މި ފަހަރުގެ ސާފް ބަންގުބަންދު ޗެމްޕިއަންޝިޕްގައި ފެންނަނީ ވަރަށް ފެންވަރު ދަށް ރެފްރީން ކަމަށާއި މި ގޮތަށް މި ކަންތައްތައް ދާނަމަ މި މުބާރާތުގެ ފެންވަރު ވެސް ދަށްވާނެ ކަމަށް އިންޑިއާގެ އެސިސްޓަންޓް ކޯޗު މަހޭޝް ގޯލީ ބުނެފި އެވެ.
ގްރޫޕް އޭގެ ފަހު މެޗުގައި ރޭ ފަހު ވަގުުތު ކުވެއިތުން އިންޑިއާ ކޮޅަށް ގޯލު ޖަހައި، 1-1 އިން ވަނީ އެއްވަރުކޮށްފަ އެވެ. މި ނަތީޖާއާ އެކު، ކުވެއިތަށް ގްރޫޕްގެ އެއް ވަނަ ލިބުނުއިރު، އިންޑިއާ ސެމީގައި ކުޅޭނީ އެ ގްރޫޕްގެ ދެ ވަނަ ޓީމުގެ ގޮތުގަ އެވެ.
އިންޑިއާގެ ކޯޗު، ކްރޮއޭޝިއާގެ އީގޯ ސްޓިމަކް، އެ ޓީމަށް އިރުޝާދުދޭން ރޭގެ މެޗަށް ބެންޗަށް އައީ ސަސްޕެންޝަަނަކަށް ފަހު އެވެ. އެއީ މި ފަހަރުގެ މުބާރާތުގައި އިންޑިއާ އިން ޕާކިސްތާނާ ކުޅުނު މެޗުގައި ސްޓިމަކަށް ދެއްކި ރަތް ކާޑުގެ ސަބަބުންނެވެ. ސަސްޕެންޝަނަށް ފަހު، ސްޓިމަކް ރޭގެ މެޗަށް އެނބުރިި އައިިއިރު، އޭނާ އަށް ރޭގެ މެޗުގައި ވަނީ ދެ ރީނދޫ ކާޑަށް ފަހު ރަތް ކާޑެއް ދައްކައިފަ އެވެ. އެއާ އެކު ސްޓިމަކް މި ވަނީ ސެމީ ފައިނަލް މެޗަށް ސަސްޕެންޑްވެފަ އެވެ.
ރޭގެ މެޗުގެ ރެފްރީ އަކަށް ހުރި ބަންގްލަދޭޝްގެ އަލަމްގިރް ވަނީ އިންޑިއާގެ ރަހީމް އަލީ އާއި ކުވެއިތުގެ ހަމަދް އަލް ގަލަފް އަށް ވެސް ރަތް ކާޑެއް ދައްކައިފަ އެވެ. މެޗުގައި ހަަމަނުޖެހުމަކަށް މަގުފަހިވާ ފަދަ ގިނަ ކަންތައްތަކެއް ހިނގައިދިޔައިރު، ރެފްރީ އަލަމްގިރް، އަތުން މެޗުގެ ކޮންޓްރޯލް ގޮސްފައިވާ ކަމަށް މެޗަށް ފަހު އޮތް ނޫސްވެރިންގެ ބައްދަލުވުމުގައި ގޯލީ ވަނީ ބުނެފަ އެވެ.
ރޭގެ އިންޑިއާ އާއި ކުވެއިތު ބައްދަލުކުރި މެޗުގެ ތެރެއިން ދެ ޓީމުގެ މެދުގައި ހިނގި ހަމަނުޖެހުމެއް ހުއްޓުވަން ރެފްރީން މަސައްކަތް ކުރަނީ.--- ފޮޓޯ: އަބްދުﷲ އިޔާން/ އަދަދު
"ވަރަށް ދަށް ރެފްރީކަން ކުރުމެއް މި ފެނިގެންދިޔައީ. މިހެން މި މުބާރާތުގެ ރެފްރީންގެ ކަންކަން ހުންނަންޏާ ސާފުން އެބަޖެހޭ ވަރަށް ވިސްނަން. އެއީ މި ދަށްވަނީ މުބާރާތުގެ ފެންވަރު،" ގޯލީ ބުންޏެވެ.
އޭނާ ބުނީ މެޗަށް ނުކުތްއިރު ވެސް ކުވެއިތުގެ ކުޅުންތެރިން ވަނީ އިންޑިއާ ކޯޗު ސްޓިމަކް، ރުޅިއަރުވަން އޭނާ އަށް ޓާގެޓްކޮށްފައި ކަމަށާއި އެ ފަދަ ގޮތަކަށް ކުވެއިތުގެ އަމަލުތައް ހުއްޓައި، ސްޓިމަކަށް ދެއްކި ދެ ކާޑަކީ ވެސް ނާއިންސާފުން ކުރި ކަމެއް ކަމަށެވެ. އަދި މެޗުގައި ހިނގައިދިޔަ ބައެއް ކަންތައްތައްކުގައި ރެފްރީ އަލަމްގިރް ކަންތައްތައް ނިންމާފައި ހުރީ އެއްވެސް ވަރަކަށް ހާލަތަކަށް ބެލުމެއް ނެތި ކަމަށް ވެސް ގޯލީ ވަނީ ފާހަގަކޮށްފަ އެވެ.
"މިސާލަކަށް ބަލަމާ ސަންދޭޝް (އިންޑިއާގެ ޑިފެންޑަރު) ފުރަތަމަ ޖެހި ޓެކަލް، އެއީ ފުރަތަމަ ޓެކަލް ބޯޅައިގައި ޖެހިފައި ދެން އެ އައި ކޮންޓެކްޓެއް އިނީ، އެކަމަކު، ފުރަތަމަ ހާލަތުގައި ވެސް ރެފްރީ ދެއްކީ ރީނދޫ ކާޑު. ރެފްރީ އަތުން މެޗެއްގެ ކޮންޓްރޯލް ގެއްލިއްޖިއްޔާ، ދެ ޓީމަށް ވާނެ ގޮތް މި މެޗުގައި ފެނިގެންދިޔައީ،" ގޯލީ ބުންޏެވެ.
ކުވެއިތުގެ ކޯޗު ޕޯޗުގަލްގެ ރުއީ ބެންޓޯ ބުނީ އޭނާ އަކީ އެއްވެސް އިރެއްގައި މެޗެއްގެ ރެފްރީންނަށް ފާޑުކިޔާ މީހެއް ނޫން ކަމަށެވެ. އެކަމަކު، މި މެޗުގައި ހިނގައިދިޔަ ކަންތައްތަކަށް ބަލާއިރު، މި މުބާރާތުގެ ރެފްރީން އެސަސްކުރުމުގެ ޒިންމާއާ ހަވާލުވެ ތިބި ފަރާތްތަކުން ކުރަން ޖެހޭ މުހިންމު ކަންތައްތަކެއް އޮތްކަން ފާހަގަކުރެވޭ ކަމަށް ބެންޓޯ ވަނީ ބުނެފަ އެވެ.
"ރެފްރީން އެނަލައިޒްކުރުމަކީ އަހަރެންގެ ވަޒީފާއެއް ނޫން. އެއީ ރެފްރީން އެސަސް ކުރާ މީހުން ނޫނީ މުބާރާތުގެ ހިންގާ ފަރާތުގެ ޒިންމާއެއް،" ބެންޓޯ ބުންޏެވެ.
ބެންޓޯ ބުނީ މެޗުގެ ކަންކަން ދިޔަ ގޮތަށް ބަލާއިރު ނަތީޖާ އިންސާފުވެރި ކަމަށެވެ.
