ރިޔާދް (ޖޫން 27) - ޗެލްސީ އަށް ކުޅެމުންދިޔަ ސެނަގާލްގެ ޑިފެންޑަރު ކަލީދޫ ކުލިބާލީ އެ ކްލަބު ދޫކޮށް ސައުދީ އަރަބިއްޔާގެ އަލް ހިލާލަށް ބަދަލުވެއްޖެ އެވެ.
ސެނަގާލްގެ ގައުމީ ޓީމުގެ ކެޕްޓަން, ކުލިބާލީ އިޓާލީގެ ނަޕޯލީ ދޫކޮށް 42 މިލިއަން ޑޮލަރުގެ ޓްރާންސްފާ ފީއަކަށް ޗެލްސީ އަށް ބަދަލުވީ މިދިޔަ އަހަރެވެ. އެކަމަކު ކުލިބާލީ ،32، އަށް މިދިޔަ ސީޒަން ދިޔައީ އުންމީދުކުރި ގޮތަކަށް ނޫނެވެ. ޗެލްސީން މިދިޔަ ސީޒަން ނިންމާލީ 12 ވަނައިގަ އެވެ.
"މި ކްލަބުގައި ކުލިބާލީ ހޭދަކުރި ދުވަސްތަކުގައި އޭނާ ކޮށްދިން ހިދުމަތަށް ޝުކުރު އަދާކުރަން،" ޗެލްސީން ނެރުނު ބަޔާނުގައި ބުނެފައިވެ އެވެ.
ވުލްސްގެ ކެޕްޓަން ރުބެން ނެވޭސް ވެސް ވަނީ އެ ކްލަބު ދޫކޮށް، ސައުދީ އަރަބިއްޔާގެ އަލް ހިލާލަށް ބަދަލުވެފަ އެވެ. ޕޯޗުގަލްގެ ގައުމީ ޓީމަށް ވެސް ކުޅެމުންދާ ނެވޭސް، 26، އަލް ހިލާލަށް ދޫކޮށްލަން ވުލްވްސް އިން އެއްބަސްވީ އެ ކްލަބުގެ ރެކޯޑް ޓްރާންސްފާ ފީއެއް ކަމަށްވާ 55 މިލިއަން ޑޮލަރު އަށް ކަމަށް ރިޕޯޓްތައް ބުނެ އެވެ.
ސައުދީގެ ސޮވެރިން ފަންޑުން ދޭ ބަޖެޓާ އެކު، ސައުދީ ޕްރޯ ލީގުގެ ބޮޑެތި ކްލަބުތަކުން ދަނީ ޔޫރަޕްގެ މަޝްހޫރު ތަރިންތަކެއް އެ ކްލަބުތަކަށް ގެންނަމުންނެވެ.
މީގެ ކުރިން ރެއާލް މެޑްރިޑްގެ ކަރީމް ބެންޒެމާ އާއި ޗެލްސީގެ އެންގޯލޯ ކާންޓޭ ވަނީ އަލް އިއްތިހާދަށް ބަދަލުވެފަ އެވެ. މީގެ އިތުރުން، ޖެނުއަރީ މަހުން ފެށިގެން ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ވެސް ވަނީ ކުޅެމުންދަނީ ސައުދީގެ އަލް ނަސްރު އަށެވެ.
ޔޫރަޕްގެ ލީގުގައިތަކުގައި ކުޅޭ ނަން މަޝްހޫރު ގިނަ ކުޅުންތެރިންތަކަކަށް ސައުދީގެ ކްލަބުތަކުން ދަނީ ފާރަލަމުންނެވެ. އެހެންކަމުން، މި ޓްރާންސްފާގައި ނަން މަޝްހޫރު އިތުރު ކުޅުންތެރިންތަކެއް ސައުދީ ޕްރޯ ލީގަށް ބަދަލުވުމުގެ ފުރުސަތު ބޮޑެވެ.
