މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗަކަށް ހުރި ބަލްގޭރިއާގެ އިވާން ވެންކޯވް ކޮލޭފް މަގާމުން ވަކިވެއްޖެ އެވެ.
މާޒިޔާ އަށް މި ފަހަރުގެ ސީޒަނުގެ ޗެރިޓީ ޝީލްޑާއި ޕްރެޒިޑެންޓްސް ކަޕް ކާމިޔާބުކޮށްދިން ކޯޗު އިވާން މަގާމުން ވަކިކުރިއިރު، އޭނާގެ އިރުޝާދުގެ ދަށުން ކުޅުނު އަށް މެޗުގެ ތެރެއިން ހަތް މެޗުން ވަނީ މޮޅުވެފަ އެވެ. ބަލިވި ހަމައެކަނި މެޗަކީ ޕްރެޒިޑެންޓްސް ކަޕްގެ ގްރޫޕް ސްޓޭޖުގައި ބުރު ސްޕޯޓްސް ކްލަބް އަތުންނެވެ.
މާޒިޔާ އިން މިރޭ ނެރުނު ބަޔާނެއްގައި ބުނެފައިވަނީ އިވާންއާ އެކު ބޭއްވި މަޝްވަރާތަކަށް ފަހު، ދެ ފަރާތް އެއްބަސްވެވުނު ގޮތަށް ކޮންޓްރެކްޓް ނިމުމަކަށް ގެެނެސްފައިވާ ކަމަށެވެ. އޭގެ އިތުރުން، މާޒިޔާ އިން ވަނީ އެ ކްލަބްގެ ޗެއާމަން އަހުމަދު ސާޖިދު އާއި ކްލަބްގެ ބޯޑު މެމްބަރުންގެ ނަމުގައި އިވާން ކޮށްދިން މަސައްކަތަށް ޝުކުރު އަދާކޮށްފަ އެވެ.
ފާއިތުވި ދެ ވަރަކަށް ސީޒަނަށް ބަލާއިރު، މާޒިޔާ އިން ވަނީ ސީޒަނުގެ ކުރީކޮޅުގައި ކޯޗު ބަދަލުކޮށްފަ އެވެ. އެ ގޮތުން، މިދިޔަ ސީޒަނުގައި މާޒިޔާ އިން ސީޒަން ފެށީ މުހައްމަދު ޝިޔާޒް (މޯހަން)އާ އެކު އެވެ. މޯހަން ވަކިވުމަށް ފަހު، ސީޒަން ބާކީ ބައި އެ ޓީމަށް ކޯޗުކޮށްދިނީ ސާބިއާގެ މިއޮޑްރަގް ޖެސިކް އެވެ. އޭގެ ކުރިން ސީޒަނުގައި މާޒިޔާ އިން ވަނީ ސީޒަން ފަށައިގެން މާ ގިނަ މެޗެއް ނުކުޅެ، އެ ޓީމުގެ ކޯޗަކަށް ހުރި މުހައްމަދު ނިޒާމް (ނިޒާމްބެ) ވަކިކޮށް، ސާބިއާގެ ކޯޗު ރިސްޓޯ ވިޑަކޮވިޗް ހަމަޖައްސައިފަ އެވެ.
މިދިޔަ ތިން އަހަރު ރާއްޖޭގެ ޗެމްޕިއަންކަން ހޯދި މާޒިޔާ އިން އަންނަނީ އާ ކޯޗެއް ހަމަޖެއްސުމުގެ މަސައްކަތް ކުރަމުންނެވެ. ރާއްޖޭގެ ސީޒަން މި ވަގުތު މެދުކަނޑާލާފައި އޮތީ މާދަމާ އިންޑިއާގެ ބެންގަލޫރުގައި ފަށާ ސާފް ޗެމްޕިއަންޝިޕް ފުޓްބޯޅަ މުބާރާތަށެވެ. އެ މުބާރާތަށް ފަހު އަންނަ މަހުގެ 15 ވަނަ ދުވަހު ސީޒަން އަލުން ފަށާނެ އެވެ.
