ރައްޔިތުންގެ މަޖިލީހުގެ ދާއިމީ ކޮމިޓީތަކުގެ އެކުލެވުމަށް ގެންނަން ޖެހޭ ބަދަލުތަކުގެ މައްސަލަ ނިންމުމަށް ދައުރުން ބޭރު އިތުރު ޖަލްސާއެއް ތާވަލުކޮށްފި އެވެ.
އަންނަ ހޯމަ ދުވަހު ބާއްވާ އެެ ޖަލްސާއަށް އެޖެންޑާ ކޮށްފައި އޮތް ހަމަ އެކަނި ކަމަކީ މަޖިލީހުގެ ދާއިމީ ކޮމިޓީތަކުގައި ސިޔާސީ ޕާޓީތަކުގެ މެމްބަރުންނާއި ޕާޓީއަކަށް ނިސްބަތްވެވަޑައިނުގަންނަވާ މެމްބަރުން ތަމްސީލު ކުރައްވާނެ ގޮތް ނިންމުމުގެ މައްސަލަ އެވެ.
ރައްޔިތުންގެ މަޖިލީހުގެ މެޖޯރިޓީ އޮންނަ އެމްޑީޕީގެ ޕާލަމެންޓްރީ ގްރޫޕުން އެދުުނު ގޮތަށް، މި މައްސަލަ ނިންމުމަށް ދައުރުން ބޭރު ޖަލްސާއެއް މި ހަފްތާގައި ވެސް ބާއްވާފައިވެ އެވެ.
ހޯމަ ދުވަހު ބޭއްވި އެ ޖަލްސާގައި ޖަލްސާ ފެއްޓެވުމަށް ފަހު ރިޔާސަތުން ވިލުުފުށި ދާއިރާގެ މެމްބަރު ހަސަން އަފީފު ވިދާޅުވީ ބައެއް މެމްބަރުން ތަމްސީލު ކުރެއްވި ޕާޓީން ވަކިވެވަޑައިގެންފައި ވާތީ ކޮމިޓީތަކަށް ގެންނަން ޖެހޭ ބަދަލުގެ ރިޕޯޓް އަލުން ބަދަލުކުރަން ޖެހިފައިވާ ކަމަށާއި ދެން ޖަލްސާއެއް ބާއްވާނީ އެ ބަދަލާ އެކު މެމްބަރުންނާ ރިޕޯޓް ހިއްސާކޮށްފައިވާ ކަމަށެވެ. އެއާއެކު ޖަލްސާ ވަނީ ނިންމާލައިފަ އެވެ.
ދައުރުން ބޭރު ފުރަތަމަ ޖަލްސާ ކުރިއަށް ނުގެންގޮސް ހުއްޓާލުމުން އެކަމާމެދު އެމްޑީޕީން ވަނީ ކަންބޮޑުވުން ފާޅުކޮށް ރިޔާސަތަށް ތުހުމަތުތަކެއް ވެސް އަމާޒުކޮށްފަ އެވެ.
"އަޅުގަނޑުމެންނަށް ފާހަގަވެގެން މި ދިޔައީ ހަމަ ކުއްލިއަކަށް ވަރަށް ވަގުތު ކުޑަތަންކޮށް ޖަލްސާއަކަށް ގޮވާލީމާ އެމްޑީޕީގެ މެމްބަރުން ވަރަށް މަދުވާނެ ކަމަށް ބެލިގެން އެކަން ކުރެއްވީ ކަމަށް. ދެން އެ ނޫން ގޮތަކަށް އެކަން ފެނުނީމަ ޖަލްސާ ކުރިއަށް ނުގެންދެވީ ކަމަށް," އެ ދުވަހު ނޫސްވެރިންނާ ބައްދަލުކުރައްވައި މެޖޯރިޓީ ލީޑަރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވި އެވެ.
އެ ދުވަހު އަސްލަމް ވިދާޅުވި ގޮތުގައި މަޖިލީހުގައި އެޅުވިފައި އޮތް "މަރުތަޅުން" ސަލާމަތްކުރުމަށް ކުރަން ޖެހޭ މަސައްކަތް ކުރުމަށް ދައުރުން ބޭރު އިތުރު ޖަލްސާތަކެއް ބޭއްވުމަށް އެ ޕާޓީން އެދިފައިވެ އެވެ.
މަޖިލީހުގެ ގަވައިދުގައިވާ ގޮތުން ދައުރުން ބޭރު ޖަލްސާއެއް ބާއްވަން، މަޖިލީހުގެ ތިންބައިކުޅަ އެެއްބައި މެމްބަރުން އެދިވަޑައިގެންފި ނަމަ 14 ދުވަހެ ތެރޭގައި އެ ޖަލްސާ ބާއްވަން ޖެހެ އެވެ.
ދައުރު ނިންމާލިއިރު އެޖެންޑާގައި، މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ އަދި އިދިކޮޅުން ހުށަހަޅާފައިވާ އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތްކަމުގެ މައްސަލަ އޮތެވެ. އެ މައްސަލަތައް ރިޔާސަތުން ހުއްޓުވީ މަޖިލީސް ބެހިފައިވާ ގޮތަށް ބަދަލު އައުމާއެކު ކޮމިޓީތަކަށް އެ ބަދަލު ގެންނަންޖެހޭ ކަމަށް ބުނެފަ އެވެ. ނަމަވެސް, ކޮމިޓީތައް އެކުލަވާލުން ކުރިއަށް ނުގެންދެ އެވެ.
އީވާގެ މައްސަލަ ކުރިއަށް ނުގޮސް އޮތީ އެމްޑީޕީން 14 މެމްބަރަކު މިހާރު ވަކިވުމުން ކޮމިޓީތަކުގެ ނިސްބަތަށް ބަދަލު އަންނާތީ އާންމު ކޮމިޓީ އަލުން އެކުލަވާނުލެވިގެންނެވެ. އެކަމާ ގުޅިގެން ސިޔާސީ ޕާޓީތަކުގެ މަޝްވަރާއިން ވެސް ހައްލެއް މިހާތަނަށް ހޯދިފައި ނުވެ އެވެ.
