ލަންޑަން (ޖޫން 6) - ޓޮޓެންހަމް ހޮޓްސްޕާސްގެ ކޯޗަކަށް ކުރިން ސެލްޓިކްގައި ހުރި އަންގޭ ޕޮސްޓެކޮގްލޫ ހަތަރު އަހަރުގެ ކޮންޓްރެކްޓެއްގެ ދަށުން ހަަމަޖައްސައިފި އެވެ.
ޓޮޓެންހަމް އިން 2019 ވަނަ އަހަރުގެ ޗެމްޕިއަންސް ލީގުގެ ފައިނަލުގައި ކުޅުނު ފަހުން، ޕޮސްޓެކޮގްލޫ އަކީ އެ ޓީމާ ފުލްޓައިމްކޮށް ހަވާލުވާނެ ހަތަރު ވަނަ ކޯޗެވެ. އެ ގޮތުން މިދިޔަ ހަތަރު އަހަރެއްހާ ދުވަހު ޓޮޓެންހަމްގެ ކޯޗުކަމާ ހަވާލުވި ޕޯޗުގީސް ދެ ކޯޗުން ކަމަށްވާ ނޫނޯ އެސްޕިރީޓޯ ސަންޓޯ އާއި ހޯސޭ މޮރީނިއޯ އަދި އިޓަލީގެ އެންޓޯނިއޯ ކޮންޓޭ އަށް ވެސް އެކަށީގެންވާ ވަގުތެއް ނުލިިބި ޖެހުނީ އެ ޓީމު ދޫކޮށްލާށެވެ.
މިދިޔަ މާޗް މަހު ކޮންޓޭ ވަކިކުރުމަށް ފަހު، ޓޮޓެންހަމް އިން ސީޒަންގެ ބާކީ ބައި ފުރިހަމަ ކުރީ ދެ ވަގުތީ ކޯޗުންނާ އެކު އެވެ. އެ ގޮތުން ފުރަތަމަ ހަވާލުވި، ކްރިސްޓިއަން ސްޓެލީނީ ވަކިކޮށް ދެން އެ ޓީމުގެ ކޯޗުގެ ޒިންމާ ހަވާލުކުރީ ރަޔާން މޭސަންއާ އެވެ.
އޮސްޓްރޭލިއާ އަށް އުފަން ކޯޗު، ޕޮސްޓެކޮގްލޫ ،57، ވަނީ މި ސީޒަންގައި ސެލްޓިކާ އެކު ތިން ތަށި ކާމިޔާބުކޮށްފަ އެވެ. ޕޮސްޓެކޮގްލޫ އަކީ ޕްރިމިއާ ލީގުގައި ކޯޗުކޮށްދޭން އޮސްޓްރޭލިއާ އަށް ނިސްބަތްވާ ފުރަތަމަ ކޯޗެވެ. އޭނާ ވަނީ ސެލްޓިކާ އެކު ހޭދަކުރި ދެ ސީޒަނުގައި ސްކޮޓްލެންޑް ފުޓްބޯޅައިގެ ހަ މުބާރާތުގެ ތެރެއިން ފަސް މުބާރާތް ކާމިޔާބުކޮށްފަ އެވެ.
"މި ކްލަބްގެ ވިސްނުމާއި ކަންކަމަށް ބަލާއިރު، މިހާރު މި އޮތް ހާލަތުން އެންމެ މުހިންމު ކަމަކީ ކުރިއަށް ދިއުމުގައި ބޮޑެތި ނިންމުންތައް ނިންމުން. ކާމިޔާބު ހޯދޭނެކަން އަންގޭ (ޕޮސްޓެކޮގްލޫ) ވަނީ ސާބިތުކޮށްދީފައި. އަހަރެމެންނަށް އެބައޮތް ފުރިހަމަ އިތުބާރު،" ޓޮޓެންހަމްގެ ޗެއާމަން ޑެނިއަލް ލެވީ ވިދާޅުވި އެވެ.
ޕޮސްޓެކޮގްލޫ އަށް ކުރިމަތިވާނެ އެންމެ ބޮޑު ޗެލެންޖަކީ އަންނަ ސީޒަނުގައި ޓޮޓެންހަމް އަށް ޔޫރަޕްގެ މުބާރާތެއްގެ ފުރުސަތު ނެތި އެ ޓީމުގައި ތިބި މަޝްހޫރު ކުޅުންތެރިން ކްލަބްގައި މަޑުކުރުވުމަށް ކުރަން ޖެހޭ މަސައްކަތް ކާމިޔާބު ކުރުމެވެ. އެ ގޮތުން ޓޮޓެންހަމްގެ ކެޕްޓަން، ހެރީ ކޭން އަކީ ރެއާލް މެޑްރިޑުން ކަރީމް ބެންޒެމާ ނެތްތަނަށް ގެންދަން ބޭނުންވާ ކުޅުންތެރިޔާ އެވެ.
