ކިޔެވް، ޔޫކްރެއިން (ޖޫން 10) - ކެނެޑާގެ ބޮޑު ވަޒީރު ޖަސްޓިން ޓްރޫޑޯ ހޮނިހިރު ދުވަހު ޔޫކްރެއިންގެ ވެރިރަށް ކިޔެވްއަށް ކުއްލި ދަތުރެއް ކުރައްވައިފި އެވެ.
ކުރިން އިއުލާން ކުރުމެއް ނެތި ޓްރޫޑޯ ކިޔެވްއަށް ވަޑައިގެންނެވި އިރު، ޔޫކްރެއިންގެ އިރުމައްޗާއި ދެކުނުގައި ހަނގުރާމަ ވަނީ ވަރުގަދަވެފަ އެވެ.
ހަނގުރާމައިގައި މަރުވި ސިފައިންގެ ހަނދާނުގައި ހަދާފައިވާ ފާރެއްގެ ކައިރިއަށް ޓްރޫޑޯ ޒިޔާރަތް ކުރެއްވި އެވެ. އަދި ރައީސް ވޮލޮޑިމިރް ޒެލެންސްކީއާ ބައްދަލުކުރެއްވި އެވެ.
ކެނެޑާގައި ތަމްރީންވި ޔޫކްރެއިންގެ ސިފައިންގެ ގްރޫޕަކާ ވެސް ޓްރޫޑޯ ބައްދަލުކުރެއްވި އެވެ. ކެނެޑާގައި ޔޫކްރެއިންގެ ގިނަ ބަޔަކު ދިރިއުޅެ އެވެ.
މިދިޔަ އަހަރުގެ ފެބްރުއަރީ މަހު ރަޝިއާގެ ސިފައިން ޔޫކްރެއިނަށް އަރައި ހަނގުރާމަ ފެށުމުން، ޔޫކްރެއިނަށް އެންމެ ބޮޑު އެއްބާރުލުމެއް ދޭ އެއް ގައުމަކީ ކެނެޑާ އެވެ.
އެގޮތުން މުހިއްމު އަސްކަރީ އެހީ ފޯރުކޮށްދީފައިވާ އިރު، 36،000 އަށް ވުރެ ގިނަ ސިފައިންނަށް ކެނެޑާގައި ތަމްރީން ފޯރުކޮށްދީފައިވެ އެވެ. އޭގެ އިތުރުން ރަޝިއާއާ ދެކޮޅަށް ކެނެޑާއިން ފިޔަވަޅުތައް ވެސް ތަންފީޒު ކުރި އެވެ.
