ބެއިޖިން، ޗައިނާ (ޖޫން 7) - އިނގިރޭސިވިލާތުގައި ސިއްރު ޕޮލިސް ސްޓޭޝަން ނުހިންގާ ކަމަށް ޗައިނާއިން ބުނެފި އެވެ.
ޗައިނާއިން އެގޮތަށް ބުނީ އެފަދަ ޕޮލިސް ސްޓޭޝަންތައް ބަންދުކުރަން އިނގިރޭސި ސަރުކާރުން އެންގުމާ ގުޅިގެންނެވެ.
އިނގިރޭސި ސެކިއުރިޓީ މިނިސްޓަރު ޓޮމް ޓުގެންޑްހަޓް އަންގާރަ ދުވަހު ވިދާޅުވީ ސިއްރު ޕޮލިސް ސްޓޭޝަންތައް ބަންދުކުރަން އެންގީ ޗައިނާ އެމްބަސީއަށް ކަމަށެވެ.
ސޭފްގާޑް ޑިފެންޑާޒް ގްރޫޕުން ނެރުނު ރިޕޯޓެއްގައި ބުނީ ޗައިނާގެ ސިއްރު ޕޮލިސް ސްޓޭޝަންތައް އިނގިރޭސިވިލާތުގައި ހިންގާ ކަމަށެވެ.
އެ ރިޕޯޓުގައި ބުނީ ޕޮލިސް ސްޓޭޝަންތަކުގެ ބޭނުމަކީ އިދާރީ ހިދުމަތްތައް ފޯރުކޮށްދިނުން ނަމަވެސް، އިނގިރޭސިވިލާތުގައި އުޅޭ ޗައިނާ މީހުން މޮނީޓާކޮށް، ބައެއް މީހުން އެނބުރި ޗައިނާއަށް ދިޔުން މަޖުބޫރު ކުރުން ފަދަ ކަންކަން ކުރާ ކަމަށެވެ.
ޗައިނާގެ ފޮރިން މިނިސްޓްރީން އެ ތުހުމަތު ދޮގުކޮށް ބުނީ ސިއްރު ޕޮލިސް ސްޓޭޝަންގެ ގޮތުގައި އެ ގައުމުން އެއްވެސް ތަނެއް ނުހިންގާ ކަމަށެވެ.
