ޕެރިސް (ޖުލައި 7) - އިންޓަ މިލާނަށް ކުޅެމުންދިޔަ ސްލޮވާކިއާގެ ޑިފެންޑަރު މިލާން ސްކްރީނިއާ އާއި ރެއާލް މެޑްރިޑަށް ކުޅުނު ސްޕެއިންގެ މިޑްފީލްޑަރު މާކޮސް އަސެންސިއޯ ހިލޭ ޓްރާންސްފާއެއްގައި ޕީއެސްޖީ އަށް ބަދަލުވެއްޖެ އެވެ.
ސްލޮވާކިއާގެ ގައުމީ ޓީމުގެ ކެޕްޓަން ސްކްރީނިއާ ހޯދަން ޕީއެސްޖީން މިދިޔަ އަހަރު ވެސް މަސައްކަތްކުރި އެވެ. އެކަމަކު އިންޓަ އިން އޭރު ސްކްރީނިއާގެ ޓްރާންސްފާ ފީއަކަށް ކިޔި 76 މިލިއަން ޑޮލަރުގެ ފީއަށް ޕީއެސްޖީން އެއްބަހެއް ނުވި އެވެ. އެހެންވެ، ޕީއެސްޖީން މަޑުކުރީ މިދިޔަ ސީޒަންގެ ނިޔަލަށް އޮތް ސްކްރީނިއާގެ ކޮންޓުރެކްޓް ހަމަވުމުން، ހިލޭ ޓްރާންސްފާއެއްގައި އޭނާ ގެނައުމަށެވެ.
ސްކްރީނިއާ، 28، ފަސް އަހަރު ދުވަހު އެއްބަސްވުމެއްގައި ޕީއެސްޖީ އަށް ބަދަލުވިކަން އެ ކްލަބުން މި ކަށަވަރުކޮށްދިނީ އެ ކްލަބުގެ ކޯޗަކަށް ސްޕެއިންގެ ލުއިސް އެންރީކޭ ހަވާލުކުރިތާ އެއް ދުވަސް ފަހުންނެވެ.
"މި ފަދަ ވަރުގަދަ ކްލަބަކާ ގުޅުމުގެ ފުރުސަތު ލިބުނީމަ ވަރަށް އުފާވެއްޖެ،" ސްކްރީނިއާ ބުންޏެވެ.
އިންޓާގައި ސްކްރީނިއާ ހަ އަހަރު ހޭދަކުރިއިރު، އެ ކްލަބާއެކު އިޓާލިއަން ލީގު، އިޓާލިއަން ކަޕް އަދި އިޓާލިއަން ސުޕަ ކަޕް އޭނާ ކާމިޔާބުކުރިއެވެ.
ކޮންޓުރެކްޓް އާކުރަން ދެކޮޅު ހެދުމުން، އިންޓާ އާއި ސްކްރީނިއާ ދެމެދު އޮތް ގުޅުން އޮތީ ގޯސްވެފައެވެ. މި އަހަރުގެ ފެބްރުއަރީ މަހު އެ ކްލަބުން ވަނީ ސްކްރީނިއާ އަތުން ކެޕްޓަން ބޭންޑް ވެސް އަތުލައިފައެވެ.
ޕީއެސްޖީއާ ސްކްރީނިއާ ގުޅުމަކީ އެ ކްލަބަށް ލިބޭ ބޮޑު ހިތްހަމަޖެހުމެެކެވެ. މިދިޔަ ސީޒަންގައި އެ ކްލަބުގެ ޑިފެންސްގައި ހުރި ބަލި ފައިތައް ފެނުނެވެ. ޕީއެސްޖީން ލީގު ޗެމްޕިއަންކަންް ހޯދިޔަސް، އެ ޓީމު ކޮޅަށް ފްރާންސް ލީގުގައި 40 ލަނޑުވަނެވެ. މިއީ 2003 ވަނަ އަހަރުގެ ފަހުން، ފްރާންސް ލީގުގެ ޗެމްޕިއަންކަން ހޯދި ޓީމެއްގެ އެންމެ ދަށް ޑިފެންސިވް ރެކޯޑެވެ.
ރެއާލް މެޑްރިޑްގައި 10 ސީޒަން ހޭދަކުރުމަށް ފަހު، އަސެންސިއޯ ،27، ޕީއެސްޖީއާ ގުޅުނީ ތިން އަހަރު ދުވަހުގެ އެއްބަސްވުމެއްގަ އެވެ. ރެއާލްއާ އެކު ހަދާފައިވާ އެއްބަސްވުން ހަމަވުމުން، އަސެންސިއޯ ވެސް ޕީއެސްޖީއާ ގުޅުނީ ހިލޭ ޓްރާންސްފާއެއްގަ އެވެ.
ސްޕެއިންގެ ގައުމީ ޓީމަށް ވެސް ކުޅޭ އަސެންސިއޯ ވަނީ ރެއާލާ އެކު 17 ތަށި ހޯދައިފައެވެ. އޭގެ ތެރޭގައި ޗެމްޕިއަންސް ލީގުގެ ތިން ތަށި ވެސް ހިމެނެ އެވެ.
