އެމްޑީޕީގައި މަޑުކޮށްގެން ހުންނެވި ސަބަބަކީ އަލަށް އުފައްދަވާ 'ދަ ޑިމޮކްރެޓްސް' ގެ ތެރެއަށް ވީހާވެސް ބޮޑަކަށް މުޅި އެމްޑީޕީ ގެނައުމަށް ކަމަށް އެ ޕާޓީގެ ރައީސްގެ މަގާމުގައި ހުންނެވި، ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ރައްޔިތުންގެ މަޖިލިހުގެ ރައީސްގެ ހައިސިއްޔަތުން މަޖިލިހުގެ އިދާރާގައި ކުރިއަށްދާ ނޫސްވެރިންގެ ބައްދަލުވުމުގައި ގިނަ ނޫސްވެރިންގެ ސުވާލުތައް އަމާޒުވި ކަމަކީ ވެސް ނަޝީދުގެ ސަޕޯޓަރުން އާ ސިޔާސީ ޕާޓީއެއް އުފައްދަމުން އަންނަ އިރު އެމަނިކުފާނު އެމްޑީޕީގައި ހުންނެވި ސަބަބާ މެދުގަ އެވެ.
އޭގެ ޖަވާބުގައި ނަޝީދު ފުރަތަމަ ވިދާޅުވީ ސެޕްޓެމްބަރު 9، ގައި އޮންނަ ރިޔާސީ އިންތިހާބަށް ފަހު އެމްޑީޕީގެ އިސް ލީޑަރު، އަދި ރައީސް އިބްރާހީމް މުހައްމަދު ސޯލިހުގެ "ކަސްތޮޅުން" އެ ޕާޓީ މިންޖުވެގެން އަންނާނެ ކަމަށް ވަރަށް ބޮޑަށް ބެލެވޭ ކަމަށެވެ.
"އެމްޑީޕީގެ ވޯޓާބޭސްގެ ބޮޑު ބައެއް ޑިމޮކްރެޓްސްއަށް މި ރިޔާސީ އިންތިހާބުގައި ބެހިގެންދާނެ ކަން އެއީ ވަރަށް ސާފުކޮށް ފެންނަން އޮތް މަންޒަރެއް،" ނަޝީދު ވިދާޅުވި އެވެ.
އޭގެ ފަހުން ވެސް ތަކުރާރުކޮށް ނޫސްވެރިން ސަބަބު ތަފުސީލުކޮށް ވިދާޅުވެ ދެއްވުމަށް ސުވާލުކުރުމުން ނަޝީދު ވިދާޅުވީ އެމަނިކުފާނު އެމްޑީޕީގައި ހުންނެވި ސަބަބަކީ އެ ޕާޓީ އަނބުރާ ހޯއްދެއްވުން ކަމަށެވެ. އެމަނިކުފާނުގެ އެ ނިޔަތް ދިވެހި ރައްޔިތުންނަށާއި، އެމްޑީޕީގެ ސަޕޯޓަރުންނަށް ވެސް ސާފުވާނެ ކަމަށް ވިދާޅުވި އެވެ.
"އެމްޑީޕީގައި އަޅުގަނޑު މި ހުންނަނީ ސީދާ މި ދެންނެވި ނިޔަތުގައި، ދެން އެމްޑީޕީގެ ހުރިހާ މެންބަރުންނަށް ވެސް އެނގިވަޑައިގަންނަަވަން ޖެހޭ، އަޅުގަނޑު މި ތަނުގައި ހުރެ، ހަމަ މި ޕާޓީ އެކީގައި، ޑިމޮކްރެޓުންނާ އެކީގައި، ކަންކަން ނިންމަމުން އިރާދަކުރެއްވިއްޔާ މި ރާއްޖޭގައި އަދި ދާނެ،" ނަޝީދު ވިދާޅުވި އެވެ.
ނަޝީދު ވަނީ އެމަނިކުފާނުގެ މުޅި ހަޔާތް ހޭދަކުރެއްވީ އަސާސީ ހައްގުތައް ރާއްޖޭގައި ކަށަވަރު ކުރުމަށް ކަމަށް ވިދާޅުވެފަ އެވެ. އެގޮތުން, ހިޔާލު ފާޅުކުރުމާއި, އެއްވެ އުޅުމާއި, ނޫސްވެރި ކަމުގެ މިނިވަންކަން ހޯދުމަށް ވަކާލާތު ކުރެއްވި ކަމަށް އެމަނިކުފާނު ވިދާޅުވި އެވެ.
ނަމަވެސް. އެ އަސާސީ ސިފަތަކަށް ވަކާލާތު ކުރައްވަމުން ގެންދެވި އެމްޑީޕީ އިސްވެ މިހާރު އޮތް ސަރުކާރުން އެ އަސާސީ ސިފަތަކާ މާ ދުރަށް ގޮސްފައިވާ ކަމަށް ނަޝީދު ވިދާޅުވި އެވެ. އަދި އަސާސީ ހައްގުތައް ސަރުކާރުން ހިފަހައްޓާތީ އެމްޑީޕީގައި ހުންނަވަން ވެސް ދަތި ކަމަށް އެމަނިކުފާނު ވިދާޅުވި އެވެ.
އެމްޑީޕީގެ ރިޔާސީ ކެންޑިޑޭޓުގެ ގޮތުގައި 2008 އަދި 2013 ގެ ރިޔާސީ އިންތިހާބުގައި ވާދަކުރެއްވި ނަޝީދު އަދި އެމްޑީޕީގެ ފުރަތަމަ ސަރުކާރުގައި ރައީސުލްޖުމްހޫރިއްޔާ މަގާމު ފުރުއްވި ނަޝީދުގެ ބާރު ޕާޓީގައި ގެއްލެން ފެށީ 2018 ވަނަ އަހަރު ރިޔާސީ ޓިކެޓު ރައީސް ސޯލިހަށް ދޫކޮށްލެއްވި ފަހުންނެވެ.
އެ އަހަރު ވެސް އެމްޑީޕީގެ ރިޔާސީ ޕްރައިމަރީން އިންތިހާބުކުރި ކެންޑިޑޭޓަކީ ނަޝީދެވެ. ޕްރައިމަރީގައި ވާދަކުރެއްވީ ވެސް އެމަނިކުފާނު އެކަންޏެވެ. ނަމަވެސް, އޭރު ނަޝީދުގެ މައްޗަށް ޖަލު ހުކުމެއް އޮތުމުން އިންތިހާބުގައި ވާދަކުރެވޭ ގޮތް ނުވުމުން، އެމްޑީޕީގެ ކޮންގްރެސް މެދުވެރިކޮށް ރައީސް ސޯލިހަށް ރިޔާސީ ޓިކެޓު ދިނުމަށް ނިންމީ އެވެ.
އޭގެ ފަހުން އެމްޑީޕީގެ ޕާލިމެންޓްރީ ގްރޫޕް އަދި އެމްޑީޕީގެ އެންމެ އިސް ގުނަން ކަމަށްވާ ގައުމީ މަޖިލިހުގެ ބާރު ވެސް އޮތީ ރައީސަށެވެ. އަދި އެމްޑީޕީގެ އެތެރޭގެ ކޮންމެ އިންތިހާބެއް ވެސް ރައީސް ގެންދެވީ ކާމިޔާބުކުރައްވަމުންނެވެ. ނަޝީދާ ވާދަކުރައްވައި ހޯދި ކާމިޔާބީއާއެކު، މި އަހަރުގެ ރިޔާސީ އިންތިހާބުގައި އެމްޑީޕީގެ ކެންޑިޑޭޓަކީ ވެސް ރައީސް ސޯލިހެވެ.
