ރައްޔިތުންގެ މަޖިލީހުގެ ރައީސް މުހައްމަދު ނަަޝީދަށް ތާއީދުކުރައްވާ ބޭފުޅުންކޮޅެއް، އެމްޑީޕީން ވަކިވެވަޑައިގެން އަލަށް އުފައްދަވާ ޕާޓީ ' ދަ ޑިމޮކްރެޓްސް'އިން މެނިފެސްޓޯއެއްގެ މަސައްކަތް ފަށަން ތައްޔާރުވެއްޖެ އެވެ.
މެނިފެސްޓޯ ތައްޔާރުކުރުމަށް ޓަކައި މީހުންގެ ހިޔާލު ހޯދަން ބާއްވާ ބައްދަލުވުމެއް ފުވައްމުލަކުގައި މިރޭ ބާއްވާނެ ކަމަށް އެޕާޓީން ބުންޏެވެ. އެ ބައްދަލުވުން ކުރިއަށް ގެންދާނީ ދަ ޑިމޮކްރެޓްސް ބުނި ގޮތުގައި އެޕާޓީގެ މުއައްސިސު ހަސަން ލަތީފު އިސްކޮށް ހުންނަވައިގެންނެވެ. ފުވައްމުލަކުގައި މާދަމާރޭ ކަންމަތީ ބައްދަލުވުމެއް ބާއްވަން ވެސް އެޕާޓީން ބުންޏެވެ.
ޑިމޮކްރެޓުން މެނިފެސްޓޯއެއްގެ މަސައްކަތް ފަށާފައި މިވަނީ ޕާޓީ އުފެއްދުމުގެ ޖަލްސާ ވެސް ބޭއްވުމުގެ ކުރިންނެވެ. އެޕާޓީ އުފެއްދުމުގެ ޖަލްސާ ބާއްވަން އިލެކްޝަންސަން (އީސީ) އިން ހުއްދަ ދޭނީ އަންނަ އާދީއްދަ ދުވަހު އެވެ.
ދި ޑިމޮކްރެޓްސް އަކީ އެމްޑީޕީގެ ރިޔާސީ ޕްރައިމަރީގައި ކުރިމަތިވެވަޑައިގެންނެވި ނާކާމިޔާބީއަށް ފަހު، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އުފެއްދެވި 'ފިކުރެއްގެ ދިރުން' ހަރަކާތުގައި އިސްކޮށް އުޅުއްވި ބޭފުޅުން އުފައްދަވާ ޕާޓީއެކެވެ. އެހެން ނަމަވެސް އެޕާޓީގެ ޓިކެޓްގައި ކުރިއަށް އޮތް ރިޔާސީ އިންތިހާބުގައި ނަޝީދު ވާދަކުރައްވާނެ ކަމެއް ނުވަތަ ނޫންކަމެއް އަދި ނޭނގެ އެވެ.
