ރައްޔިތުންގެ މަޖިލީހުގެ މަސައްކަތްތައް ހުއްޓުވާފައި ނުބޭއްވޭނެ ކަމަށާއި އެކަން ހައްލުކުރުމަށް ޓަކައި ސުޕްރީމްކޯޓަށް ދާން ޖެހިއްޖެ ނަމަ އެމްޑީޕީގެ ޕާލަމެންޓްރީ ގްރޫޕުން އެކަން ވެސްކުރާނެ ކަމަށް އެޕާޓީގެ ޕާލަމެންޓްރީ ގްރޫޕްގެ ލީޑަރު މުހައްމަދު އަސްލަމް މިރޭ ވިދާޅުވެއްޖެ އެވެ.
ރައްޔިތުންގެ މަޖިލީހުގައި ކޮމިޓީތަކުގައި އެމްޑީޕީގެ ފަރާތުން ތިއްބެވި 13 މެމްބަރަކު އެޕާޓީން ވަކިވެވަޑައިގެންނެވުމުން، ކޮމިޓީތަކަށް މެމްބަރުން އަލުން އައްޔަން ކުރަން ޖެހެ އެވެ. މަޖިލީހުގެ ރައީސް މުހައްމަދު ނަޝިދާއި ނައިބުރައީސް އީވާ އަބްދުﷲ މަގާމުން ވަކިކުރުމުގެ މައްސަލައާއި އެފަދަ އެހެން މައްސަލަތަކުގެ ބަހުސްގެ ވަގުތު ކަނޑައަޅާ އާއްމު ކޮމިޓީ ވެސް އޭގެ ތެރޭގައި ހިމެނެ އެވެ.
އެ ހާލަތާ ގުޅުވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި އެމަނިކުފާނުގެ އަރިސް ބޭފުޅުން ދެކެވަޑަައިގަންނަވަނީ މަޖިލީހުގައި މަރުތަޅެއް އެޅިފައިވާ ކަމަށެވެ.
ރާއްޖެޓީވީގެ "ފަލަސުރުހީ ޕްރޮގްރާމްގައި އަސްލަމް ވިދާޅުވީ މަޖިލީހުގެ މަސައްކަތް ނުފެށި ލަސްވާ މައްސަލަ މަޖިލީހުގެ ތެރެއިން ހައްލުވޭތޯ އެމްޑީޕީން ބަލާނީ ވަކިވަރަކަށް ކަމަށެވެ.
"އެއަށް ހައްލެއް ނުހޯދޭ ނަމަ އަޅުގަނޑުމެންނަށް އަދި ހަމަ ގާނޫނީ ފޮތުގެ ތެރޭން އަދި އެޅޭނެ އެހެނިހެން ފިޔަވަޅުތައް ވެސް އެބަހުރި. ސުޕްރީމްކޯޓަކީ ވެސް ހަމަ އޮތް އޮޕްޝަނެއް. ޕާސަނަލީ އަޅުގަނޑަކަށް އެހާ ކޮމްފޮޓަބުލް އެއް ނޫން ތިން ބާރު މިހެން ވަކިވެފައި އޮންނަ އިރު މަޖިލީހުގެ މަސައްކަތްތައް ތަރުތީބުނުކުރެވިގެން، ގަވައިދަށް ބަދަލު ނުގެނެވިގެން ސުޕްރީމްކޯޓަށް ދާން ޖެހުން އެއީ އަޅުގަނޑު ޕާސަނަލީ އެހާ ހިތާވާ ކަމެއްނޫން. އެހެން ނަމަވެސް ކުރަން ޖެހިއްޖެއްޔާ އަޅުގަނޑަށް ޔަގީން އެމްޑީޕީ ޕާލަމެންޓްރީ ގްރޫޕުން އެކަން ވެސް ކުރާނަން،" އަސްލަމް ވިދާޅުވި އެވެ.
އޭނާ ވިދާޅުވީ މަޖިލިސް ހުއްޓުވާފައި ނުބޭއްވޭނެ ކަމަށާއި މަޖިލީހަށް ހުށަހަޅާފައިވާ އިތުބާރުނެތްކަމުގެ މައްސަލަތަކަށް ވެސް ގޮތެއް ނިންމުމުގެ ވޯޓަށް ވެސް ދާނެ ކަމަށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމަށް ހުށަހަޅާފައިވާ މައްސަލައެއް އޮތުމުން މަޖިލީހުގެ ޖަލްސާތަކުގެ ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަމަށް އެމަނިކުފާނު ވަނީ ވިދާޅުވެފަ އެވެ.
އެކަމާ ބެހޭ ގޮތުން އަސްލަމް ވިދާޅުވީ ޒިންމާ އަދާނުކުރެއްވޭ ނަމަ އިސްތިއުފާދެއްވުމަކީ ވެސް އެމަނިކުފާނަށް އޮތް ފުރުސަތެއް ކަމަށެވެ. މަގާމުގައި ދެމިހުންނަވާ ހާ ހިނދަކު މަސްއޫލިއްޔަތު އަދާކުރައްވަން ޖެހިވަޑައިގަންނާނެ ކަމަށް ވެސް އަސްލަމް ވިދާޅުވި އެވެ.
