ސާފް ޗެމްޕިއަންޝިޕް ފުޓްބޯޅަ މުބާރާތުގައި އިއްޔެ އިންޑިއާ އިން 4-0 އިން ޕާކިސްތާން ބަލިކުރި މެޗުގެ ފުރަތަަމަ ހާފުގައި އިންޑިއާގެ ކޯޗު، ކްރޮއޭޝިއާގެ އީގޯ ސްޓިމަކް، ހަމަނުޖެހުމެއް ހިނގަން މަގުފަހިވާ ކަމެއް ކޮށްފައިވާތީ އޭނާ އަށް ރަތް ކާޑެއް ދެއްކި ކަމުގައި ވިޔަސް އެކަމާ ކަންބޮޑުނުވާ ކަމަށް ބުނެފި އެވެ.
މެޗުގެ ފުރަތަމަ ހާފުގެ ފަހު މިނިޓްގައި ޕާކިސްތާނަށް ލިބުނު އެއްލުމެއްގައި އިންޑިއާގެ ކޯޗު ސްޓިމަކް ބޯޅަ ހިފެހެއްޓުމާ ގުޅިގެން، އެ ވަގުތު އެ ތަނަށް ދެ ޓީމުގެ ކުޅުންތެރިންނާއި އޮފިޝަލުން ތޮންޖެހިފައި އޮތެވެ. ދެ ޓީމުގެ ކުޅުންތެރިންގެ މެދުގައި ހަމަނުޖެހުމެއް ނުހިނގައި، މައްސަލަ ހައްލުކުރެވުނުއިރު، އިންޑިއާގެ ކޯޗު ސްޓިމަކް އަށް ރަތް ކާޑެއް ދެއްކި އެވެ. އަދި އިންޑިއާގެ ޑިފެންޑަރު ސަންދޭޝް ޖިންގަން އާއި ޕާކިސްތާންގެ ރާހިސް ނަބީ އަށް ވަނީ ރީނދޫ ކާޑެއް ދައްކައިފަ އެވެ.
ރަތް ކާޑުގެ ސަބަބުން ރޭގެ މެޗަށް ފަހު އޮތް ނޫސްވެރިންގެ ބައްދަލުވުމަށް ސްޓިމަކް ވަނީ ސަސްޕެންޑްވެފަ އެވެ. އެހެންވެ، ސްޓިމަކްގެ ބަދަލުގައި ނޫސްވެރިންގެ ބައްދަލުވުމުގައި ބައިވެރިވީ އެސިސްޓަންޓް ކޯޗު މަހޭޝް ގޯލީ އެވެ.
މަހޭޝް ވަނީ ހަމައެކަނި ރަތް ކާޑެއް ދެއްކީ ސްޓިމަކަށް ކަމަށްވާތީ، އެއީ އެންމެ ރަނގަޅު ނިންމުމެއް ނޫން ކަމަށެވެ. ޕާކިސްތާން އޮފިޝަލުން ވެސް ހަމަނުޖެހުމެއް ހިނގާ ފަދަ ކަންތައްތަކެއް ކުރި ކަމަށް ގޯލީ ވަނީ ބުނެފަ އެވެ.
ހިނގާދިޔަ ކަންތައްތަކާ ބެހޭގޮތުން ސްޓިމަކް ވަނީ ޓްވިޓާގައި އޭނާގެ ޝުއޫރުފާޅުކޮށްފަ އެވެ.
އެ ގޮތުން އިންޑިއާ އާއި ކްރޮއޭޝިއާގެ ދިދައާ އެކު، ސްޓިމަކް ކުރި ޓްވީޓުގައި ބުނެފައިވަނީ ފުޓްބޯޅަ އަކީ ވަރަށް ބޮޑަށް ޖަޒުބާތާ ގުޅިފައިވާ ކަމެއް ކަމަށާއި އަމިއްލަ ޓީމުގެ ދިފާއުގައި ކަންކަން، ކުރާއިރު އެކި ކަންތައްތައް މެޗުގެ ތެރެއިން ހިނގާނެ ކަމަށެވެ.
"އަހަރެންގެ ހަރަކާތްތައް ހުރި ގޮތުން އަހަރެން ދެކެ ލޯބި ވިޔަސް ހިތްހަމަނުޖެހުނަސް ފަރުވާލެއް ނެތް. އަހަންނަކީ ވޯރިއާ އެއް، ނާއިންސާފުން އަންނަ ނިންމުންތަކާ ދެކޮޅަށް އަހަރެން އިއްޔެ ކުރި ކަންތައް ކުރަން ޖެހިއްޖިއްޔާ އަދިވެސް ތަކުރާރުކުރާނަން،" ސްޓިމަކް ބުންޏެވެ.
ސްޓިމަކް އަކީ މީގެ ކުރިން ވެސް އިންޑިއާގެ ގިނަ މެޗުތަކުގައި ރެފްރީންގެ ނިންމުންތަކަށް ފާޑުކިޔައިގެން އަދަބު ލިބިފައިވާ ކޯޗެކެވެ. އަދި ނޫސްވެރިންގެ ބައްދަލުވުންތަކުގައި ވެސް ރެފްރީންނާ ގުޅޭގޮތުން ސްޓިމަކް ވަނީ މީގެ ކުރިން ވެސް ގިނަ ފަހަރުތަކެއް މަތިން ވާހަކަ ދައްކައިފަ އެވެ.
އިންޑިއާ ކުޅޭ ދެ ވަނަ މެޗުގައި އަންނަ ހޮނިހިރު ދުވަހު ބައްދަލުކުރާނީ ނޭޕާލާ އެވެ. ނޭޕާލް ވަނީ ފުރަތަމަ މެޗުން ކުވެއިތު އަތުން އިއްޔެ ހަވީރު 3-1 އިން ބަލިވެފަ އެވެ.
