ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އިރުޝާދާއެކު އުފައްދަވާ "ދަ ޑިމޮކްރެޓްސް" އަށް ސޮއިކޮށްފައިވާ މީހުންގެ ފޯމުތައް ލީކުކޮށްލާފައިވާ ކަމަށް އެ ޕާޓީ އުފެއްދެވުމުގައި އިސްކޮށް އުޅުއްވާ ބޭފުޅުން ކުރައްވާ ތުހުމަތުތައް އިލެކްޝަންސް ކޮމިޝަން (އީސީ) އިން ދޮގުކޮށްފި އެވެ.
ރައްޔިތުންގެ މަޖިލިހަށް ވެސް މި ކަން ބަލަން މައްސަލައެއް މިއަދު ހުށަހަޅާފައިވަނިކޮށް، އީސީން މިރޭ ނެރުނު ބަޔާނެއްގައި ވަނީ ފޯމުތައް ލީކުވުމަކީ ކޮމިޝަންގެ ތެރެއިން ހިނގި ކަމެއް ނޫން ކަމަށެވެ.
"މިފަދަ އެއްވެސް އަމަލެއް، މި ކޮމިޝަންގެ މެންބަރަކު އަދި މުވައްޒަފަކު ވެސް ހިންގާފައިނުވާ ކަމަށް އެންމެހާ ދިވެހި ރައްޔިތުންނަށް ދަންނަވަމެވެ." ޓްވިޓާ މެދުވެރިކޮށް އީސީން ނެރެފައިވާ ބަޔާނުގައިވެ އެވެ.
ޑިމޮކްރެޓްސްގެ މުއައްސިސް އަދި ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު މަޖިލިހަށް ހުށަހަޅާފައިވާ މައްސަލައެއްގައި ތުހުމަތުކޮށްފައިވާ ގޮތުގައި ޑިމޮކްރެޓްސްގެ ފޯމުތައް ލީކުވެ، ސަރުކާރުގެ އިސް ބޭފުޅުން އެ ފޯމުތައް ފުރި މީހުންނަށް ދަނީ ބިރު ދައްކަމުންނެވެ.
އެ ގޮތުން ފޯމު ފުރި މީހުންގެ ލިސްޓު ޗެކުކޮށް، އެއިން ސްޓޭންޑް ލޯނާއި، ގޯތި ނުވަތަ ފްލެޓަށް އެދިފައިވޭތޯ ބަލާފައި އެ މީހަކަށް ގުޅައި އެ ކަމެއް ހަމަޖައްސައިދޭނީ ޑިމޮކްރެޓްސްއަށް ކޮށްފައިވާ ސޮއި އަނބުރާ ގެންދިޔުމުން ކަމަށް އަންގަމުންދާ ކަމަށް ހަސަން ހުށަހެޅުއްވި މައްސަލާގައި ތުހުމަތު ކުރައްވާފައިވެ އެވެ.
ނަޝީދަށް ތާއީދުކުރާ ރައްޔިތުންގެ މަޖިލިހުގެ 13 މެންބަރަކާއި، ވަރަށް ގިނަ ކައުންސިލަރުންނާއި އާންމުން ހިމެނޭހެން އީސީއަށް މި މަހުގެ ފުރަތަމަ ދުވަހު ހުށަހަޅާފައިވަނީ 3،564 ފޯމެވެ.
ގާނޫނު ބުނާގޮތުން ސިޔާސީ ޕާޓީއެއް ރަޖިސްޓްރީ ކުރުމަށް ބޭނުންވާ އެންމެ މަދު އަދަދަކީ 3،000 މެންބަރުންނެވެ. އީސީން މެއި 24, ގައި ޑިމޮކްރެޓްސް އުފެއްދުމުގެ ހުއްދަ ދިނުމާއެކު އެ ޕާޓީން ވަނީ މާލެ ސަރަހައްދާއި ރާއްޖޭގެ އެކި ކަންކޮޅުތަކުގައި ޕާޓީއަށް ސޮއި ހޯދުމުގެ ހަރަކާތްތައް ހިންގާފަ އެވެ.
ނަޝީދު އަންގަވައިގެން އާ ސިޔާސީ ޕާޓީއެއް ހެދުމުގެ މަސައްކަތް ފެށީ، އެޓާނީ ޖެނެރަލް އިބްރާހިމް ރިފްއަތުގެ އިތުބާރު ނެތް ކަމަށް ވާދަވެރި ފަރާތްތަކުން ހުށަހަޅާފައިވާ މައްސަލާގައި ސޮއިކޮށްގެން މެދު ހެންވޭރު ދާއިރާގެ މެންބަރު އަލީ އާޒިމް އެމްޑީޕީން ވަކިކުރަން ފިޔަވަޅު އަޅާ ކޮމިޓީން ނިންމުމާއެކުގަ އެވެ.
ޖެނުއަރީ 28، ގައި އޮތް އެމްޑީޕީގެ ރިޔާސީ ޕްރައިމަރީން ނާކާމިޔާބުވުމަށްފަހު ނަޝީދު ގެންދެވީ އެމްޑީޕީގެ އެތެރޭގައި "ފިކުރެއްގެ ދިރުން" ނަމުގައި ވަކި ފެކްޝަނެއް އުފައްދައިގެނެވެ. އެއީ ރިޔާސީ ޕްރައިމަރީގެ ކެމްޕޭނަށް ވެސް ނަޝީދު ބޭނުންކުރެއްވި ޝިޔާރެވެ.
ނަޝީދަކީ 2008، 2013، އަދި 2018 ގައި ވެސް އެމްޑީޕީގެ ރިޔާސީ ޕްރައިމަރީން އިންތިހާބުކުރި އެ ޕާޓީގެ ރިޔާސީ ކެންޑިޑޭޓެވެ. ނަމަވެސް 2018 ގައި ނަޝީދު ޖަލު ހުކުމެއްގައި ހުންނެވުމުން ވާދަކުރެއްވުމުގެ ފުރުސަތު ބަންދުވެ، ރައީސް އިބްރާހިމް މުހައްމަދު ސޯލިހަށް ރިޔާސީ ޓިކެޓު ދިނުމަށް އެމްޑީޕީގެ ކޮންގްރެސް މެދުވެރިކޮށް ނިންމީ އެވެ. އެ ފަހުން، އެމްޑީޕީގެ އެތެރޭގެ މެޖޯރިޓީ ސޯލިހު ވަނީ ހޯއްދަވައިފަ އެވެ.
