އެމްޑީޕީގެ ޕީޖީ ގްރޫޕުން 50 މެމްބަރުންގެ ތާއީދާއެކު މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރަން ހުށަހެޅި މައްސަލައަށް ރައީސް އިބްރާހިމް މުހައްމަދު ސޯލިހު ތާއީދު ކުރައްވާ ކަމަށް އެމަނިކުފާނުގެ ތަރުޖަމާނު މިއުވާން މުހައްމަދު މިއަދު ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނަޝީދުގެ މައްސަލައާ ގުޅޭގޮތުން ރައީސްގެ ވިސްނުންފުޅަކީ ކޮބާތޯ ނޫސްވެރިޔަކު ސުވާލުކުރުމުން މިއުވާން ވިދާޅުވީ، ވެރިކަންކުރާ އެމްޑީޕީގެ ޕީޖީގެ ނިންމުންތަކަކީ ރައީސްގެ މަޝްވަރާ އެކުލެވިގެން ނިންމޭ ނިންމުންތަކެއް ކަމަށެވެ.
"ޕާލިމެންޓަރީ ގްރޫޕުގެ މެޖޯރިޓީއާ އެއްކޮށް ރައީސް ވެސް ވަޑައިގަންނަވާނީ. ރައީސްއާ އެބޭފުޅުންނާ މަޝްވަރާވެސް ކުރެވޭ. ރައްޔިތުންގެ މަޖިލީހުގެ އެމްޑީޕީ ޕާލިމެންޓަރީ ގްރޫޕުގެ ހުރިހާ މެންބަރުންނާ ވެސް ރައީސާ މަޝްވަރާކުރެވޭ،" މިއުވާން ވިދާޅުވި އެވެ.
އެމްޑީޕީގެ ޕީޖީގައި ހިމެނޭ ހުރިހާ މެމްބަރުންގެ އިތުބާރު ވެސް ރައީސް ސޯލިހަށް އެބައޮތް ކަމަށާއި ކަންކަން ކުރިއަށް ގެންދަނީ މަޝްވަރާގެ މަގުން ކަމަށް ވެސް މިއުވާން ވަނީ މިއަދު ވިދާޅުވެފަ އެވެ.
ނަޝީދުގެ އިތުބާރު ނެތް ކަމުގެ މައްސަލަ 54 މެމްބަރުންގެ ސޮޔާއެކު ރައްޔިތުންގެ މަޖިލީހަށް ހުށަހެޅީ އިއްޔެ އެވެ. އެމްޑީޕީގެ 50 މެމްބަރުންނާއި ތުލުސްދޫ ދާއިރާގެ މެމްބަރު އިބްރާހިމް ނަސީމް, ނޮޅިވަރަމް ދާއިރާގެ މެމްބަރު މުހައްމަދު ނަޝީދު, ކާށިދޫ ދާއިރާގެ މެމްބަރު އަބްދުالله ޖާބިރާއި އެމްޑީއޭގެ ލީޑަރު އަދި ދ. މީދޫ ދާއިރާގެ މެމްބަރު އަހްމަދު ސިޔާމް މުހައްމަދެވެ.
އެމްޑީޕީގެ ޕީޖީ ގްރޫޕުން ބުނީ ނަޝީދުގެ އިތުބާރު ނެތްކަމުގެ މައްސަލަ ހުށަހެޅަން ނިންމިކަން އިއުލާނުކުރީ އިއްޔެ އެމްޑީޕީގެ ޕާލިމެންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގަ އެވެ. އެއީ އެމަނިކުފާނު ގާނޫނު އަސާސީ އާއި ގަވާއިދުތަކާ ހިލާފަށް މަޖިލިސް ހިންގަވާތީ ކަމަށް ބުނެ އެވެ.
ޖެނުއަރީ 28، ގައި ބޭއްވި އެމްޑީޕީގެ ރިޔާސީ ޕްރައިމަރީން ނަޝީދު ނާކާމިޔާބުވި ފަހުން އެމަނިކުފާނު ގެންދަވަނީ އެމްޑީޕީގެ އިސް ލީޑަރު އަދި ރައީސް އިބްރާހިމް މުހައްމަދު ސޯލިހުގެ ސަރުކާރާ ދެކޮޅަށް މަސައްކަތް ކުރައްވަމުންނެވެ.
އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް މައްސަލައިގެ ގަރާރުގައި މެދު ހެންވޭރު ދާއިރާގެ މެމްބަރު އަލީ އާޒިމް ސޮއިކުރެއްވުމުން، އެމްޑީޕީން ވަކިކުރަން އެ ޕާޓީގެ ފިޔަވަޅު އަޅާ ކޮމިޓިން ނިންމުމާއެކު، ނަޝީދަށް ތާއީދުކުރައްވާ މަޖިލިސް 12 މެމްބަރަކު އެމްޑީޕީން ވަކިވި އެވެ.
ނަޝީދަަށް ތާއީދުކުރާ މީހުން އަންނަނީ "ދަ ޑިމޮކްރެޓްސް" ގެ ނަމުގައި އާ ޕާޓީއެއް އުފެއްދުމަށް މަސައްކަތް ކުރަމުންނެވެ. އިލެކްޝަންސް ކޮމިޝަން (އީސީ) އަށް 3،564 މީހުންގެ ސޮއި ހިމެނޭ ފޯމުތައް ހުށަހަޅާފައިވާއިރު، މިހާރު ދަނީ އީސީން ފޯމުތަކުގެ ސައްހަކަން ބެލުމުގެ މަރުހަލާ އެވެ. 3،000 ސައްހަ ފޯމު އޮތް ކަން ޔަގީންކުރެވުމުން، ޕާޓީ އުފެއްދުމުގެ ހުއްދަ އެ ކޮމިޝަނުން ދޭނެ އެވެ.
