ކިޔެވް، ޔޫކްރެއިން (ޖޫން 23) - ރަޝިއާއިން ހިފި ނިޔުކްލިއާ ޕްލާންޓެއްގައި ރޭޑިއޭޝަން ލީކުކުރަން އުޅޭ ކަމަށް ޔޫކްރެއިންގެ ރައީސް ވޮލޮޑިމިރް ޒެލެންސްކީ ކުރެއްވި ތުހުމަތާ ގުޅިގެން ރައްޔިތުން ހާސް ނުވުމަށް ޔޫކްރެއިންގެ ސަރުކާރުން ގޮވާލައިފި އެވެ.
ޔޫރަޕްގެ އެންމެ ބޮޑު ނިޔުކްލިއާ ޕްލާންޓް، ޒަޕޮރިއްޒިޒިއާ ކޮންޓްރޯލް ކުރާ ރަޝިއާގެ ފައުޖުން ރޭޑިއޭޝަން ލީކުކޮށް "ޓެރަރިސްޓު ހަމަލާއެއް" ރާވަމުންދާ ކަމަށް މި ހަފުތާގައި ޒެލެންސްކީ ތުހުމަތު ކުރެއްވި އެވެ.
ރަޝިއާއިން އެ ތުހުމަތު ދޮގުކުރި އެވެ. އެކަމަކު ޔޫކްރެއިންގެ ރައްޔިތުންގެ މެދުގައި ނުތަނަވަސްކަން އުފެދި ރޭޑިއޭޝަނުން ރައްކާތެރިވާން ބޭނުންކުރާ އަޔޮޑިންއަށް އޮންނާ ޑިމާންޑު ވަނީ ވަރަށް ބޮޑަށް އުފުލިފަ އެވެ.
ޔޫކްރެއިންގެ ހެލތު މިނިސްޓްރީން އާއްމުންނަށް ގޮވާލީ ހާސް ނުވުމަށެވެ. އަދި އަޔޮޑިން ފަދަ ތަކެތި ގަނެ ރައްކާކޮށްފައި ނުބެހެއްޓުމަށް ވެސް އެދުނެވެ. އޭގެ އިތުރުން ރައްކާތެރިކަމާ އެކު ބޭނުންކުރަން ޖެހޭ ގޮތަށް އަޔޮޑިން ބޭނުން ނުކުރެވިއްޖެ ނަމަ ފުރާނައަށް ނުރައްކާވެދާނެ ކަމަށް ވެސް ބުންޏެވެ.
ނިޔުކްލިއާ ޕްލާންޓުން ރޭޑިއޭޝަން ލީކުވެއްޖެ ނަމަ ވައި ތަގައްޔަރުވެ ތައިރޮއިޑް ކެންސަރު ފަދަ ކަންކަމަށް މަގުފަހިވާނެ އެވެ. މީގެ ކުރިން 1986 ވަނަ އަހަރު ޗެރްނޮބީލްގެ ނިޔުކްލިއާ ކާރިސާގައި ވެސް ކަންތައް ދިމާވީ އެގޮތަށެވެ.
އަޔޮޑިން ޓެބްލެޓްގެ އެހީގައި ހަށިގަނޑުގެ ތައިރޮއިޑް ގްލޭންޑުގައި ރޭޑިއޯއެކްޓިވް ތަކެތި ޖަމާވުން ހުއްޓުވައި، ގުދުރަތީ ގޮތުން އެ ތަކެތި ހަށިގަނޑުން ބޭރުކުރެވޭނެ އެވެ.
