ހދ. މަކުނުދޫގައި އެއާޕޯޓެއް އަޅަން ބޭނުންވާ ބިން ހިއްކުމާއި އެ ރަށުގެ ގޮނޑުދޮށް ހިމާޔަތް ކުރަން 246 މިލިއަން ރުފިޔާގެ ދެ ޕްރޮޖެކްޓެއް ބިގް ފިޝް މޯލްޑިވްސް ޕްރައިވެޓް ލިމިޓެޑާ ހަވާލުކޮށްފި އެވެ.
ޕްލޭނިން މިނިސްޓްރީން ސޯޝަލް މީޑިއާގައި އާންމުކޮށްފައިވާ ލިޔުމެއްގައި ބުނެފައި ވަނީ ބިން ހިއްކުމާއި ގޮނޑުދޮށް ހިމާޔަތް ކުރުމުގެ ޕްރޮޖެކްޓު ބިގް ފިޝްއާ ހަވާލު ކުރީ ޖުމްލަ 366 ދުވަހުގެ ތެރޭގައި ނިންމާ ގޮތަށް ކަމަށެވެ.
ސަރުކާރުން ބުނީ އެ ދެ ޕްރޮޖެކްޓަށް ހަރަދުވަނީ ޖުމްލަ 16،000،000 މިލިއަން ޑޮލަރު ނުވަތަ 246،720،000 މިލިއަން ރުފިޔާ ކަމަށެވެ. ނަމަވެސް އެ ދެ ޕްރޮޖެކްޓަށް ވަކިވަކިން ހޭދަވާ ފައިސާގެ އަދަދު ޕްލޭނިން މިނިސްޓްރީއަކުން ނުބުނެ އެވެ.
ބިގް ފިޝްއަކީ މަހުގެ ވިޔަފާރި ކުރުމަށް ރާއްޖޭގައި މަޝްހޫރު ކުންފުންޏެކެވެ. ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަސައްކަތް މީގެ ކުރިން ކޮށްފައިވާކަން އެ ކުންފުނީގެ ވެބްސައިޓުން އެނގޭކަށް ނެތެވެ.
ބިގް ފިޝްގެ ރަސްމީ ފޭސްބުކް ޕޭޖުގައި ބުނެފައި ވަނީ އެ ކުންފުންޏަކީ ރާއްޖެއިން ބާނާ ކަންނެލި ޕްރޮސެސް ކުރުމަށްފަހު ބޭރަށް އެކްސްޕޯޓް ކުރަން ހާއްސަ ބަޔެއް ކަމަށެވެ. އެ ކުންފުންޏަށް ސަރުކާރުން ދޫކޮށްފައިވާ ބިޒްނަސް އެކްޓިވިޓީ ރެޖިސްޓްރޭޝަންގެ ތެރޭގައި ހިމެނެނީ މަހުގެ ވިޔަފާރިއަކާ ގުޅޭ ހުއްދައެކެވެ.
އޭގެ އިތުރުން، ބ. އޭދަފުށީގެ ބަނދަރު ހެދުމަށާއި ށ. ނޫމަރާ ބަނދަރު އަޕްގްރޭޑް ކުރުމަށާއި ގއ. ގެމަނަފުށީ މަގުތަކުގައި ތާރަ އަޅަން ވެސް މިއަދު ވަނީ ހަވާލުކޮށްފަ އެވެ. އޭދަފުށީ ބަނދަރު ހަދަން 69.8 މިލިއަން ރުފިޔާއަށް އަދި ނޫމަރާ ބަނދަރު އަޕްގްރޭޑް ކުރަން 57.6 މިލިއަން ރުފިޔާއަށް ހަވާލު ކުރީ އެމްޓީސީސީއާ އެވެ. ގެމަނަފުށީ މަގުތަކުގައި ތާރުއަޅަން ހަވާލު ކުރީ އާރްޑީސީއަށް 76.1 މިލިއަން ރުފިޔާއަށެވެ.
