ރައްޔިތުންގެ މަޖިލީހުގެ ޖަލްސާތައް މިދިޔަ ހަފުތާގައި ހޫނުވީ އެ މަޖިލީހުގެ ރައީސް މުހައްމަދު ނަޝީދާއި ނައިބުރައީސް އީވާ އަބްދުﷲ ގެ އިތުބާރު ނެތްކަމަށް ކަނޑައަޅަން އެމްޑީޕީން ހުށަހަޅާފައިވާ މައްސަަލަ ކުރިއަށް ގެންދެވޭ ގޮތް ނުވެގެންނެވެ. އެ ދެ މައްސަލަ ވެސް ކުރިއަށް ނުގެންދެވިގެން އުޅޭ އެއް ސަަބަބަކީ މަޖިލީހުގެ ތަޅުމުގައި އެ ދެ މައްސަަލަ ވެސް ކުރިއަށް ގެންދިއުމުގެ އިޖުރާއަތްތައް ކަނޑައަޅާ އާއްމު ކޮމިޓީއަށް އަލުން މެމްބަރުން އައްޔަންކުރަން ޖެހިފައި އޮތުމެވެ.
އާއްމު ކޮމިޓީގެ އެކުލެވުމަށް ގެންނަ ބަދަލު ފާސްކުރަން މަޖިލީހުގެ ތަޅުމަށް މިދިޔަ ހަފުތާގެ ފަހު ޖަލްސާގައި ހުށަހެޅި އެވެ. މަޖިލީހުގެ މެޖޯރިޓީ އޮންނަ އެމްޑީޕީން ހުށަހެޅި ގޮތަށް އެކަން ފާސްކުރުމާ އިދިކޮޅު މެމްބަރުން ދެކޮޅުހައްދަވައި، މަޖިލީހުގެ ޖަލްސާ ކުރިއަށް ގެންދިޔަ ނުދީ ހައިޖާނު ހެދި އެވެ. ބުދަ ދުވަހު އޮތް އެ ޖަލްސާ ހުއްޓައިލީ އެހެންވެ ކުރިއަށް ނުގެންދެވިގެންނެވެ.
އެގޮތަށް އެކަން އޮއްވައި މިއަދުގެ ޖަލްސާގެ އެޖެންޑާ އެކުލަވައިލި އިރު އެހެން ނަމަވެސް އެ މައްސަަލައެއް ނެތެވެ. އޭގެ ބަދަލުގައި އެޖެންޑާ އެކުލަވައިލާފައި އޮތީ މަޖިލިސް އާއްމު ހާލަތުގައި އޮންނަ އިރު އޮންނާނެ ފަދަ ގޮތަކަށެވެ.
އެޖެންޑާގައި ހުރި ބައެއް ކަންތައްތައް
- ކުނި މެނޭޖްކުރުުމުގެ ގާނޫނަށް ގެންނަ އިސްލާހެއްގެ ބިލެއްގެ ބަހުސް
- އިންޑަސްޓްރިއަލް ރިލޭޝަންސް ބިލުގެ ބަހުސް
- މާވަށު ދާއިރާގެ ޕީޕީއެމް މެމްބަރު މުހައްމަދު ސައީދު ހުށަހަޅުއްވާފައިވާ ގަރާރެއްގެ ބަހުސް
- މަޑުއްވަރީ ދާއިރާގެ ޕީއެންސީ މެމްބަރު އާދަމް ޝރީފު ހުށަޅުއްވާފައިވާ ގަރާރެއްގެ ބަހުސް
އެޖެންޑާގެ މި އައިޓަމްތަކުގެ އިތުރުން ދެން ހުރީ ކޮމިޓީ މަރުހަލާ ނިމިފައިވާ ބައެއް ބިލުތަކުގެ ކޮމިޓީ ރިޕޯޓަށް ބަހުސްކުރުމެވެ.
އެޖެންޑާ މިގޮތަށް އެކުލަވައިލި އިރު މަޖިލީހުގެ ރައީސް ނުވަތަ ނައިބުރައީސްގެ އިތުބާރު ނެތް ކަމުގެ މައްސަލައެއް ހުށަހަޅައި ނޯޓިސްދީ، ނޯޓިސްގެ މުއްދަތު ހަމަވެފައިވާ ނަމަ އެ މައްސަލައެއް ފުރަތަމަ ނިންމަން ޖެހެ އެވެ. މަޖިލީހުގެ ނައިބުރައީސް އީވާގެ އިތުބާރުނެތް ކަމަށް ހުށަހެޅި މައްސަލައިގެ ނޯޓިސް ހަމަވީ މިދިޔަ ހަފުތާގެ އާދީއްތަ ދުވަހު އެވެ.
މިދިޔަ ހަފްތާގައި އެންމެ ފަހުން ބޭއްވި މަޖިލިސް ޖަލްސާ ވެސް މެދުކަނޑާލީ ކޮމިިޓީތަކުގެ މައްސަލާގައި އެއްބަސްވުމަކަށް ނާދެވި މެމްބަރުންގެ މެދުގައި ބޮޑު އަރައިރުމެއް ހިނގައި މަޖިލީހުގެ ނިޒާމު ގެއްލުމުންނެވެ.
މަޖިލިސް ޖަލްސާތައް އާދައިގެ މަތިން ކުރިއަށް ނުދާތާ ދުވަސްކޮޅެއް ވަނީ ވެފަ އެވެ. ނަޝީދާއި އީވާ ވެސް ރިޔާސަތާއި ހަވާލު ނުވާތީ އިންނަވަނީ ވިލުފުށީ ދާއިރާގެ މެމްބަރު ހަސަން އަފީފެވެ. އޭގެ ސަބަބުން, އެމްޑީޕީގެ މެމްބަރުން ތަކުރާރުކޮށް މަޖިލިސް ތެރޭގައި އިހުތިޖާޖުކުރެ އެވެ.
