ޕްރާގް (ޖޫން 8) - ވެސްޓް ހޭމް ޔުނައިޓެޑް ދޫކޮށް އެހެން ކްލަބަކަށް ބަދަލުވާން އުޅޭ އަޑުތައް ފެތުރުނަސް، މި ވަގުތު ވިސްނުން އޮތީ ހަމައެކަނި އެ ޓީމަށް ކަމަށް އެ ޓީމުގެ ކެޕްޓަން ޑެކްލަން ރައިސް ބުނެފި އެވެ.
ރައިސްގެ ކެޕްޓަންކަމުގެ ދަށުން ވެސްޓް ހޭމް އިން ވަނީ ޔުއެފާ ކޮންފަރެންސް ލީގުގެ ފައިނަލްގައި ރޭ ފިއޮރެންޓީނާ އަތުން 2-1 އިން މޮޅުވެ، އެ މުބާރާތުގެ ޗެމްޕިއަންކަން ހޯދައިފައެވެ. މިއީ، 1965 ވަނަ އަހަރުގެ ފަހުން ވެސްޓް ހޭމް އިން ޔޫރަޕްގެ ތައްޓެއް ހޯދި ފުރަތަމަ ފަހަރެވެ.
އިންގްލެންޑްގެ ގައުމީ ޓީމުގައި ވެސް ހިމެނޭ ރައިސް، 24، މި ސީޒަނަށް ފަހު އެހެން ކްލަބަކަށް ބަދަލުވާނެކަމަށް ވަނީ އަޑުފެތުރިފަ އެވެ. އަދި ޕްރިމިއާ ލީގުގެ ބޮޑެތި ކްލަބުތަކުން އޭނާ އަށް ޝައުގުވެރިވާ ކަމަށް ވެސް ރިޕޯޓްތަކުން ބުނެ އެވެ.
އެހެން ނަމަވެސް، ރޭގެ ފައިނަލަށް ފަހު މީޑިއާއާ ވާހަކަދައްކަމުން ރައިސް ބުނީ އޭނާ އެހެން ކްލަބަކަށް ބަދަލުވާން އުޅޭ ކަމަށް އަޑު ފެތުރު ނަމަވެސް، އިތުުރު ކްލަބަކާ މެދު އޭނާގެ ވިސްނުމެއް މި ވަގުތު ނެތް ކަމަށެވެ.
"ވެސްޓް ހޭމް އަކީ އަހަރެން ވަރަށް ލޯބިވާ ކްލަބެއް. އަދި މި ކްލަބަށް އަހަރެން މި ކުޅެނީ ވަރަށް ކުޅޭހިތުން،" ރައިސް ބުންޏެވެ.
"އެހެން ކްލަބުތަކުން ޝައުގުވެރިވާކަން އެނގޭ. އެކަމަކު އަހަރެން ވެސްޓް ހޭމްއާއެކު ހަދާފައިވާ ކޮންޓުރެކްޓްގައި ބާކީ ދެ އަހަރު އެބައޮތް. އަހަރެންގެ ވިސްނުން މި ވަގުތު އޮތީ ވެސްޓް ހޭމަށް. ދެން ވާނެ ގޮތެއް ބަލަމާ. އެއްވެސް މީހަކަށް ކުރިއަށް އޮތް ތަނުގައި ވާނެގޮތެއް ނޭނގޭނެ."
މި ސީޒަނަށް ފަހު ވެސްޓް ހޭމް ދޫކޮށް ރައިސް އެހެން ކްލަބަކަށް ބަދަލުވުމުގެ ފުރުސަތު ވަރަށް ބޮޑު ކަމަށް އެ ޓީމުގެ ކޯޗު ޑޭވިޑް މޮއިސް ވެސް ވަނީ ކުރިން ބުނެފަ އެވެ.
ރައީސްއާ އެކު ހަދާފައިވާ ކޮންޓުރެކްޓް އާކުރުމަށް ވެސްޓް ހޭމް އިން މިހާތަނަށް ކުރި މަސައްކަތްތައްް ކާމިޔާބެއްނުވި އެވެ.
ވެސްޓް ހޭމް އިން ވަނީ އެހެން ކްލަބަކުން ރައިސް ބޭނުންނަމަ 100 މިލިއަން ޑޮލަރު މަދުވެގެން ދައްކަން ޖެހޭނެ ކަމަށް ބުނެފަ އެވެ. ޗެލްސީ އާއި އާސެނަލުން ރައިސް އަށް ޝައުގުވެރިވެ އެވެ.
