ލަންޑަން، އިނގިރޭސިވިލާތް (ޖޫން 11) - މާލީ މައްސަލަތަކަކާ ގުޅިގެން ސްކޮޓްލޭންޑްގެ ކުރީގެ ލީޑަރު ނިކޮލާ ސްޓާޖަން ހައްޔަރުކޮށްފި އެވެ.
މިއީ މާލީ މައްސަލަތަކާ ގުޅިގެން ފުލުހުން ހިންގާ ތަހުގީގުގައި މީހަކު ހައްޔަރު ކުރި ތިން ވަނަ ފަހަރެވެ. އެ ތަހުގީގާ ހެދި ސްކޮޓިޝް ނެޝަނަލް ޕާޓީ (އެސްއެންޕީ) އިން ޒަމާންތަކެއް ވަންދެން ކޮންޓްރޯލް ކުރި ސްކޮޓްލޭންޑްގެ ސިޔާސީ ނިޒާމަށް ވަނީ ލޮޅުންތައް އައިސްފަ އެވެ.
ފުލުހުން ނެރުނު ބަޔާނުގައި ބުނީ އެސްއެންޕީއަށް ފަންޑު ކުރުމާއި އެ ޕާޓީގެ މާލީ ކަންކަމާ ގުޅޭ ތަހުގީގުގެ ތެރެއިން އާދީއްތަ ދުވަހު ހައްޔަރު ކުރީ އުމުރުން 52 އަހަރުގެ އަންހެނެއް ކަމަށޭވެ.
ސްޓާޖަންގެ ތަރުޖަމާނަކު ވިދާޅުވީ ފުލުހުންގެ ތަހުގީގަށް އެއްބާރުލުން ދެއްވައި، އިންޓަވިއުއަށް ވަޑައިގެންނެވީ އޭނާ އަމިއްލައަށް އިސްނަގައިގެން ކަމަށެވެ.
ފުލުހުން ބުނީ ސްޓާޖަން ބަަންދުގައި ބަހައްޓައިގެން ސުވާލު ކުރަމުންދާ ކަމަށެވެ. މިދިޔަ އެޕްރީލް މަހު އެ ތަހުގީގުގެ ތެރެއިން ސްޓާޖަންގެ ފިރިކަލުން އަދި އެސްއެންޕީގެ ކުރީގެ ޗީފް އެގްޒެކްޓިވް ޕީޓާ މުރެލް ވެސް ހައްޔަރު ކުރި އެވެ.
އޭރު ފުލުހުން ވަނީ ގްލާސްގޯގައި އެ މީހުން ދިރިއުޅޭ ގެ އާއި އެޑިންބަރާގައި ހުންނަ އެސްއެންޕީގެ މައި އޮފީސް ބަލައި ފާސްކޮށްފަ އެވެ.
އިނގިރޭސިންގެ ދަށުން ވަކިވެ، ސްކޮޓްލޭންޑަށް މިނިވަންކަން ހޯދަން ހިންގާ ކެމްޕެއިނަށް ހިލޭ އެހީގެ ގޮތުގައި އެސްއެންޕީއަށް ލިބުނު 750،000 ޑޮލަރު އެހެން ކަންކަމަށް ނެގިކަމުގެ ތުހުމަތު މުރެލްއަށް ކުރެވެ އެވެ.
މިދިޔަ އެޕްރީލް މަހު ޕާޓީގެ ޓްރެޝަރާ ކޮލިން ބީޓީ ވެސް ހައްޔަރު ކުރި އެވެ.
އަށް އަހަރު ސްކޮޓްލޭންޑްގެ ފަަސްޓް މިނިސްޓަރުގެ މަގާމު ފުރުއްވި ސްޓާޖަން މަގާމުން ވަކިވީ "ވަރުބަލިވެފައިވާ" ކަމަށް ވިދާޅުވެ މިދިޔަ މާޗް މަހު އެވެ.
