އީލޮން މަސްކްގެ 'އެކްސް' ގައި ބޭނުންކުރާ އާޓިފިޝަލް އިންޓެލިޖެންސް ޗެޓްބޮޓް "ގްރޮކް" ބޭނުންކޮށްގެން އަންހެނުންނާއި ކުޑަކުދިންގެ ބަރަހަނާ ފޮޓޯތަކާއި ވީޑިއޯތައް އުފައްދާ މައްސަލަ ޔޫރަޕިއަން ޔޫނިއަން (އީޔޫ) އިން ރަސްމީކޮށް ތަހުގީގު ކުރަން ފަށައިފި އެވެ.
ޔޫރަޕިއަން ކޮމިޝަނުން ހޯމަ ދުވަހު ނެރުނު ބަޔާނެއްގައި ބުނެފައިވަނީ، މި ތަހުގީގުގައި މައިގަނޑު ގޮތެއްގައި ބަލާނީ އީޔޫގެ ޑިޖިޓަލް ސާވިސަސް އެކްޓްއާ އެކްސް އިން ހިލާފުވެފައިވޭތޯއެވެ. މި ގާނޫނަކީ ސޯޝަލް މީޑިއާ ކުންފުނިތަކުން އެ މީހުންގެ ޕްލެޓްފޯމްތަކުގައި ފެތުރޭ ގާނޫނާ ހިލާފު އަދި ނުރައްކާތެރި ކޮންޓެންޓްތައް ހުއްޓުވުމަށް މަޖުބޫރުކުރާ ގާނޫނެކެވެ.
ބްރަސަލްސްއިން ބުނާ ގޮތުގައި، ގްރޮކް މެދުވެރިކޮށް އުފައްދާ ބަރަހަނާ މަންޒަރުތަކަކީ ކުޑަކުދިންނަށް ކުރާ ޖިންސީ ގޯނާގެ ގޮތުގައި ބެލެވިދާނެ ފަދަ ނުރައްކާތެރި މަންޒަރުތަކެކެވެ.
މި މައްސަލައާ ގުޅިގެން އީޔޫ ކޮމިޝަންގެ ރައީސް އުރްސުލާ ވިދާޅުވީ، އަންހެނުންނާއި ކުޑަކުދިންގެ ކަރާމާތަށް އުނިކަން އަންނަ މިފަދަ "ނުކުރެވޭނެ ފަދަ އަމަލުތައް" ޔޫރަޕުން ބަލައިނުގަންނާނެ ކަމަށެވެ. އަދި އީޔޫގެ ޓެކް ކޮމިޝަނަރު ހެންނާ ވިރްކޫނަން ވިދާޅުވީ، އަންހެނުންނާއި ކުޑަކުދިންގެ ހައްގުތަކަކީ ޓެކް ކުންފުނިތަކުގެ ވިޔަފާރީގެ ތެރޭގައި ގެއްލިގެންދާނެ "ކޮލެޓަރަލް ޑެމޭޖް" އަށް ވެގެން ނުވާނެ ކަމަށެވެ.
ނޮން-ޕްރޮފިޓް ޖަމިއްޔާއެއް ކަމަށްވާ 'ސެންޓަ ފޯ ކައުންޓަރިން ޑިޖިޓަލް ހޭޓް' އިން ބުނާ ގޮތުގައި، މަދު ދުވަސްކޮޅެއްގެ ތެރޭގައި ގްރޮކް ބޭނުންކޮށްގެން 3 މިލިއަނަށްވުރެ ގިނަ ބަރަހަނާ ފޮޓޯ ވަނީ އުފައްދާފައެވެ. ގްރޮކްގެ މި ހިދުމަތާ މެދު އާންމުންގެ ފާޑުކިޔުން އަމާޒުވީ، ވަރަށް އާދައިގެ ކޮމާންޑްތައް ބޭނުންކޮށްގެން ފަސޭހައިން މިފަދަ ފޭކް މަންޒަރުތައް އުފެއްދޭތީއެވެ.
އީޔޫގެ އިތުރުން އިނގިރޭސިވިލާތުގެ މީޑިއާ ރެގިއުލޭޓަ، އޮފްކޮމް އިން ވެސް ދަނީ އެކްސް އިން އެ ގައުމުގެ އޮންލައިން ސޭފްޓީ އެކްޓާ ހިލާފުވެފައިވޭތޯ ބަލަމުންނެވެ. މިދިޔަ ޑިސެމްބަރު މަހު ވެސް ޝަރުތުތަކާ ހިލާފުވުމުގެ ސަބަބުން އީޔޫ އިން ވަނީ އެކްސް 120 މިލިއަން ޔޫރޯއިން ޖޫރިމަނާކޮށްފައެވެ.
