ސާފް ޗެމްޕިއަންޝިޕް ފުޓްބޯޅަ މުބާރާތުގައި ވާދަކުރަން ލިބުނު ފުރުސަތުގެ ބޭނުން ކުވެއިތު ޓީމުން ހިފާނީ އެ ގައުމުގެ ފުޓްބޯޅައިގެ މުސްތަގުބަލަށް ބިންގާ އެޅުމަށް ކުރެވޭ މަސައްކަތެއްގެ ގޮތުގައި ކަމަށް އެ ޓީމުގެ ކޯޗު ޕޯޗުގަލްގެ ރުއީ ބެންޓޯ ބުނެފި އެވެ.
ސާފް އިން ބޭރުގެ ދެ ގައުމަށް ދައުވަތު ދީގެން މި ފަހަރުގެ މުބާރާތް ބެންގަލޫރުގައި މިއަދުން ފެށިގެން އަންނަ މަހުގެ ހަތަރަކަށް ކުރިއަށްދާއިރު، ކުވެއިތުގެ އިތުރުން ދެން ފެންނާނެ އާ ޓީމަކީ ލެބަނަން އެވެ.
ކުވެއިތު ހިމެނެނީ އިންޑިއާ އާއި ޕާކިސްތާން އަދި ނޭޕާލާ އެކު ގްރޫޕް އޭގަ އެވެ.
މުބާރާތުގެ ކުރިން އިއްޔެ ބޭއްވި ނޫސްވެރިންގެ ބައްދަލުވުމުގައި ބެންޓޯ ވަނީ މި މުބާރާތުގައި ކުޅުމުގެ ފުރުސަތު ދިނީތީވެ، އެ ކަމަށް ޝުކުރު އަދާކޮށްފަ އެވެ. ކުވެއިތު ހިމެނެނީ ވަރުގަދަ ގްރޫޕެއްގައިކަން ފާހަގަކޮށް، ބެންޓޯ ބުނީ މީގެ އެންމެ މުހިންމު ކަމަކީ ޓީމެއްގެ ގޮތުގައި ކުރިއަރައިގެން ދެވޭވަރަށް ކަންކަން ރަނގަޅު ކުރަން މަސައްކަތް ކުރުން ކަމަށެވެ.
"މުބާރާތުގައި ކުޅޭ އެހެން ބައެއް ޓީމުތަކުގެ ކޯޗުން ވެސް ފާހަގަކުރި ގޮތަށް އަހަރެން ވެސް މި މުބާރާތް ނަގާނީ ޓީމު ދެނެގަނެ، ޓީމު އިތުރަށް ވަރުގަދަކޮށް، ކުރިއަށް އޮތްތަނުގައި ކުވެއިތަށް ފުޓްބޯޅައިން ކުރިއަށްދެވޭނެ އިތުރު ގޮތްތަކެއް ހޯދަން. މި މުބާރާތުގައި ޅުންތެރިންނަށް ފުރުސަތު ދިނުމާ އެކިއެކި ރޭވުންތަކާ އެއްގޮތަށް ޓީމު ހާނުވަން ވެސް ބޭނުން، ދެމެހެންޓެނިވި ގޮތެއްގައި ޓީމު ކުރިއަރުވަން ބޭނުމީ،" މިދިޔަ އަހަރު ކުވެއިތު ޓީމާ ހަވާލުވި ބެންޓޯ ބުންޏެވެ.
ބެންޓޯ ވަނީ މުބާރާތް ބާއްވާ ބެންގަލޫރުގައި ހުރި ޓްރެއިނިން ފެސިލިޓީތަކާ މެދު ކަންބޮޑުވުން ފާޅުކޮށްފަ އެވެ. އެ ގޮތުން ޕްރެކްޓިސް ކުރަން ލިބެނީ އާޓިފިޝަލް ޓާފްގައި ކަމަށްވާތީ، ބޭނުންވާ ގޮތަށް ޓްރެއިނިންތައް ނުގެންދެވި އުނދަގޫތަކެއް ކުރިމަތިވާ ކަމަށެވެ.
"ދަށް ފެންވަރެއްގެ ދަނޑުތަކެއްގައި ޕްރެކްޓިސް ކޮށްގެން ކުޅުންތެރިންނަށް އަނިޔާވާ ގޮތަށް އެއްވެސް ކަމެއް ކުރަން ބޭނުމެއް ނޫން، އެހެންވެ، އަހަރެެމެން ވަރަށް ސަމާލުވެގެން، އެންމެ ހިތްހަމަޖެހޭ ގޮތަކަށް ނޫން ޓްރެއިނިން މި ގެންދަން ޖެހެނީ،" ބެންޓޯ ބުންޏެވެ.
އެންމެ ފަހުން ނެރުނު ފީފާ ރޭންކިންގައި ދުނިޔޭގެ 143 ވަނައިގައި އޮތް ކުވެއިތު މި ފަހަރުގެ ސާފް ޗެމްޕިއަންޝިޕްގައި ކުޅޭ ފުރަތަމަ މެޗުގައި މިއަދު ރާއްޖެ ގަޑިން ތިނެއް ޖަހާއިރު، ނޭޕާލާ ބައްދަލުކުރާނެ އެވެ. ގްރޫޕް އޭގެ ދެ ވަނަ މެޗުގައި މިރޭ އިންޑިއާ އާއި ޕާކިސްތާން ކުޅޭ މެޗު އޮންނާނީ ހަތެއް ޖަހާއިރު އެވެ.
