އެމްޑީޕީގައި އިސްކޮށް އުޅުއްވުމަށް ފަހު އެޕާޓީން ވަކިވެވަޑައިގެންނެވި މެމްބަރުންތަކެއް "ދަ ޑިިމޮކްރެޓްސް" ގެ ނަމުގައި ޕާޓީއެއް އުފައްދަން ހުށަހެޅުމުން ޕާޓީ އުފެއްދުމަށް ހުރަސް އަޅާ ކަމަށް ބުނެ ޕާޓީ އުފެއްދުމުގެ ޖަލްސާ ބޭއްވުމުގެ ހުއްދަ ނުލިބެނީސް އިލެކްޝަންސް ކޮމިޝަނުން ނުނުކުތުމަށް ނިންމައިފި އެވެ.
މިވަގުތު ޑިމޮކްރެޓްސް އަށް ނިސްބަތްވާ މަޖިލިސް މެމްބަރުންނާއި އެ ޕާޓީގެ އިސް ސަފުގައި ހަރަކާތްތެރިވާ މެމްބަރުން ތިބީ އީސީގެ ރިސެޕްޝަނުގަ އެވެ. އޭގެ ތެރޭގައި އެ ޕާޓީގެ މުއައްސިސް ހެންވޭރު ހުޅަނގު ދާއިރާގެ މެމްބަރު ހަސަން ލަތީފާއި, މަޖިލިސް ނައިބު ރައީސް އީވާ އަބްދުالله އާއި އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް ހިމެނެ އެވެ.
އެތަނުގައި ތިއްބެވި ބޭފުޅުން އެތަނުން ދާނީ ރެޖިސްޓްރީ ލިބުމުން ކަމަށް ޑިމޮކްރެޓުންގެ ޕްރެސް ގްރޫޕުގައި ބުނެފައިވެ އެވެ.
ނޫސްވެރިންނާ ވާހަކަ ދައްކަވަމުން ޑިމޮކްރެޓްސްގެ މުއައްސިސް ހަސަން ލަތީފް ވިދާޅުވީ އެ ޕާޓީން ހުށަހެޅި ފޯމުތަކުގެ ތެރެއިން 3,000 ސައްހަ ފޯމު އޮތްކަމަށް އީސީގެ ރައީސް ފުއާދު ތައުފީގު މައުލޫމާތު ދެއްވި ކަމަށެވެ.
"ސައްހަ 3,000 ފޯމު އޮތީމަ ކުރަން ޖެހޭ ކަމަކީ އީސީގެ ޖަލްސާއެއް ބާއްވާފައި އެ ހުއްދަ ދޭންވީ. އެއީ ޖަލްސާ ބާއްވަން ޕާޓީ އުފައްދަން... ވަރަށް ބޮޑަށް ދަތިތަކެއް އެބަ ކުރިމަތި ކުރުވާ މި ޕާޓީ އުފެދިދާނެތީ," ހަސަން ލަތީފް ވިދާޅުވި އެވެ.
އެކަމާ ގުޅިގެން އީސީގެ ބަހެއް މިހާތަނަށް ލިބިފައި ނުވާއިރު މިއަދު "އަދަދު" އިން ކުރި ސުވާލަކަށް ޖަވާބު ދެއްވަމުން އީސީގެ ނައިބު ރައީސް އިސްމާއީލް ހަބީބު ވިދާޅުވީ ޑިމޮކްރެޓްސް އުފައްދަން ހުށަހެޅި ފޯމްތައް ޕްރޮސެސް ކުރުމުގެ އެންމެ ފަހު މަރުހަލާއާ ހަމައަށް މިހާރު އާދެވިފައިވާ ކަމަށެވެ. އެއީ އޭނާ ވިދާޅުވި ގޮތުގައި ފޯމްތަކުގެ ސައްހަކަން ކަށަވަރުކުރުމަށް ވަކި އަދަދެއްގެ މީހުންނަށް ގުޅުމެވެ.
އެކަން ނިމުމުން ދެން އޮންނާނީ އީސީގެ ޑާޓާ ބަލަހައްޓާ ސިސްޓަމަށް ފޯމްތަކުގެ މައުލޫމާތު އަޅައި، އެއަށް ފަހު އަލުން ޗެކް ކުރުމެވެ.
"އަޅުގަނޑުމެން މި ބަލަނީ ޕާޓީ އުފެއްދުމުގެ ޖަލްސާ ބާއްވަން ހުއްދަ ދެވޭނެ ކަމަށް ނުވަތަ އެ ފޯމްތަކާ ބެހޭ ގޮތުން ޖަވާބެއް ދެވޭނެ ކަމަށް،" ހަބީބް މިއަދު "އަދަދު" އަށް ވިދާޅުވި އެވެ.
ގާނޫނު ބުނާ ގޮތުން ސިޔާސީ ޕާޓީއެއް ރަޖިސްޓްރީ ކުރުމަށް ބޭނުންވާ އެންމެ މަދު އަދަދަކީ 3،000 މެމްބަރުންނެވެ. އީސީން މެއި 24, ގައި ޑިމޮކްރެޓްސް އުފެއްދުމުގެ ހުއްދަ ދިނުމާއެކު އެ ޕާޓީން ވަނީ މާލެ ސަރަހައްދާއި ރާއްޖޭގެ އެކި ކަންކޮޅުތަކުގައި ޕާޓީއަށް ސޮއި ހޯދުމުގެ ހަރަކާތްތައް ހިންގި އެވެ. އެއަށް ފަހު 3،560 ފޯމް އީސީއަށް ހުށަހެޅީ މިމަހުގެ ފުރަތަމަ ދުވަހު އެވެ.
