އިތުބާރު ނެތްކަމުގެ މައްސަލަތައް ކުރިއަށް ގެންދަން ބޭނުން ނުވާތީވެ، މަޖިލީހުގެ އަމީން އާންމު ދައްކަވަނީ އުޒުރު ކަމަށާއި، މަޖިލީހުގެ ނައިބު ރައީސް އީވާ އަބްދުﷲގެ އިތުބާރު ނެތް މައްސަލަ މާދަމާގެ ޖަލްސާގެ އެޖެންޑާއިން އިސްތިސްނާ ކުރެވޭނެ އެއްވެސް ހަމައެއް ގަވާއިދުގައި ނެތް ކަމަށް ބުނެ، އެ މައްސަލަ މާދަމާގެ އެޖެންޑާގައި ހިމެނުމަށް އެމްޑީޕީން ހުށަހަޅައިފި އެވެ.
މަޖިލީހުގެ މެޖޯރިޓީ ޕާޓީ، އަދި ވެރިކަންކުރާ ކޯލިޝަންގެ މައި ޕާޓީ އެމްޑީޕީގެ ޕާލިމެންޓްރީ ގްރޫޕުގެ ލީޑަރު މުހައްމަދު އަސްލަމް ސޮއި ކުރައްވައި މަޖިލީހުގެ އަމީން އާންމު ފާތިމަތު ނިޔުޝާ އަށް ރޭ ފޮނުއްވި ސީޓީއެއްގައި ވިދާޅުވީ މަޖިލީހުގެ ރައީސް އަދި ނައިބު ރައީސްގެ އިތުބާރު ނެތްކަމުގެ ގަރާރެއް މަޖިލީހަށް ލިބުމުން އެ ގަރާރުގެ ލިޔުން ލިބޭތާ މަދުވެގެން ތިން ދުވަހުގެ ތެރޭގައި އެ ގަރާރުގެ ނޯޓިސް މަޖިލީހުގެ އަމީން އާންމު މެމްބަރުންނަށާއި މަޖިލީހުގެ ރައީސަށް ނުވަތަ ނައިބު ރައީސަށް ދިނުމަށް ފަހު، ނޯޓިހުގެ ތާރީހުން ފެށިގެން 14 ދުވަހުގެ މުއްދަތަށް ފަހު ބާއްވާ ޖަލްސާއަށް އެ ގަރާރު ހުށަހަޅަންވާނެ ކަމެވެ. އެ އުސޫލުން މާދަމާގެ ޖަލްސާއަށް އީވާގެ މައްސަލަ އެޖެންޑާކުރަންޖެހެ އެވެ.
"12 ޖޫން 2023 ވަނަ ދުވަހު [މާދަމާ] ރައްޔިތުންގެ މަޖިލީހުގެ ނައިބު ރައީސްގެ އިތުބާރު ނެތްކަމުގެ މައްސަލަ އެޖެންޑާކުރުން ގަވާއިދު ލާޒިމު ކަމުގައި ދަންނަވަމެވެ. އަދި ރައްޔިތުންގެ މަޖިލީހުގެ ގަވާއިދުގައި އެ މައްސަލަ އެޖެންޑާކުރުން އިސްތިސްނާ ކުރެވޭ އެއްވެސް ހާލަތެއް ބަޔާންކޮށްފައި ނުވާތީ ގަވާއިދުގައި ބަޔާންކޮށްފައިވާ މުއްދަތުގައި ރައްތިތުންގެ މަޖިލީހުގެ ނައިބު ރައީސްގެ އިތުބާރު ނެތްކަމުގެ މައްސަލަ އެޖްނޑާކޮށް ދެއްވުމަށް ދަންނަވަމެވެ،" އަސްލަމްގެ ސިޓީގައިވެ އެވެ.
އީވާގެ އިތުބާރު ނެތްކަމުގެ މައްސަލަ އެޖެންޑާއިން އުނިކުރި ކަމަށް މިދިޔަ ބުރާސްފަތި ދުވަހު ނިޔުޝާ އެންގެވުމާއެކު އެ ނިންމުމާ މެދު ހިތްހަމަޖެހިވަޑައިނުގަތް އަސްލަމް ހަމަ އެ ދުވަހު ފޮނުއްވި ސިޓީއެއްގައި ވިދާޅުވެފައި ވަނީ އިތުބާރު ނެތް ކަމުގެ މައްސަލަ ކުރިއަށް ނުގެންގޮސް މަޖިލީހުގެ އެހެން މަސައްކަތެއް ނުކުރެވޭނެ ކަމަށެވެ.
އިތުބާރު ނެތްކަމުގެ މައްސަލަތައް ހުއްޓުނީ ނަޝީދަށް ތާއިދު ކުރައްވާ މަޖިލީހުގެ 13 މެމްބަރަކު، އެ މަނިކުފާނު އަޑީގައި ހުންނަވައިގެން އުފައްދަވާ ދަ ޑިމޮކްރެޓްސްއަށް ބަދަލުވުމާއެކު މަޖިލީހުގެ ކޮމިޓީތައް އެކުލެވިގެންވާ ގޮތަށް އަންނަ ބޮޑު ބަދަލު ފާސްކުރަންޖެހޭ ކަމަށް ބުނެ އެވެ. ނަޝީދުގެ ސަޕޯޓަރުން އެމްޑީޕީ ދޫކޮށްލި ނަމަވެސް، މަޖިލީހުގައި އެ ޕާޓީއަށް އޮތް އެމްޑީޕީގެ މެޖޯރިޓީ ގެއްލިގެން ނުދެ އެވެ.
ރާއްޖޭގެ ބަރުލަމާނީ ހަޔާތުގައި، އިތުބާރު ނެތްކަމުގެ މައްސަލައެއް މަޖިލީހަށް ވައްދާފައި އޮތް ދަނޑިވަޅެއްގައި ދާއިމީ ކޮމިޓީތައް އަލުން އެކުލަވާލަންޖެހޭ ކަމަށް ބުނެ މަޖިލީހުގައި މަރުތަޅު އެޅުނު މިއީ ފުރަތަމަ ފަހަރެވެ.
ބުރާސްފަތި ދުވަހު އަސްލަމް ނިޔުޝާއަށް ފޮނުއްވި ސިޓީގައި ވިދާޅުވީ އޭނާ އެމްޑީޕީއަށް މިހާރު ވެސް މަޖިލީހުގެ 64 ޕަސެންޓު މެޖޯރިޓީ އޮތްއިރު، ކޮމިޓީތަކުގެ މެޖޯރިޓީ ޕާޓީއަށް ގެއްލޭ ގޮތަށް ކޮމިޓީތައް ތަރުތީބުނުކުރުމަށެވެ. އެއީ ކޮމިޓީތައް އެކުލަވާލުން މަޑުޖައްސާލަށް އެދުނު އެދުމެއް ކަމަށް ނިޔުޝާ ވިދާޅުވަނީ ކޮމިޓީތައް އެކުލަވާނުލުމަށް އުޒުރު ދެއްކެވުމުގެ ގޮތުން ކަމަށް އަސްލަމް ރޭ ފޮނުއްވި ސީޓިގައި ވިދާޅުވެފައިވެ އެވެ.
މަޖިލީހުގެ ރައީސް މުހައްމަދު ނަޝީދުގެ އާއިލީ ބޭފުޅެއް ކަމުގައިވާ އީވާގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅީ، އެމްޑީޕީ ދޫކޮށް، އަލަށް އުފައްދާ ދަ ޑިމޮކްރެޓްސް ޕާޓީއާ ގުޅިވަޑައިގަތުމުންނެވެ. އެމްޑީޕީގެ މެންބަރުންނަށް އީވާގެ އިތުބާރު ގެއްލުނު ނަމަވެސް، ނައިބު ރައީސްގެ މަގާމު ދޫކޮށްލައްވަން އޭނާ ބޭނުންފުޅެއް ނުވެ އެވެ.
ނަޝީދަށް ތާއިދު ކުރައްވާ މެމްބަރުން ދަ ޑިމޮކްރެޓްސްއަށް ސޮއިކުރެއްވި ނަމަވެސް، އެ މެމްބަރުން މަޖިލީހުގައި މިހާރު ތަމްސީލު ކުރައްވާނީ މިނިވަން މެމްބަރުންގެ ގޮތުގަ އެވެ. އެއީ އެ ޕާޓީ ރަސްމީކޮށް ރަޖިސްޓްރީ ނުކުރާތީ އެވެ.
