ޕީޕީއެމް/ޕީއެންސީން އަލަށް އުފައްދަމުން އަންނަ ދަ ޑިމޮކްރެޓްސްއާ ގުޅިގެން މަސައްކަތް ކުރަމުންދަނީ ޕީޕީއެމްގެ ރިޔާސީ ކެންޑިޑޭޓު، ރައީސް އަބްދުﷲ ޔާމީންގެ އިރުޝާދުގެ ދަށުން ކަމަށް ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެމްބަރު އަހުމަދު ޝިޔާމް މިއަދު ވިދާޅުވެއްޖެ އެވެ.
ޕީޕީއެމްގެ އޮފީހުގައި މިއަދު ޕީޕީއެމް/ޕީއެންސީއާއި ޑިމޮކްރެޓްސްއިން ކުރި މަޝްވަރާތަކަށްފަހު ބޭއްވި ނޫސްވެރިންގެ ބައްދަލުވުމުގައި ކުރިމަތިވި ސުވާލަކަށް ޖަވާބުދެއްވަމުން ޝިޔާމް ވިދާޅުވީ، ރައީސް ޔާމީން ޖަލުގައި ހުންނެވި ނަމަވެސް، ޑިމޮކްރެޓްސްއާއެކު ކުރިއަށްދިޔުމާ ގުޅޭގޮތުން އެމަނިކުފާނު ވަރަށް ސާފުކޮށް އިރުޝާދު ދެއްވަމުންދާ ކަމަށެވެ.
ޝިޔާމް ވިދާޅުވީ، އެމަނިކުފާނުގެ އިރުޝާދާއެކު ނޫނީ ޕީޕީއެމް/ޕީއެންސީން "ފިޔަވަޅެއް ވެސް ނާޅާނެ" ކަމަށެވެ.
"އެނގިވަޑައިގަންނަވާނެ މިއަދު ރައީސް ޔާމީން ޖަލުގައި އެ ހުންނެވީ. ހަމަ ވަރަށް ރަނގަޅަށް މިކަމުގެ އިންސްޓްރަކްޝަން ދެއްވާ. ވަރަށް ރަނގަޅަށް ހަމަ ޑިމޮކްރެޓްސްއާއެކީގައި މިކަންތައްތައް ކުރިއަށްގެންދިޔުމުގައި، ރައީސް ޔާމީންގެ އިންސްޓްރަކްޝަންއާއެކީގައި ނޫނީ ޕީޕީއެމް/ޕީއެންސީ ފިޔަވަޅެއް ވެސް ނާޅާނެ،" ޝިޔާމް ވިދާޅުވި އެވެ.
އެކުގައި މަސައްކަތް ކުރި ނަމަވެސް، ހިޔާލު ތަފާތު ކަންކަން އެބަ ހުރި ކަމަށް ވެސް ޝިޔާމް މިއަދު ވިދާޅުވި އެވެ. އެކަމަކު، ހިޔާލު އެއްގޮތް ވަނީ މިހާރުގެ ސަރުކާރު ކަމުނުދާ ކަމާއި ސަރުކާރު ބަދަލުކުރަން ޖެހޭ ކަމާ މެދު ކަމަށް ވިދާޅުވި އެވެ.
ޝިޔާމް ވިދާޅުވީ، އޭނާ ދެކެވަޑައިގަންނަވާ ގޮތުގައި ރައީސް މުހައްމަދު ނަޝީދު މަސައްކަތް ކުރައްވަމުން ގެންދެވީ އެމްޑީޕީއާއި ސަރުކާރުގެ ތެރޭގެ ކަންކަން ރަނގަޅު ކުރުމަށް ކަމަށެވެ. އެކަމަކު، އެމަނިކުފާނު މިހާރު ޕީޕީއެމް/ޕީއެންސީއާއެކު މަސައްކަތް ކުރައްވަނީ ވަރަށް މަސައްކަތް ކުރައްވައިގެން ވެސް ސަރުކާރުގެ ކަންކަން ރަނގަޅު ނުކުރެވުމުން ކަމަށް ވިދާޅުވި އެވެ.
"ރަނގަޅު ނުކުރެވުނީމަތާ، ވަރަށް މަސައްކަތް ކުރައްވައިގެން ރަނގަޅު ނުކުރެއްވިގެން މިއަދު އަޅުގަނޑުމެން އެއްކޮށް މިތިބީ ޔަގީނުން ވެސް،" ޝިޔާމް ވިދާޅުވި އެވެ.
އަލަށް އުފައްދާ ދި ޑިމޮކްރެޓްސްގެ އިސް ބޭފުޅުން، ޕީޕީއެމް/ޕީއެންސީގެ ބޭފުޅުންނާ މިއަދު ބައްދަލުކުރައްވަނީ. ފޮޓޯ:ޕީޕީއެމް
ނޫސްވެރިންގެ ބައްދަލުވުމުގައި ޑިމޮކްރެޓްސްގެ ފަރާތުން ބައިވެރިވެވަޑައިގެންނެވި މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވި ގޮތުގައި ދެ ފަރާތުގެ މެދުގައި ހިޔާލު އެއްގޮތް ކަމަކީ، ރައީސް އިބްރާހިމް މުހައްމަދު ސޯލިހުގެ ސަރުކާރު ބަދަލުކުރަން ޖެހޭކަން ކަމަށެވެ. ހުދުމުހުތާރު ވެރިކަމަކަށް ވާން ފެށުމުން ދެން ތިބި އެންމެނަށް ވެސް އެކަން މައްސަލައަކަށްވެ، އެކުގައި މަސައްކަތް ކުރާނެ ކަމަށް ވެސް އޭނާ ވިދާޅުވި އެވެ.
"ސަރުކާރު ބަދަލުކުރަން ކުރަން ޖެހުނު ހުރިހާ ކަމެއް އަޅުގަނޑުމެން ކުރާނެ ހަމަ އެކުއެކީގައި. އެހެންވީމާ ކޮންމެ ކަމެއް ވެސް އެއީ ހަމަ ޕޮސިބަލް ކަންކަން އިނގޭތޯ،" އާޒިމް ވިދާޅުވި އެވެ.
ނޫސްވެރިންގެ ސުވާލުތަކަށް ޖަވާބު ދެއްވަމުން އާޒިމް ވިދާޅުވީ، އެމްއެމްޕީއާރްސީގެ ކޮރަޕްޝަންގެ މައްސަލައިގައި ޖަލަށްލާފައިވާ ރައީސް ޔާމީން ޖަލުން މިނިވަން ކުރުމަށް ވެސް ޑިމޮކްރެޓްސްއިން މަސައްކަތް ކުރާނެ އެވެ.
އިންޑިއާ އައުޓް ހަރަކާތުގައި ބައިވެރިވާތަން ފެނިދާނެތޯ ނޫސްވެރިއަކު ސުވާލު ކުރުމުން އާޒިމް ވިދާޅުވީ، ޑިމޮކްރެޓްސްގެ ފިކުރާ އެއްގޮތަށް ޕީޕީއެމް/ޕީއެންސީ، އެއް ދުވަހުގެ ތެރޭގައި މުޅިން ބަދަލުވެގެން ނުދާނެ ކަމަށާއި އެކަންތަައްްތަކަށް ވަގުތު ނަގާނެ ކަމަށެވެ. އަދި އެފަދަ ކަންކަމާ ގަބޫލުވާން ވެސް ޖެހޭނެ ކަމަށް ވިދާޅުވި އެވެ.
