މިދިޔަ މަހު ފީފާ އިން ނެރުނު ރޭންކިންގައި ލެބަނަން އޮތީ ދުނިޔޭގެ 99 ވަނައިގަ އެވެ. އިންޑިއާ އޭރު އޮތީ ދުނިޔޭގެ 101 ވަނައިގަ އެވެ. އެކަމަކު، މިދިޔަ މަހު އިންޑިއާގައި ބޭއްވި އިންޓަ ކޮންޓިނެންޓަލް ކަޕްގައި އެ ޓީމުން ވަނީ ލީގު ބުރުގެ މެޗުގައި ލެބަނަންއާ 0-0 އިން އެއްވަރުކޮށް، ފައިނަލުގައި ލެބަނަން އަތުން 2-0 އިން މޮޅުވެފަ އެވެ. އެ ދެ މެޗުގެ ނަތީޖާ އަށް ވެސް ބަލައި، މި މަހު ފީފާ އިން ނެރުނު ރޭންކިންގައި އިންޑިއާ، އިން ރޭންކިންގެ 100 ވަނަ އަށް ޖެހިލިއިރު، ލެބަނަން ވަނީ 102 ވަނަ އަށް ވެއްޓިފަ އެވެ.
ފަނަރަ ވަަރަކަށް ދުވަސްތެރޭ އިންޑިއާ އާއި ލެބަނަން ބައްދަލުކުރާ ތިން ވަނަ މެޗަށް މިރޭ ދެ ޓީމު ވެސް ނުކުންނާނެ އެވެ. އެއީ، ސާފް ބަންގުބަންދު ޗެމްޕިއަންޝިޕްގެ ސެމީ ފައިނަލުގަ އެވެ.
ސެމީ ފައިނަލް މެޗުތަކުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި އިންޑިއާގެ އެސިސްޓަންޓް ކޯޗު މަހޭޝް ގޯލީ އާއި އާއި ލެބަނަންގެ ކޯޗު ސާބިއާގެ އަލެކްސަންޑަ އިލިކް ވެސް ވަނީ ކުރިން ދެ މެޗުގެ ކަންކަން ރަނގަޅަށް ބަލައި މި މެޗަށް ތައްޔާރުވާނެ ކަމަށް ބުނެފަ އެވެ.
އިންޑިއާ އިން ފީފާ ރޭންކިންގައި ލެބަނަން ފަހަތަށް ޖައްސާލާފައިވާއިރު، އޭގެ އަސަރު، މި އަހަރު އޮކްޓޫބަރު މަހު ފަށާ ފީފާ ވޯލްޑް ކަޕް ކޮލިފައިން އަށް، ނަގާ ސީޑިން އަށް ކުރާނެ ކަމަށް އިޝާރާތްކޮށް ނޫސްވެެރިއަކު ކުރި ސުވާލަށް ދިން ޖަވާބުގައި އިލިކް ބުނީ މި މެޗުގެ ހާއްސަކަން ގިނަ ގޮތްގޮތުން އެބައޮތް ކަމަށެވެ.
"ތެދެއް، އިންޑިއާ އާއި އަހަރެމެންނާ ދެމެދު މިހާރު ވަރަށް ހާއްސަ ވާދަވެރިކަމެއް މި އޮތީ، އެކި ގޮތްގޮތުން އެކަން އެބައޮތް، އަހަރެން ދެކޭ ގޮތުގައި މީގެ ފައިދާ ދެ ޓީމަށް ވެސް އެބައޮތް. އަހަރެމެންނަށް ވެސް މީގެ ފައިދާ ނެގެން އޮތް ގިނަ ގޮތްގޮތަކަށް ބަލައިގެން އަހަރެމެން ކުރިއަށްދާނީ. އިންޑިއާ އަކީ ފުޓްބޯޅައިގައި ކުރިއެރުން ހޯދަމުން އަންނަ ގައުމެއް،" އިލިކް ބުންޏެވެ.
މުބާރާތުގެ ގްރޫޕް ސްޓޭޖުގައި ކުޅުނު ތިން މެޗުން ވެސް މޮޅުވެގެން ސެމީ ފައިނަލަށް އައި ހަމައެކަނި ޓީމަކީ ލެބަނަން އެވެ. އެ ޓީމުގެ ކޯޗު އިލިކް ބުނީ ނޮކައުޓް ބުރެއްގެ މެޗަކާއި ގްރޫޕް ސްޓޭޖުގެ މެޗެއް އަޅައިނުކިޔޭނެ ކަމަށާއި ސެމީ ފައިނަލް ތަފާތުވާނެ ކަމަށެވެ. އަދި އިންޓަ ކޮންޓިނެންޓަލް ކަޕްގެ މެޗުތައް އެއީ ހެއްކެއް ކަމަށް އިލިކް ފާހަގަކޮށްފައިވެ އެވެ.
"އަހަރެމެން ވަރަށް ރަނގަޅަށް އެ މެޗުތައް (އިންޓަ ކޮންޓިނެންޓަލް ކަޕްގެ ދެ މެޗަށް) ދިރާސާކުރާނަން. އަހަރެމެންނަށް އޭގެ ގޯސްކޮށް ކުރެވިފައި ހުރި ކަންތައްތަކާއި، ފައިދާނެގެން ހުރި ކަންކަމަށް ބަލާނަން،" އިލިކް ބުންޏެވެ.
އިންޑިއާގެ ކޯޗު އީގޯ ސްޓިމަކް އާއި އެ ޓީމުގެ ފޯވާޑް ރަހީމް އަލީ އަށް ވަނީ ގްރޫޕް ސްޓޭޖުގެ ފަހު މެޗުގައި ރަތް ކާޑު ދައްކައިފަ އެވެ. އެހެންވެ، ސެމީ ފައިނަލަށް ސްޓިމަކާއި ރަހީމް ސަސްޕެންޑްވާނެ އެވެ. އަަދި ދެ ކާޑު ހަމަވެ، ސަސްޕެންޝަންގެ ސަބަބުން އިންޑިއާގެ ޑިފެންޑަރު، ސަންދޭޝް ޖިންގަން އަށް ވެސް މި މެޗުގައި ނުކުޅެވޭނެ އެވެ.
އިލިކް ބުނީ އިންޑިއާ ކޯޗު، ސްޓިމަކް ބެންޗުގައި ނެތަސް އޭނާގެ ކޯޗިން ޓީމުން މަސައްކަތް ކުރާނީ އެންމެން އެކުގައި ތިބެގެން ހެދި ޕްލޭނަކަށް ކަމަށެވެ. އެކަމަކު، މެޗުގެ އޮއެވަރު ބަދަލުވާ ގޮތްތަކަށް ބަލާއިރު، ބެންޗުގައި ހުރެ ސްޓިމަކަށް ކޯޗުކޮށްދޭން ފުރުސަތު ނުލިބޭތީ ޗެލެންޖިން ހާލަތްތަކެއް އަތުވެދާނެ ކަމަށް ވެސް އިލިކް ވަނީ ބުނެފަ އެވެ.
ސަސްޕެންޝަންގެ ސަބަބުން އިންޑިއާގައި ވަކި ކުޅުންތެރިންތަކަކަށް ނުކުޅެވުނު ކަމުގައި ވިޔަސް، އެއީ އެ ޓީމަށް އަންނާނެ އުނިކަމެއް ނޫން ކަމަށާއި އިންޑިއާގައި ކޮންމެ މަގާމަކަށް ކުޅެވޭ މޮޅު ދެ ކުޅުންތެރިން އެބަތިބި ކަމަށް އިިލިކް ވަނީ ފާހަގަކޮށްފަ އެވެ.
މި މެޗަށް އިންޑިއާގެ ގިނަ ސަޕޯޓަރުންތަކެއް ވަންނާނެކަން އެނގޭ ކަމަށާއި އެއީ ލެބަނަން އިން ވެސް އެދޭ ގޮތް ކަމަށް އެ ޓީމުގެ ކޯޗު އިލިކް ވަނީ ބުނެފަ އެވެ.
"ފުޓްބޯޅަ އަކީ ސަޕޯޓަރުންގެ ހިތްވަރުން ދިރުވާ ކުޅިވަރެއް. އެހެންވީމަ ފުރިފައި އޮތް ދަނޑެއްގައި މެޗުތައް ކުޅެން އަހަރެމެން ވެސް ބޭނުން،" އިލިކް ބުންޏެވެ.
އިންޑިއާ އާއި ލެބަނަން ކުޅޭ ސެމީ ފައިނަލް މެޗު ފަށާނީ ރާއްޖެ ގަޑިން މިރޭ ހަތެއް ޖަހާއިރު އެވެ.
