީ ވެލެންސިއާގެ ހުރި މުސާރަ މައްސަލަތައް ހައްލުނުކޮށް ކުރިއަށް އޮތް (މި މަހު ހުޅުވޭ) ޓްރާންސްފާ މާކެޓްގައި ވެސް އެއްވެސް އާ ކުޅުންތެރިއަކު ރަޖިސްޓްރީ ނުކުރެވުމެވެ.
މި ސީޒަނުގައި ވެލެންސިއާ އިން އެހެން ކްލަބްތަކުން ގެނައި ކުޅުންތެރިންނަށް ވެސް އަދި މިހާތަނަށް އެ ޓީމަށް މެޗެއް ނުކުޅެވެ އެވެ. އެ ގޮތުން، މާޒިޔާ ސްޕޯޓްސް އެންޑް ރެކްރިއޭޝަން އިން އައި އިބްރާހިމް ވަހީދު ހަސަން (އިއްބެ) އާއި ކްލަބް ގްރީން ސްޓްރީޓްސް އިން ގެނައި، ރިލްވާން ވަހީދު (ރިލޭ)، ވެލެންސިއާގެ ޕްރެކްޓިހުގައި ބައިވެރިވި ނަމަވެސް މެޗެއް ކުޅެވޭ ގޮތެއްނުވި އެވެ.
މެޗެއް ނުކުޅެ، ސާފް ޗެމްޕިއަންޝިޕްގެ ސްކޮޑަށް އިިއްބެ އެރުމުން އޭނާ އަށް މީޑިއާގައި ފާޑުކިޔުންތަކެއް ވެސް އަމާޒުވި އެވެ.
"އަދަދު" އަށް ލިބިފައިވާ މައުލޫމާތަށް ބަލާއިރު، ވެލެންސިއާ އިން މިދިޔަ ސީޒަނުގައި އެ ކްލަބަށް ކުޅުނު ސްޕެއިންގެ ފޯވާޑް ބޯހާސް މާޓިން އަށް ނުދީ 62000 ޑޮލަރު އެބައޮތެވެ. ފަސް ހާސް ޑޮލަރުގެ މުސާރައެއް ދޭ ގޮތަށް ގެނައި، ބޯހަސް ވަނީ އޭނާ އަށް ވެލެންސިއާ އިން ލާރި ނުދޭ މައްސަލަ ފީފާ އަށް ވެސް ހުށަހަޅައިފަ އެވެ.
ފީފާ އިން ވެލެންސިއާ އަށް ފިޔަވަޅު އަޅާފައިވަނީ ވެސް ބޯހަސް އަށް ނުދީ ހުރި މުސާރަ މައްސަލައިގައި ކަން އެނގިފައިވެ އެވެ.
ވެލެންސިއާ އަށް މިދިޔަ ސީޒަނުގައި ކުޅެފައިވާ ދިވެހި ކުޅުންތެރިންނަށް ނުދީ ހުރި މުސާރަ މައްސަަލަ ވެސް ވަނީ އެފްއޭއެމަށް ހުށަހަޅައިފަ އެވެ.
ވެލެންސިއާ އިން މުސާރަ ނުލިބިގެން އެފްއޭއެމަށް ސިޓީ ހުށަހަޅާފައިވާ ކުޅުންތެރިންނަށް އެފްއޭއެމް އިން ވަނީ މިދިޔަ އޭޕްރީލް މަހު ޖަވާބު ދީފަ އެވެ. އެ ސިޓީގައި އެފްއޭއެމުން ބުނެފައިވަނީ "މި އެސޯސިއޭޝަންގެ (އެފްއޭއެމްގެ) ޕްލޭޔާ ސްޓޭޓަސް ކޮމިޓީ އަށް، ހުށަަހަޅާފައިވާ މައްސަލަ ބެލުމަށް ފަހު ނިންމާފައިވަނީ ކްލަބަށް މި އެސޯސިއޭޝަނުން ދޫކުރާ ސަބްސިޑީ އިން މުސާރަ ގޮތުގައި ލިބެން ޖެހޭ ފައިސާ އުނިކުރުމަށް ފަހު ތިޔަ ފަރާތަށް އެ ފައިސާ ފޯރުކޮށްދިނުމަށެެވެ." މިހެނެވެ. އެކަމަކު، މިހާތަނަށް އެ ފައިސާ ކުޅުންތެރިންނަށް ލިބިފައިނުވާކަން ވަނީ އެނގިފަ އެވެ.
އެނގިފައިވާ ގޮތުގައި ރާއްޖޭގެ އެހެން ކްލަބްތަކަށް ކުޅުނު ބިދޭސީ ކުޅުންތެރިންތަކެއް ވެސް ވަނީ ނުދީ ހުރި މުސާރަ މައްސަލަ ފީފާ އަށް ހުށަހަޅައިފަ އެވެ.
މީގެ ކުރިން އެފްއޭއެމުން ވަނީ ކުޅުންތެރިންނަށް ނުދީ ހުރި މުސާރަ މައްސަލައިގައި ރާއްޖޭގެ އެންމެ ޒަމާންވީ ދެ ކްލަބް ކަމަށްވާ ނިއު ރޭޑިއަންޓް ސްޕޯޓްސް ކްލަބާއި ވިކްޓަރީ ސްޕޯޓްސް ކްލަބް ސަސްޕެންޑްކޮށްފަ އެވެ. އެ ގޮތުން، 2019 ވަނަ އަހަރު ދިން ސަސްޕެންޝަން އުވާލާފައިވަނީ މިދިޔަ އަހަރު އެވެ.
