މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނީ (އެމްޓީސީސީ) ގެ މިދިޔަ އަހަރުގެ ފައިދާއިން ހިއްސާއަކަށް ހަތަރު ރުފިޔާ ބެހުމަށް ހުށަހެޅި ހުށަހެޅުން ފާސްނުކުރަން ހިއްސާދާރުން ނިންމައިފި އެވެ.
އެމްޓީސީސީގެ ޑިރެކްޓަރުންގެ ބޯޑުން ހުށަހެޅީ މިދިޔަ އަހަރުގެ ފައިދާ އިން ހިއްސާ އަކަށް ހަތަރު ރުފިޔާ ބެހުމަށެވެ. އެގޮތުން, މިދިޔަ އަހަރުގެ ފައިދާ އިން ޖުމްލަ 32 މިލިއަން ރުފިޔާ ބެހުމަށް ޑިރެކްޓަރުންގެ ބޯޑުން ނިންމާފައިވެ އެވެ.
އެހެން ނަމަވެސް, ކުރުނބާ މޯލްޑިވްސްގައި މިރޭ ބޭއްވި އަހަރީ އާންމު ޖަލްސާގައި ބައިވެރިވި 119 ހިއްސާދާރުން ވަނީ އެ ހުށަހެޅުން ފާސްނުކުރަން ވޯޓު ދީފަ އެވެ.
މިދިޔަ އަހަރު އެމްޓީސީސީގެ އާމްދަނީ، 2021 ވަނަ އަހަރު ލިބުނު 1.97 ބިލިއަން ރުފިޔާ އިން 2022 ވަނަ އަހަރު 2.47 ބިލިއަން ރުފިޔާ އަށް އިތުރުވި ނަމަވެސް، ސާފު ފައިދާ ވަނީ 231 މިލިއަން ރުފިޔާ އިން 195.7 މިލިއަން ރުފިޔާ އަށް ދަށްވެފަ އެވެ. މިދިޔަ އަހަރުގެ ފައިދާ އިން ފަސް ރުފިޔާގެ މޫނު މަތީ އަގުގެ ހިއްސާ އަކަށް ޖެހިފައި ވަނީ 24.35ރ. އެވެ.
އެމްޓީސީސީގެ އާންމު ޖަލްސާގެ ބައިވެރިވީ މި އަހަރުގެ އެޕްރީލް 12 ގެ ނިޔަލަށް އެ ކުންފުނީގެ ހިއްސާދާރުންގެ ދަފްތަރުގައި ރަޖިސްޓްރީ ކޮށްފައިވާ ފަރާތްތަކަށެވެ.
މިއަހަރަކީ އެމްޓީސީސީގެ ތާރީހުގައި ވެސް ބަހަން ފާސްކުރި ހިއްސާގެ ފައިދާގެ އެންމެ ބޮޑު އަދަދެވެ. މި ހުށަހެޅުން ފާސްކޮށްފައި ނުވާއިރު ސަރުކާރަކީ އެމްޓީސީސީގެ މެޖޯރިޓީ ހިއްސާދާރެވެ.
