ބެންގަލޫރުގައި މާދަމާ ފަށާ ސާފް ޗެމްޕިއަންޝިފް ފުޓްބޯޅަ މުބާރާތް މި ފަހަރު ފެންނަނީ ވަރަށް ވަރުގަދަކޮށް ކަމަށާއި، ބޫޓާން ޓީމުގެ އަމާޒަކީ ކޮންމެ މެޗެއްގައި ވެސް ރަނގަޅު ވާދައެއްކުރުން ކަމަށް ކޯޗު ޕެމާ ދޯޖީ ބުނެފި އެވެ.
މިއީ ކޮވިޑް-19ގެ ފަހުން، ބޫޓާނުން ބައިނަލްއަގުވާމީ ލެވަލްގައި ކުޅޭ ދެ ވަނަ މުބާރާތެވެ. އެ ގޮތުން ކޮވިޑަށް ފަހު ބޫޓާނުން ބައިނަލްއަގުވާމީ ލެވަލްގައި ކުޅުނު ހަމައެކަނި މުބާރާތަކީ މިދިޔަ މާޗް މަހު ނޭޕާލްގައި ކުރިއަށްދިޔަ ޓްރައި ނޭޝަންސް ކަޕް އެވެ. އެ މުބާރާތުގައި ލާއޯސް އާއި ނޭޕާލް އަތުން ބޫޓާން ވީ ބައްޔެވެ.
މާދަމާ އިން ފެށިގެން އަންނަ މަހުގެ ހަތަރަކަށް އިންޑިއާގެ ބެންގަލޫރުގައި ވާދަކުރާ މުބާރާތުގައި ބޫޓާން ލައްވާލީ ބަންގްލަދޭޝް، ރާއްޖެ އަދި ލެބަނާންއާ އެކު ގްރޫޕް ބީގަ އެވެ. އެ ޓީމު ގްރޫޕް ސްޓޭޖުގެ ފުރަތަމަ މެޗުގައި ނިކުންނަން ޖެހޭނީ ރާއްޖެއާ ދެކޮޅަށެވެ.
ސަރަހައްދީ މުބާރާތަށް ބޫޓާންގެ ތައްޔާރީތަކާ ގުޅޭގޮތުން ކޯޗު ޕެމާ ދޯޖީ ބުނީ ބޮޑު ސްކޮޑަކާ އެކު އެ ޓީމުން މަހެއްހާ ދުވަހު އެގައުމުގައި ޕްރެކްޓިސްކުރި ކަމަށާއި، މުބާރާތުގެ ކުރިން އިންޑިއާގެ ކޮލްކަތާގައި ވެސް ހަފްތާއެއްހާ ދުވަހު ތަމްރީން ހެދިކަމަށެވެ.
"އަހަރުމެން ބޫޓާންގައި މަހެއްހާ ދުވަހު ތަމްރީން ކޭމްޕެއް ފުރިހަމަކޮށްފައި. އިންޑިއާގެ ކޮލްކަތާގައިވެސް ތަމްރީންތަކެއް ހަދާފައި މިއައީ. ހަ ދުވަހު ކޮލްކަތާގައި ތަމްރީން ހެދިއިރު އެކުވެރިކަމުގެ ދެ މެޗެއް އަހަރުމެން ކުޅުނިން. އެ ދެ މެޗުން ޓީމަށް ކުރިއެރުން ލިބިއްޖެ." ކުރިން ބޫޓާން ޓީމަށް ކުޅުނު ޕެމާ ބުންޏެވެ.
އޭނާ ބުނީ ދުރާލާ މުބާރާތަށް ތައްޔާރުވުމުގައި އެންމެ ބޮޑަށް ބެލީ މިދިޔަ މާޗު މަހު ނޭޕާލްގައި ނިމުނު ތުރީ ނޭޝަންސް ކަޕްގައި ޓީމުން ފާހަގަވި ކަންކަން ރަނގަޅުކުރުމަށް ކަމަށެވެ. އެ މުބާރާތުގައި ޓީމަށް ދިމާވި އެންމެ ބޮޑު މައްސަލައަކީ ޑިފެންސް އަދި އެޓޭކުގައިވެސް ޓީމެއްގެ ގޮތުގައި ނުކުޅެވުން ކަމަށް ޕެމާ ފާހަގަކުރި އެވެ.
ޕެމާ ވަނީ އެގައުމުގައި ކުރި ތަމްރީންތަކާއި، ކޮލްކަތާގައި ކުޅުނު އެކުވެރިކަމުގެ މެޗުތަކުން ޓީމަށް އައިސްފައިވާ ކުރިއެރުން ފާހަގަކޮށްފަ އެވެ.
"ނޭޕާލް މުބާރާތުން އަހަރުމެންނަށް ގިނަ ކަންކަން ދަސްވި. މިހާރު ޓީމެއްގައި ގޮތުގައި ބޫޓާން ވަރުގަދަވާނެ. ނޭޕާލް މުބާރާތަށްފަހު ވަރަށް ގިނަ ކަންކަން މިހާރު ހުންނާނީ ރަނގަޅުކޮށްފައި." އޭނާ ބުންޏެވެ.
ސާފް ޗެމްޕިިއަންޝިޕަށް ނުކުންނައިރު ބޫޓާންގެ ގައުމީ ޓީމަށް ލިބޭ އެންމެ ބޮޑު ހިތްހަމަޖެހުމަކީ ޓީމުގެ ކެޕްޓަން ޗެންޗޯ ޔެލްޝެންއަށް ލިބިފައިވާ އަނިޔާއިން ރަނގަޅުވެފައިވުމެވެ. ޗެންޗޯ ވަނީ އެޓީމުން ކޮލްކަތާގައި ކުޅުނު އެކުވެރިކަމުގެ މެޗުގައިވެސް ކުޅެފަ އެވެ.
ކޯޗު ޕެމާ ބުނީ މިފަހަރުގެ ސާފް ޗެމްޕިއަންޝިޕަކީ ހުރިހާ ގޮތަކަށް ބަލާއިރު ވެސް ވަރުގަދަ މުބާރާތަކަށްވާނެ ކަމަށެވެ.
"މިފަހަރުގެ ސާފް ޗެމްޕިއަންޝިޕް ވަރަށް ވަރުގަދަވާނެ. ގިނަ ޓީމްތަކުގެ މެޗުތަކެއް ކުޅެފައި މުބާރާތަށް އައީ. ކޮވިޑުގެ ފަހުން އަހަރުމެން ކުޅޭ ދެވަނަ ބައިނަލްއަގްވާމީ މުބާރާތް މިއީ. އެހެންވީމަ އަހަރުމެންނަށް އެބަހުރި އުނދަގޫތަކެއް. އެކަމަކުވެސް ހަމަ ޔަގީންކަން އެބައޮތް ރަނގަޅު ވާދައެއް ކުރެވޭނެކަމުގެ" ޕެމާ ބުންޏެވެ.
ބޫޓާން ކުޅޭ ފުރަތަމަ މެޗުގައި އަންނަ ބުރާސްފަތި ދުވަހުގެރޭ ހަތެއް ޖަހާއިރު ކުޅޭނީ ރާއްޖެއާ އެވެ.
