ރައްޔިތުންގެ މަޖިލީހުގެ ރިޔާސަތާ ބަލަހައްޓަވަން އުޒުރުވެރިވެވަޑައިގެން ތިން ޖަލްސާގެ ރިޔާސަތާ ދުރުގައި ހުންނެވުމަށްފަހު އެ މަޖިލީހުގެ ރިޔާސަތާ ރައީސް މުހައްމަދު ނަޝީދު މިއަދު ހަވާލުވެވަޑައިގަނެފި އެވެ.
މިއަދުގެ ޖަލްސާ ފެއްޓެވުމަށް ފަހު އެޖެންޑާ އިއުލާނުކުރެއްވުމުގެ ކުރިން ނަޝީދު ވިދާޅުވީ މަޖިލިސް ހުއްޓިފައި އޮތުމަކީ ރާއްޖޭގެ ގިނަ ރައްޔިތުންގެ ކަންބޮޑުވުން އޮތް ކަމެއް ކަމަށެވެ. އެހެން ނަމަވެސް މަޖިލިސް ހުއްޓިފައި އޮތް އޮތުމަކީ އެމަނިކުފާނާއި މަޖިލީހުގެ ނައިބުރައީސް އީވާ އަބްދުﷲގެ އިތުބާރު ނެތް މައްސަލަ އެއް ފަހަރާ ހުށަހެޅުމުން ވީ ގޮތެއް ކަމަށް ވިދާޅުވާ ވިދާޅުވުން ތަކުރާތުކުރެއްވި އެވެ.
"އަޅުގަނޑު މިއަދު މިތަނުގައި ރިޔާސަތު ބަލަހައްޓަން މިއިނީ އަޅުގަނޑު ދެކޭ ގޮތުގައި އަޅުގަނޑުގެ އުޒުރުތަކަށް ވުރެން އަދި މާ މަތީ މަސްލަހަތެއް އަޅުގަނޑު އެބަ ހިފަހައްޓާން ޖެހޭ. އެއީ ދިވެހި ރައްޔިތުންގެ މަސްލަހަތު،" ނަޝީދު ވިދާޅުވި އެވެ.
އެމަނިކުފާނު ވިދާޅުވީ މަޖިލިސް ހުއްޓިފައި އޮތުމަކީ ރާއްޖޭގެ ރައްޔިތުންގެ މަސްލަހަތު ހިފެހެއްޓޭނެ ގޮތެއް ނޫނެވެ. މަޖިލީހަށް ދިމާވެފައި އޮތް މައްސަލަ ހައްލުކުރަން ދައުލަތުގެ އެހެން ބާރުތަކުން އެހީތެރިވެފައި ނުވާތީ ހިތާމަކުރާ ކަަމަށް ވެސް އެމަނިކުފާނު ވިދާޅުވި އެވެ. ދައުލަތުގެ އެހެން ބާރުތައް ކަމަށް އެމަނިކުފާނު އެ ވިދާޅުވީ ސަރުކާރާއި ޝަރުއީ ނިޒާމެވެ.
"އަދި ހާއްސަ ގޮތެއްގައި މިތަނުގެ މެޖޯރިޓީ ޕާޓީ މި މައްސަލަ ހައްލުކޮށްދިނުމުގައި އެއް ގޮތަކަށް ވެސް އެހީތެރިވެވަޑައިގެންފައި ނުވާ ކަމަށް [އަޅުގަނޑު ފާހަގަކުރަން]،" ނަޝީދު ވިދާޅުވި އެވެ.
ރައްޔިތުންގެ މަޖިލީހުގެ ރިޔާސަތު ބެލެހެއްޓެވުމަށް އުޒުރުވެރިވެވަޑައިގަތުމަށްފަހު މަޖިލީހުގެ ގަވާއިދުގެ 44 ވަނަ މާއްދާގައިވާ ގޮތުގެ މަތިން ރިޔާސަތު ބަލަހައްޓަން ނަޝީދު ހަވާލު ކުރެއްވީ ވިލުފުށީ ދާއިރާގެ މެމްބަރު ހަސަން އަފީފަށެވެ. އެކަމަކު، އެގޮތަށް ކަނޑައަޅާ މެމްބަރަކަށް ރިޔާސަތު ބެލެހެއްޓޭނީ ވިދިވިދިގެން ތިން ޖަލްސާގައި ކަމަށް ގަވާއިދުގައި ބުނެފައި އޮވެ އެވެ. އަފީފު ވަނީ އޭގެ ފަހުން ތިން ޖަލްސާގެ ރިޔާސަތު ބަލަހައްޓަވައިފަ އެވެ.
އެހެންކަމުން ރިޔާސަތާ ހަވާލުވާނެ މެމްބަރަކު ނެތުމުން މިދިޔަ ހޯމަ ދުވަހު ރައްޔިތުންގެ މަޖިލީހުގެ ޖަލްސާއެއް ބޭއްވުމަށްފަހު ވިދިވިދިގެން ދެ ދުވަހު ޖަލްސާއެއް ނުބާއްވަ އެވެ. ރައްޔިތުންގެ މަޖިލީހުގެ މިއަދު ޖަލްސާ ފަށައިގެން މިހާރު ކުރިއަށްދާއިރު ގަވާއިދުގައި ބުނާ ގޮތުން މިއަދު ޗުއްޓީއަށް ދިޔުމުގެ ކުރިން ބައެއް މުހިންމު ކަންކަން ފާސް ކުރަން އެމްޑީޕީން އޮތީ ހުށަހަޅައިފަ އެވެ.
