ކިޔެވް، ޔޫކްރެއިން (ޖޫން 11) - ގެއްލުނު ބިމުގެ ސަރަހައްދު އަނބުރާ ހޯދަން ޔޫކްރެއިނުން ފެށި ބޮޑު އޮޕަރޭޝަނުގެ ތެރެއިން އަވަށެއްގެ ކޮންޓްރޯލް އަނބުރާ ލިބިފައިވާ ކަމަށް އެ ގައުމުން ބުނެފި އެވެ.
ހޮނިހިރު ދުވަހު ރައީސް ވޮލޮޑިމިރް ޒެލެންސްކީ ވިދާޅުވީ ގިނަ މަސްތަކެއް ވަންދެން ތައްޔާރުވި ބޮޑު އޮޕަރޭޝަން ފަށައިގެން ކުރިއަށްދާ ކަމަށެވެ. ނަމަވެސް ތަފްސީލެއް ނުދެއްވަ އެވެ.
ޔޫކްރެއިންގެ ސިފައިން ނެރުނު ބަޔާނެއްގައި ބުނީ އިރުމަތީ ޑޮނެސްކް ސަރަހައްދުގައި އޮންނަ ބްލަގޮޑަޓްނޭ އަވަށް ދުޝްމަނުންގެ އަތުން ހޯދައި މިނިވަންކޮށްފައިވާ ކަމަށެވެ.
އެ ތަނުގެ އިމާރާތެއްގައި ޔޫކްރެއިންގެ ދިދަ ނަގާ މަންޒަރު ފެންނަ ވީޑިއޯއެއް ވެސް އާއްމުކުރި އެވެ. ޔޫކްރެއިނުން ބުނީ ރަޝިއާގެ ސިފައިންތަކެއް ހައްޔަރުކޮށްފައިވާ ކަމަށެވެ.
ޔޫކްރެއިންގެ އޮޕަރޭޝަން ފަށައިގެން އުޅޭ ކަމަށް ވިދާޅުވެ، ރަޝިއާގެ ރައީސް ލެޑިމިއަ ޕުޓިން ހުކުރު ދުވަހު ދެއްވި މެސެޖެއްގައި ވިދާޅުވީ އެ އޮޕަރޭޝަން ފެއިލްވަމުންދާ ކަމަށެވެ.
އަވަށެއްގެ ކޮންޓްރޯލް އަނބުރާ ހޯދާފައިވާ ކަމަށް ޔޫކްރެއިނުން ބުނުމުން، ރަޝިއާއިން އެކަމާ ގުޅޭ ގޮތުން އަދި ވަކި އެއްޗެއް ނުބުނެ އެވެ.
