ސެޕްޓެމްބަރު މަހު ބާއްވާ ރިޔާސީ އިންތިހާބުގައި ޖުމްހުރީ ޕާޓީގެ ޓިކެޓު ރަސްމީކޮށް އެ ޕާޓީގެ ލީޑަރު ގާސިމް އިބްރާހިމަށް ހަވާލުކުރުމާއެކު، އެމްޑީޕީގެ އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އޭނާއަށް މަރުހަބާ ވިދާޅުވެއްޖެ އެވެ.
އެމްޑީޕީގެ ތެރޭގައި އުފެދުނު ހިޔާލުތަފާތުވުންތަކަށް ފަހު އާ ޕާޓީއެއް އުފެއްދެވުމުގެ މަސައްކަތް ކުރައްވަމުން ގެންދަވާ ނަޝީދު، މިއަދު ކުރެއްވި ޓުވީޓެއްގައި ގާސިމަށް މަރުހަބާ ވިދާޅުވުމަށް ފަހު ވިދާޅުވީ "މިނިވަން އިންސާފުވެރި އިންތިހާބަކަށް މަގުފަހި ކުުރުމަކީ އަޅުގަނޑުމެން އެންމެންގެ ވެސް ވާޖިބެއް" ކަމަށެވެ.
ދަ ޑިމޮކްރެޓްސް ގެ ނަމުގައި އާ ޕާޓީގެ މަސައްކަތް ފެށުމުގެ ކުރިން، އެމްޑީޕީގެ ތެރޭގައި 'ފިކުރެއްގެ ދިރުން' ގެ ނަމުގައި ފެކްޝަން ހިންގެވިއިރު ރިޔާސީ އިންތިހާބުގައި އެކުގައި މަސައްކަތް ކުރުމަށް ގާސިމް އަދި ޖޭޕީއާއެކު ނަޝީދު މަޝްވަރާތަކެއްވެސް ކުރި އެވެ. އެހެން ނަމަވެސް ފިކުރެއްގެ ދިރުމުން އުފައްދާ 'ދަ ޑިމޮކްރެޓްސް' އިން ވެސް ވަނީ ރިޔާސީ ކެންޑިޑޭޓެއް ނެރޭނެކަން އިއުލާނުކޮށްފަ އެވެ.
އަޑުފެތުރިފައިވާ ގޮތުގައި ނަޝީދު، ހުށަހެޅުއްވި، ވެރިކަންކުރާ ނިޒާމު ބަރުލަމާނީ ނިޒާމަށް ބަދަލުކުރުމުގެ ނުކުތާތަކަށް ގާސިމް ވަނީ ދެކޮޅު ހައްދަވާފަ އެވެ. އެއަށްފަހު ގާސިމް އަމިއްލަ ޓީވީ ސްޓޭޝަނަށް ދެއްވި އިންޓަވިއުއެއްގައި ނަޝީދަށް ވަރަށް ބޮޑަށް ފާޑުވިދާޅުވި އެވެ.
"އަޅުގަނޑަށް އިނގޭ ރައީސް ނަޝީދު އެ ދައްކަވަނީ ކޮން ވާހަކައެއްކަން. އަޅުގަނޑު ދަންނަން ރައީސް ނަޝީދު ވަރަށް ފުރިހަމައަށް. އެބޭފުޅާއަކަށް [ނަޝީދަށް] ކަމަކުނުދާނެ އެބޭފުޅާ ނޫން އެހެން މީހަކު ދިވެހިރާއްޖޭގެ ވެރިކަމުގައި ހުންނާކަށް. އެހެން މީހަކަށް އެ ފުރުސަތު ދީގެން އެބޭފުޅާއަކަށް ކެތެއް ނުވާނެ،" ގާސިމް ވިދާޅުވި އެވެ. "އެ ހުށަހެޅި ކަރުދާހަށް ބެލީމަ ފެންނަނީ އެބޭފުޅާ ވެރިކަމަށް ގެންނަން މަގު ކޮށައިދޭ މީހަކަށް."
ގާސިމަށް ޓިކެޓު ހަވާލުކުރުމަށް ރޭ ކާނިވަލުގައި ބޭއްވި ރަސްމިއްޔާތު ފަށަން ހަމަޖެހިފައި އޮތީ 08:30 ގަ އެވެ. އެހެންނަމަވެސް 10:00 ޖަހަން ކުޑަތަންވި ފަހުން ޖަލްސާ ފެށީ ސަޕޯޓަރުންގެ އަދަދު މަދުވުން އެ ތަނުގައި ޖަހާފައިހުރި ގޮނޑިތައް ނެގުމަށްފަހު އެވެ.
ގާސިމްގެ ރިޔާސީ ދަތުރު
މި އަހަރުގެ ރިޔާސީ އިންތިހާބުގައި އެމްޑީޕީގެ ރައީސް އިބްރާހިމް މުހައްމަދު ސޯލިހު އެކުގައި ކުރިއަށް ދިއުމަށް އެދިވަޑައިގެންފައި ވަނިކޮށް ޖޭޕީން ވަކިން ވާދަކުރަން ނިންމީ މާޗު 14 ގަ އެވެ. އެގޮތަށް އެ ޕާޓީއިން ނިންމީ ރައީސް, ގާސިމްއާ ބައްދަލު ކުރައްވާފައި ވަނިކޮށެވެ.
އެއާކު ސަރުކާރުގެ އިސް މަގާމުތަކުގައި ތިބި ބައެއް ބޭފުޅުން ވަނީ ޕާޓީއާ ދުރަށް ޖެހުމަށް ނިންމަވައި ގާސިމަށް ތާއިދުނުކުރާކަން ހާމަކުރެއްވި އެވެ. އެގޮތުން, އެންމެ ފުރަތަމަ ޕާޓީއާ ދުރަށް ޖެހި އިސްތިއުފާދެއްވީ ރައީސް އޮފީހުގެ މިނިސްޓަރު އަހުމަދު ސަމީރެވެ. އޭނާ ވިދާޅުވީ ގާސިމަށް ރިޔާސީ އިންތިހާބު ކާމިޔާބުވާތަން ނުފެންނަ ކަމަށެވެ. އެއަށްފަހު އިމިގްރޭޝަން ކޮންޓްރޯލާ މުހައްމަދު އަހްމަދު (ހަނަފީ) އާއި އިސްދޫ ދާއިރާގެ މެމްބަރު އަލީ ހަމީދު ވެސް ވަނީ ޕާޓީ ދޫކުރެއްވި އެވެ. އޭގެއިތުރުންވެސް, ޖޭޕީގެ ތެރޭގައި ތިއްބެވި ރައީސް ސޯލިހަށް ތާއީދުކުރައްވާ ގިނަ ބޭފުޅުން ވަނީ ޕާޓީއާ ދުރަށް ޖެހިފަ އެވެ.
ނަމަވެސް، ޖެޕީން ވަނީ ރިޔާސީ ކެންޑިޑޭޓެއް ކަނޑައެޅުމަށް ޕްރައިމަރީއަށް ހުޅުވާލާ ރިޔާސީ އިންތިހާބުގެ ތައްޔާރީތައް ކުރިއަށް ގެންގޮސްފަ އެވެ. ރިޔާސީ ޓިކެޓު ގާސިމަށް ލިބުނީ ޕްރައިމަރީގައި ގާސިމްއާ ވާދަކުރާނެ އެހެން ބޭފުޅަކު ނުވުމުންނެވެ.
