ދެކުނު އޭޝިއާގެ ގައުމުތަކަށް ހާއްސަ ސާފް ޗެމްޕިއަންޝިޕް ފުޓްބޯޅަ މުބާރާތަކީ ލެބަނަން ޓީމަށް މުޅިން އާ ތަޖުރިބާއެއް ކަމަށާއި، މި މުބާރާތަކީ އަންނަ އަހަރުގެ އޭޝިއަން ކަޕްގެ ކުރިން ޓީމުން ރަނގަޅުކުރަން ހުރި ކަންކަން ދެނެގަންނަން ލިބުނު ފުރުސަތެއް ކަމަށް ލެބަނަންގެ ކޯޗު ސާބިއާގެ އެލެގްޒަންޑަ އިލިކް ބުނެފި އެވެ.
ސާފް އިން ދައުވަތުދީގެން މުބާރާތުގައި ބައިވެރިވާ އެއް ގައުމަކީ ލެބަނަން އެވެ. ފުރަތަމަ ފަހަރަށް ސާފް ޗެމްޕިއަންޝިޕްގައި ކުޅޭއިރު، ލެބަނަން ލައްވާލީ ރާއްޖެ، ބޫޓާން އަދި ބަންގްލަދޭޝްއާ އެކު ގްރޫޕް ބީގަ އެވެ.
ސާފް ޗެމްޕިއަންޝިޕްގެ ކުރިން މިއަދު އޮތް ނޫސްވެރިންގެ ބައްދަލުވުމުގައި ވާހަކަދައްކަމުން އިލިކް ބުނީ އިންޑިއާގެ ބުބަނޭޝްވަރުގައި ދާދި ފަހުން ނިމުނު އިންޓަކޮންޓިނެންޓަލް ކަޕްގައި ކުޅެފައި މި މުބާރާތަށް ނިކުތުމަކީ ލިބޭ ހިތްހަމަޖެހުމެއް ކަމަށެވެ. ގާތް ގާތުގައި ގިނަ މެޗުތަކެއް ކުޅެފައި އައިސް އަލަށް ވާދަކުރާ މުބާރާތުގައި ރަނގަޅު ނަތިޖާއެއް ލިބޭނެ އުއްމީދުކުރާ ކަމަށް އިލިކް ބުނެފައިވެ އެވެ.
"އަހަރުމެން މި އައީ ކޮންޓިނެންޓަލް ކަޕް ކުޅެފައި. ކުޑަ ދުވަސްކޮޅެއްގެ ތެރޭގައި ގިނަ މެޗުތަކެއް ކުޅެފައި މިއައީ. އެ މުބާރާތުގައި މަސައްކަތްކުރި ގޮތަށް މި މުބާރާތުގައިވެސް މަސައްކަތްކުރުން މިހާރު އަމާޒަކީ. އަހަރުމެން މިއައީ މި މުބާރާތަށް އަލަށް. މި ސަރަހައްދުގައި ވާދަވެރި މުބާރާތެއް މިއީ މިއީ ރަނގަޅު ތަޖުރިބާއަކަށްވާނެ. މި މުބާރާތުގެ ސަބަބުން ލެބަނަން ޓީމަށް ކުރިއެރުން އަންނާނެ." އިލިކް ބުންޏެވެ.
އިންޓަކޮންޓިނެންޓަލް ކަޕް ފައިނަލުގައި ލެބަނަން ވަނީ 2-0 އިން އިންޑިއާ އަތުން ބަލިވެފަ އެވެ.
އިލިކް ބުނީ މި މުބާރާތަކީ ލެބަނަން ޓީމު އަންނަ އަހަރުގެ އޭޝިއަން ކަޕަށް ތައްޔާރުވާން ލިބުނު ރަނގަޅު ފުރުސަތެއް ކަމަށާއި، އެންމެ މުހިންމު ކަމަކީ ރަނގަޅު ތަޖުރިބާތަކެއް ހޯދުން ކަމަށެވެ.
"ކުރިންވެސް ބުނިހެން މި މުބާރާތުން އަހަރުމެންނަށް އެންމެ މުހިންމުވަނީ ތަޖުރިބާ. ދެކުނު އޭޝިއާގެ ޓީމްތައް ތަފާތު މެދުއިރުމަތީގެ ޓީމްތަކާ. އަންނަ އަހަރު އޭޝިއަން ކަޕަށް އަހަރުމެން ތައްޔާރުވާއިރު މި މުބާރާތުން ލިބޭ ތަޖުރިބާ އަކީ ވަރަށް މުހިންމު އެއްޗަކަށްވާނެ. ޓީމުގައި ރަނގަޅު ކުރަން ހުރި ކަންކަން ފާހަގަކޮށް، ދެން މަސަކަތްކުރަންވީ ގޮތް ބައްޓަންކޮށްލެވޭނެ މި މުބާރާތުން." އިލިކް ބުންޏެވެ.
އިލިކް ބުނީ ބުބަނޭޝްވަރުގައި ކުޅުނު އިންޓަކޮންޓިނެންޓަލް ކަޕްގެ ސަބަބުން ވެސް ލެބަނަން ޓީމަށް ކުރިއެރުން އައިސްފައިވާ ކަމަށާއި، ބުބަނޭޝްވަރުގެ މޫސުމާއި ބެންގަލޫރުގެ މޫސުމަށް ބަލާއިރު ޓީމުން ހޭނެން ޖެހޭ ބައެއް ކަންކަން އެބަހުރި ކަމަށެވެ.
"އިންޓަކޮންޓިނެންޓަލް ކަޕް ކުޅުނު ބުބަނޭޝްވަރުގައި މޫސުންވެސް ތަފާތު. ބެންގަލޫރުގެ މޫސުންވެސް ތަފާތު. އެކަމަށް އަހަރުމެން ކުޑަކޮށް ހޭނިލަން ޖެހޭނެ. ކުރިން ތިބި ހޮޓެލްވެސް އެހާ ރަނގަޅެއް ނޫން. މިހާރު އެހެން ހޮޓަލެއްގައި މިތިބީ. މުބާރާތަށް މިހާރު ޓީމް އޮތީ ރަނގަޅަށް ތައްޔާރުވެފައި." އިލިކް ބުންޏެވެ.
ސާފް ޗެމްޕިއަންޝިޕްގައި ލެބަނާން ކުޅޭ ފުރަތަމަ މެޗުގައި އަންނަ ބުރާސްފަތި ދުވަހު އެ ޓީމު ނިކުންނާނީ ބަންގްލަދޭޝްއާ ދެކޮޅަށެވެ. އެ މެޗު ކުޅޭނީ ރާއްޖެ ގަޑިން ތިނެއް ޖަހާއިރު އެވެ.
