ރާއްޖެ އިން މި އަހަރު ހައްޖަށް ދާ ދިވެހިންގެ ކަންކަން ބަލަހައްޓަން "އަމީރުލް ހައްޖު"ގެ ގޮތުގައި ނައިބު ރައީސް, ފައިސަލް ނަސީމް ކަނޑައަޅައިފި އެވެ.
އަމީރުލް ހައްޖުގެ ގޮތުގައި ވަޑައިގަންނަވާނެ ބޭފުޅުން ރާއްޖޭގައި ކަނޑައަޅަނީ އަބަދުވެސް ރައީސެވެ. އެ މީހަކީ އެ އަހަރު ރާއްޖޭން ހައްޖަށް ދާ އެންމެންގެ ކަންކަން ކައިރިން ބަލަހައްޓަން ރައީސް ކަނޑައަޅުއްވާ ބޭފުޅެކެވެ.
މިއަހަރު ހައްޖުގެ މަތިވެރި އަޅުކަން އަދާކުރުމަށް ރާއްޖެއިން ފުރާ ހައްޖާޖީންގެ ކަންތައްތައް އިސްކޮށް ބެލެހެއްޓެވުމަށްޓަކައި ވަޑައިގަންނަވާނީ ނައިބު ރައީސެވެ.
ރައީސް ސޯލިހު ވެރިކަމާ ހަވާލުވެވަޑައިގެންނެވި ފަހުން ރާއްޖެއިން މީހުން ހައްޖަށް ދާ މިއީ ތިން ވަނަ ފަހަރެވެ. އެއީ 2019 ވަނަ އަހަރާއި މިދިޔަ އަހަރެވެ.
އެގޮތުން, 2019 ގައި އަމީރުލް ހައްޖުގެ ގޮތުގައި ހަމަޖެއްސީ ޕްލޭނިން މިނިސްޓަރު މުހައްމަދު އަސްލަމެވެ. އަދި, 2022 ގައި އަމީރުލް ހައްޖަކީ އިސްލާމިކް މިނިސްޓަރު ޑރ. އަހްމަދު ޒާހިރު އެވެ.
މި އަހަރު ރާއްޖެއަށް ރަސްމީ ހައްޖު ކޯޓާގެ ގޮތުގައި 1000 ލިބިފައިވާއިރު ކޯޓާގެ އަދަދު 2,500 އަށް ބޮޑުކުރަން ރާއްޖެއިން ވަނީ އެދިފަ އެވެ. މިނިސްޓަރު ވިދާޅުވީ މީގެ ކުރިން ސައުދީން އިތުރަށް ކޯޓާ ދިން އަދަދުތަކަށް ބަލާއިރު، އިތުރަށް ހާހެއްހާ ކޯޓާ ލިބިދާނެ ކަމަށެވެ.
ރާއްޖެއަށް ވަރަށް ކުރީއްސުރެ ވެސް ހައްޖުގެ ކޯޓާގެ ގޮތުގައި ރަސްމީކޮށް ދެނީ 1،000 ކޯޓާ އެވެ. ނަމަވެސް, ކޮވިޑާއެކު އެ އަދަދު 435 އަށް ދަށްވުމަށްފަހު މިއަހަރު އަނެއްކާ ވެސް މިވަނީ ކުރިން ކޯޓާ ދިން އަދަދު ރުޖޫއަކޮށްފަ އެވެ.
