ލަންޑަން (އޮގަސްޓް 23) - އިނގިރޭސި ޕްރިމިއާ ލީގުގައި ރޭ ފަހަތުން އަރައި، ވެސްޓް ހޭމް ޔުނައިޓެޑް އަތުން 5-1 އިން ޗެލްސީން ބޮޑު މޮޅެއް ހޯދައިފި އެވެ.
މިދިޔަ ހަފްތާގައި އިނގިރޭސި ޕްރިމިއާ ލީގުގެ އާ ސީޒަން ފެށިއިރު، ޗެލްސީން ކުޅުނު ފުރަތަމަ މެޗުގައި އަމިއްލަ ދަނޑުގައި ކްރިސްޓަލް ޕެލަސްއާ ވަނީ އެއްވަރުވެފަ އެވެ. ރޭގެ މެޗުގައި ވެސް ޗެލްސީ އަށް މޮޅުވެވުނީ އުނދަގޫ ކަންތައްތަކަކާ ކުރިމަތިލައިފަ އެވެ.
އެ ގޮތުން، ލަންޑަން ސްޓޭޑިއަމްގައި ރޭ ކުޅުނު މެޗުގެ ވޯމްއަޕްގައި ޗެލްސީގެ ތަރި، ކޯލް ޕާމާ އަށް އަނިޔާވެ ބަދަލުކުރަން ޖެހުނެވެ. އަދި، މެޗު ފަށައިގެން، ހަ ވަނަ މިނިޓްގައި ވެސްޓް ހޭމުން ލީޑުނެގި އެވެ. މި ލަނޑު ޖެހީ އޭރިއާބޭރުން ގޯލުގެ މަތީ ކަނަށް ފޮނުވާލި ބޯޅައަކުން ލޫކަސް ޕަކޭޓާ އެެވެ.
ޗެލްސީން މެޗުގެ 15 ވަނަ މިނިޓްގައި ކޯނަރެއްގައި މާކް ކުކުރޭއާ ދިން ބޯޅައަކުން ޖޮއާއޯ ޕެޑްރޯ ވަނީ ގޯލެއް ޖަހައި އެއްވަރުކޮށްދީފަ އެވެ. އޭގެ ފަހުން، ޖަރުމަނުގެ ފޯވާޑް، ނިކްލަސް ފުލްކްރޫގް ވަނީ ޗެލްސީއާ ކުރިން ހަވާލުވެރި، ގްރަހަމް ޕޮޓާ ކޯޗުކޮށްދޭ ވެސްޓް ހޭމަށް އަލުން ލީޑުނަގައިދީފަ އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު، ނިންމީ އޮފްސައިޑް ކަމަށެވެ.
ފުރަތަމަ ހާފު ނިމުމުގެ ކުރިން، ޗެލްސީން ވަނީ ދެ ގޯލު ޖަހައި، ނަތީޖާ އަނބުރާލައިފަ އެވެ. އެ ގޮތުން، ޖޮއާއޯ ޕެޑްރޯ ނަގައިދިން ބޯޅައަކުން ޕެޑްރޯ ނެޓޯ ގޯލެއް ޖަހައި، ލީޑުނަގައިދިންއިރު، ކޯލް ޕާމާގެ ބަދަލުގައި، ފުރަތަމަ އެގާރަ އަށް އެރުވި، 18 އަހަރުގެ ބްރެޒިލްގެ އެސްޓެވާއޯ ދިން ބޯޅައަކުން އެންޒޯ ފެނާންޑޭޒް ވަނީ ޗެލްސީގެ ތިން ވަނަ ލަނޑު ޖަހައިފަ އެވެ.
ޗެލްސީ އަށް ދެ ވަނަ ހާފުގައި ގިނަ ގޯލުތަކެއް ޖަހަން ފުރުސަތު ލިބުނެވެ. އެ ޓީމުން ދެ ވަނަ ހާފުގައި ޖެހި ދެ ގޯލު ވެސް ކާމިޔާބުކުރީ ކޯނަރުތަކުންނެވެ. އެ ގޮތުން، މި ދެ ގޯލުގައި ވެސް ވެސްޓް ހޭމްގެ ކީޕަރު، މެޑްސް ހާމަންސަން ވަނީ ގޯސް ހަދައިފަ އެވެ. އޭނާ ބޯޅައަށް އަރައި، ސަލާމަތްނުކުރެވިގެން ލިބުނު ފުރުސަތުތަކުގައި ޗެލްސީގެ ލަނޑުތައް ޖެހީ، މޮއިސަސް ކައެސޭޑޯ އާއި ޓްރެވާ ޗަލޯބާ އެވެ.
އާ ސީޒަނުގައި ވެސްޓް ހޭމުން ކުޅުނު ދެ މެޗުން ވެސް ވަނީ ބަލިވެފަ އެވެ.
