ނޭޕްލްސް، އިޓަލީ (ޖޫން 16) - މީގެ ދެ މަހެއްހާ ދުވަސް ކުރިން ސައުދީ އަރަބިއްޔާގެ އަލް ނަސްރުގެ ކޯޗުކަމުން ވަކިކުރި ފްރާންސްގެ ރުޑީ ގާސިއާ، އިޓަލީގެ ޗެމްޕިއަން ނަޕޯލީގެ ކޯޗުކަމާ ހަވާލުވެއްޖެ އެވެ.
ތިރީސް ތިން އަހަރު ތެރޭ ފުރަތަމަ ފަހަރަށް އިޓަލީގެ ޗެމްޕިއަންކަން ނަޕޯލީން ހޯދިއިރު، އެ ޓީމަށް އިރުޝާދުދިން ކޯޗު ލޫޝިއާނޯ ސްޕަލެއްޓީ ވަނީ އަމިއްލަ އަށް އެ ޓީމުން ދުރުވެފަ އެވެ. ސްޕަލެއްޓީ ވަނީ ދެން ނަޕޯލީގައި ހުންނަން ޖެހޭނީ އެ ކްލަބް އަނެއް ލެވަލަށް ގެންދެވޭނެ ކޯޗަކަށް ކަމަށެވެ.
ނަޕޯލީއާ ހަވާލުވި ގާސިއާ، އަލް ނަސްރުން ވަކިކުރީ ޓާގެޓާ ހަމައަށް ވާސިލްނުވެވޭ ކަމަށް ބުނެ އެވެ. އަލް ނަސްރަކީ މިދިޔަ ޖެނުއަރީ މަހު ޕޯޗުގީސް ތަރި ކްރިސްޓިއާނޯ ރޮނާލްޑޯ ބޮޑު އަގުގައި ގެންދިޔަ ކްލަބް އެވެ. ގާސިއާ ވަކިކުރީ ރޮނާލްޑޯގެ ނުފޫޒު އޮވެގެން ކަމަށް މީޑިއާގައި ދެކެވޭ ވާހަކަ އަލް ނަސްރުން ވަނީ ދޮގުކޮށްފަ އެވެ.
ގާސިއާ ބުނީ ނަޕޯލީ މިހާރު އޮތް ހިސާބުން އެ ޓީމާ ހަވާލުވެ، ކުރިއަށް ދިއުމަކީ ޗެލެންޖެއް ކަމަށާއި އެކަމާ ހަވާލުވި ވަރަށް ބޮޑު އުންމީދުތަކަކާ އެކު ރަނގަޅު މަސައްކަތްތަކެއް ކުރުމަށް ކަމަށެވެ.
ނަޕޯލީ ވަނީ އެ ކްލަބްގެ ތާރީހުގައި ފުރަތަމަ ފަަހަރަށް ޗެމްޕިއަންސް ލީގުގެ ކުއާޓާ ފައިނަލުގައި ވާދަކޮށްފަ އެވެ. ކުއާޓާގައި ބަލިވީ އޭސީ މިލާން އަތުންނެވެ.
ނަޕޯލީއާ ހަވާލުވި ގާސިއާ އަކީ ޔޫރަޕް ފުޓްބޯޅައިގައި ތަޖުރިބާކާރު ކޯޗެކެވެ. އޭނާ ވަނީ އުފަން ގައުމު، ފްރާންސްގެ ލީގުގައި ލިލް، މާސޭ އަދި ލިޔޯނަށް ކޯޗުކޮށްދީފަ އެވެ. ފްރާންސް ލީގުގެ އިތުރުން ދެން ރުޑީ ގާސިއާ މަސައްކަތްކުރި އެއް ލީގަކީ އިޓާލިއަން ލީގެވެ. އެ ލީގުގައި ރޯމާގައި ދެ އަހަރާއި ބައި ހޭދަކުރި އެވެ.
އަލުން އިޓާލިއަން ލީގަށް ގާސިއާ އެނބުރި އައިއިރު، އޭނާ އަށް ނަޕޯލީގެ ރައީސް އައުރޭލިއޯ ޑި ލޯރެންޓީސް ވަރަށް ބޮޑަށް އިތުބާރުކުރެ އެވެ. އަދި ގާސިއާ އަކީ ނަޕޯލީން ބޭނުންވާ ފެންވަރުގެ ކޯޗެއް ކަމަށް ޑި ލޯރެންޓީސް ވިދާޅުވެފައިވެ އެވެ.
ނަޕޯލީން އާ ކޯޗެއް ހޯދިއިރު، ސްޕެއިނުގެ ކުރީގެ ކޯޗު ލުއިސް އެންރީކޭ އާއި ދާދި ފަހުން ޕީއެސްޖީން ވަކިކުރި ކޯޗު ކްރިސްޓޮފް ގަލްޓިއޭއާ މަޝްވަރާކުރި އެވެ. ޑި ލޯރެންޓީސް ވިދާޅުވީ ގާސިއާއާ ނަޕޯލީ ޓީމު ހަވާލުކުރިއިރު، 40 ވަރަކަށް ކޯޗުންގެ ޝޯޓްލިސްޓެއް އޮތް ކަމަށެވެ.
