މިއާމީ (ޖޫން 24) - ބާސެލޯނާގެ ކެޕްޓަން، މިޑްފީލްޑަރު ސާޖިއޯ ބުސްކެޓްސް އެމެރިކާގެ އިންޓަ މިއާމީ އަށް ސޮއިކުރަން ނިންމާފައިވާ ކަމަށް އެ ކްލަބުން ބުނެފި އެވެ.
ބުސްކެޓްސް ،34، އިންޓަ މިއާމީ އަށް ބަދަލުވާން ނިންމިއިރު، އޭނާއާ އެކު ބާސެލޯނާ އަށް ގިނަ އަހަރުތަކެއްގައި ކުޅުނު އާޖެންޓީނާގެ ތަރި ލިއޮނެލް މެސީ ވަނީ މީގެ ކުރިން އިންޓަ މިއާމީ އަށް ބަދަލުވެފަ އެވެ.
ބުސްކެޓްސް ބާސެލޯނާއާ ވަކިވީ މިދިޔަ ސީޒަނަށް ފަހު އެވެ. އޭނާ ވަނީ ސްޕެއިންގެ ގައުމީ ޓީމުން ވެސް މިދިޔަ އަހަރު ޑިސެމްބަރު މަހު ރިޓަޔާކޮށްފަ އެވެ.
ޕެޕް ގާޑިއޯލާގެ ކޯޗުކަމުގެ ދަށުން ބާސެލޯނާ ސީނިއާ ޓީމުން 2008 ވަނަ އަހަރު ޖާގަ ހޯދި ބުސްކެޓްސް ވަނީ ބާސެލޯނާ އަށް 700 އަށް ވުރެ ގިނަ މެޗު ކުޅެދީފަ އެވެ. ފާއިތުވި އަހަރުތަކުގައި ބުސްކެޓްސް އަކީ ބާސެލޯނާގެ އެންމެ މުހިންމު އެއް ކުޅުންތެރިޔާ އެވެ. ލީޑަރެއްގެ ރޯލުގައި ފެނިގެންދިޔައީ ބުސްކެޓްސް އެވެ.
އިންގްލެންޑްގެ ކުރީގެ ކެޕްޓަން ޑޭވިޑް ބެކަމްގެ ހިއްސާ އޮންނަ އިންޓަ މިއާމީ އިން ކުރިން ބުނީ މެސީއާ އެކު ކުޅުމަށް، ޓީމަށް ރަނގަޅު "ތިނެއް ނޫނީ ފަސް ވަރަކަށް ކުޅުންތެރިން" ގެންނަން އެ ކްލަބުން މަސައްކަތްކުރަމުންދާ ކަމަށެވެ.
