ޗެޓްޖީޕީޓީގެ ލެންގުއޭޖް މޮޑެލް ތަމްރީނު ކުރުމަށް އެތައް ބައެއްގެ ޑޭޓާ ވަގަށް ނަގާފައިވާ ކަމުގެ ތުހުމަތުކޮށް، އެ ޕްލެޓްފޯމް ހިންގާ ކުންފުނި އޯޕެންއޭއައި އާއި ދެކޮޅަށް ތިން ބިލިއަން ޑޮލަރުގެ ކްލާސް އެކްޝަން ލޯސޫޓެއް ހުށަހަޅައިފި އެވެ.
ސިއްރު ގްރޫޕަކުން ހުށަހަޅާފައިވާ 157 ސަފްހާގެ މައްސަލާގައި ބުނެފައިވަނީ އޯޕެން އޭއައި އިން ވަނީ އިންޓަނެޓުން 300 ބިލިއަނަށް ވުރެ ގިނަ ބަސް ވަގަށް ނަގައި ޕްރައިވެސީ ގާނޫނުތަކާއި ހިލާފުވެފައި ކަމަށެވެ. ވިޔަފާރީގެ ފައިދާ ހޯދުމަށް ކޮށްފައިވާ މި އަމަލުގައި ހުއްދައާ ނުލާ ހޯދާފައިވާ އާންމުގެ ޒާތީ މައުލޫމާތުވެސް ހިމެނޭކަމަށް އެފަރާތްތަކުން ބުނެފައިވެ އެވެ.
މި މައްސަލަ އެމެރިކާގެ ސަންފްރަންސިސްކޯގައި ހުންނަ ފެޑެރަލް ކޯޓަށް ހުށަހަޅާފައިވަނީ އެގައުމުގެ "ދަ ކްލާކްސަން ލޯ ފާމް" އިންނެވެ. މިކަމުގެ ގެއްލުމުގެ ބަދަލު ތިން ބިލިއަން ޑޮލަރަށް އަރާކަމަށް މައްސަލަ ހުށަހެޅި ފަރާތުން ބުނެފައިވެ އެވެ. މި ތުހުމަތުތަކަށް އޯޕެން އޭއައި އިން ރައްދެއްދީފައެއް ނުވެ އެވެ.
ޗެޓްޖީޕީޓީގެ ޓެކްނޮލޮޖީއާ އެކި އޭއައިގެ ވާދަވެރިކަން ބޮޑުވެ ގިނަ އަދަދެއްގެ ބަހުސްތަކެއް މި މައުލޫއަށް ދަނީ ކުރެވެމުންނެވެ. އެގޮތުން އޭއައި އިން ބޭނުންކުރާ ޑޭޓާގެ ސައްހަކަމާއި ކުރިމަތިވެދާނެ ނުރައްކާތަކުގެ ވާހަކަތައް ހިމެނެ އެވެ.
ހުދު އޯޕެންއޭއައިގެ ސީއީއޯ ސޭމް އޯލްޓްމެން ވެސް ވަނީ އޭއައި އަކީ ނަހަމަ ގޮތުގައި ބޭނުންކޮށް ނުރައްކަލަކަށް ހެދިދާނެ އެއްޗެއްކަމަށާއި އެހެންކަމުން ރެގިއުލޭޓުކުރުން މުހިންމު އެއްޗެއް ކަމަށް ބުނެފައިވެ އެވެ. ނަމަވެސް މިހާރު ހުށަހެޅިފައިވާ މައްސަލައަށް އެކުންފުނިން އަދި ރައްދެއް ދީފާ ނުވެ އެވެ.
