މިއާމީ، ޔުނައިޓެޑް ސްޓޭޓްސް (ޖުލައި 3) - މަޝްހޫރު ފުޓްބޯޅަ ތަރި ލިއޮނަލް މެސީ ދެން ކުޅޭނީ ޑޭވިޑް ބެކަމްގެ ހިއްސާ އޮންނަ ކްލަބް، އެމެރިކާގެ އިންޓަ މިއާމީ އެފްސީ އަށް ކަމަށް އިއުލާނުކޮށްފައިވާއިރު، މެސީ ފުޓްބޯޅައިން ރިޓަޔާކުރުމާ އެކު އެ ކްލަބްގެ ހިއްސާ އޭނާ އަށް ލިބޭނެ ކަމަށް އިންޓަ މިއާމީގެ ވެރިޔާ ޖޯޖް މާސް ވިދާޅުވެއްޖެ އެވެ.
މެސީ، އިންޓަ މިއާމީ އަށް ސޮއިކުރަން ނިންމީ ޕީއެސްޖީގެ ކޮންޓްރެކްޓް އާ ކުރުމާއި އަލުން ބާސެލޯނާ އަށް ދިއުމުގެ ފުރުސަތާއި ބޮޑު މުސާރަ އަކަށް ސައުދީ އަރަބިއްޔާގެ އަލް ހިލާލް އަށް ދިއުމުގެ ފުރުސަތު އޮއްވައި، އެ ހުރިހާ ކަމެއް ދޫކޮށްލައިފަ އެވެ.
އެލް ޕައީސް އަށް ދިން އިންޓަވިއުއްގައި މާސް ވިދާޅުވީ 2019 ވަނަ އަހަރު ވެސް މެސީ، އިންޓަ މިއާމީ އަށް ގެންނަ ވާހަކަ ދެކެވުނު ކަމަށާއި އެކަމަކު އޭރު އެ ހާލަތެއް ނެތް ކަމަށެވެ.
"މެސީ އައިސްފިއްޔާ މިއީ ދުނިޔޭގެ ދެ ވަނަ ނޫނީ ތިން ވަނަ ލީގަށް ހެދުމުގެ ފުރުސަތު އޮންނާނެ. މެސީ އެ އައީ ހަމައެކަނި ފުޓްބޯޅައިން ކަމެއް ހާސިލްކުރުުމުގެ ބަދަލުގައި އޭނާގެ މާކެއް މި ތަނުގައި ވެސް ބޭއްވުމުގެ ގަސްދުގައި، މެސީ ރިޓަޔާ ކުރުުމުން މި ކްލަބްގެ ހިއްސާއެއް އޭނާ އަށް ލިބޭނެ،" މާސް ވިދާޅުވި އެވެ.
"މެސީއާ އެކު ސޮއިކުރާ ކޮންްޓްރެކްޓްގެ ދަށުން އަހަރަކު، 50 ނޫނީ 60 މިލިއަން ޑޮލަރު ލިބޭނެ"
މާސް ވިދާޅުވީ މެސީ ހޯދަން ކުރި މަސައްކަތް ކާމިޔާބުވީ ކެނޑިނޭޅި ތިން އަހަރު މަސައްކަތް ކޮށްގެން ކަމަށެވެ. އަަދި ޑީލް ނިމޭނެކަން ޔަގީންވީ މިދިޔަ މެއި މަހު ފަހުކޮޅު ކަމަށް ވެސް އޭނާ ވަނީ ވިދާޅުވެފަ އެވެ.
"ބެކަމް، ދިޔައީ މެސީއާ އެކު ފުޓްބޯޅައިގެ ވާހަކަތައް ހިއްސާކުރަމުން، އެމެރިކާގައި އެކަން އޮންނަ ގޮތް. އަހަރެން ވާހަކަ ނުދެއްކީ ނުރަނގަޅު ޕްރެޝަރެއް އަންނާނެތީ، ދެން އަހަރެން މަޝްވަރާތައް ބޭއްވީ ޖޯޖް (މެސީގެ ބައްޕަ)އާ އެކު،" މާސް ވިދާޅުވި އެވެ.
"އަހަރެމެން މަޝްވަރާތައް ކުރިން ބާސެލޯނާގައި، މިއާމީގައި، ރޮސާރިއޯގައި، ދޯހާގައި... އަހަރެން މުޅި ވޯލްޑް ކަޕްގައި ވެސް ހުރީ މެސީގެ ޑީލްގެ ކަންތައްތަކާ އެކު ދޯހާގައި،"
މާސް ވިދާޅުވީ އެމެރިކާ ލީގު އެޕަލް ޓީވީން ސްޓްރީމްކުރާ ގޮތަށް ހަމަޖެހި ކޮންމެ ކްލަބަކަށް މާލީ މަންފާ ކުރާ ގޮތަށް އެ ޑީލް އޮތުމަކީ، އިންޓަ މިއާމީ އަށް މެސީ ގެންނަން ލިބުނު ފަސޭހައެއް ކަމަށެވެ.
އިންޓަ މިއާމީގެ ކޯޗަކީ މެސީއާ އެކު އާޖެންޓީނާ އާއި ބާސެލޯނާގައި މަސައްކަތް ކުރީ ޓަޓާ މާޓީނޯ އެވެ. އިންޓަ މިއާމީން ވަނީ މެސީއާ އެކު ބާސެލޯނާ އަށް ކުޅުނު ސާޖިއޯ ބުސްކެޓްސް ވެސް ގެންނަން ނިންމައިފަ އެެވެ.
