ރައްޔިތުންގެ މަޖިލީހުގެ ރައީސް ކަމުން އެމްޑީޕީގެ ރައީސް މުހައްމަދު ނަޝީދު ވަކިކުރަން އެޕާޓީގެ ޕާލަމެންޓްރީ ގްރޫޕުން މަޝްވަރާތައް ފަށައިފި އެވެ.
"އަދަދު" ނޫހަށް އެމްޑީޕީގެ ޕީޖީ ގްރޫޕުގެ ދެތިން މެމްބަރަކު ވަނީ މިފަދަ މަޝްވަރާތަކެއް ކުރިއަށްދާކަން ކަށަވަރުކޮށްދީފަ އެވެ.
"ޕްރެސް ކޮންފެރެންސެއް އޮންނާނެ 12:30 ގައިި, އޭގައި އަޅުގަނޑުމެން ނިންމާ ގޮތެއް އިއުލާން ކުރާނެ," މިކަމާ ގުޅިގެން "އަދަދު" ނޫހާ ވާހަކަ ދެއްކި އެ ޕާޓީގެ ޕީޖީ ގްރޫޕްގެ މެމްބަރަކު ވިދާޅުވި އެވެ.
ރާއްޖޭގެ ދެކުނުން އީއީޒެޑް ބައިނަލްއަގްވާމީ ކޯޓުން ކަނޑައެޅިއިރު، ދައުލަތަށް ގެއްލުންވާ ގޮތަށް އެ މައްސަލައިގައި ވަކާލާތުކޮށްފައިވާ ކަމަށް ބުނެ ހުށަހެޅި އޭޖީގެ އިތުބާރު ނެތްކަމުގެ މައްސަލަ ކުރިއަށް ނުގެންދިޔުމަށް ނަޝީދު ނިންމެވުމުން މިއަދުގެ ޖަލްސާގައި އެމްޑީޕީގެ މެމްބަރުން އިހުތިޖާޖު ވެސް ކުރި އެވެ.
މި މައްސަލާގައި އޭޖީ އެންމެ ފުރަތަމަ ޖަވާބުދާރީވެވަޑައިގެންނެވީ ލިޔުމުންނެވެ. އެހެން އޮއްވައި، ރިފްއަތު އިއްޔެ ހާޒިރުވެ ދިފާއުވެވަޑައިގަތުމަށް މަސައްކަތް ކުރެއްވުމުން މެމްބަރުން ވަނީ އިންތިހާއަށް ނިޒާމީ ނުކުތާ ނަގައި ވާހަކަ މެދުކަނޑާލައިފަ އެވެ. ރިޔާސަތުން މަޖިލީހުގެ ރައީސް މުހައްމަދު ނަޝީދު ވަރަށް ގިނަ ނިޒާމީ ނުކުތާއަށް ފުރުސަތު ދެއްވި އެވެ.
އެހެން އެކަން އޮއްވައި މިއަދުގެ ޖަލްސާ ފެށުމާއެކު ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު ވަނީ ރިފްއަތުގެ އިމްތިޔާޒުގެ މައްސަލައެއް ހުށަހަޅުއްވައިފަ އެވެ. އިމްތިޔާޒުގެ މައްސަލައަށް ބަހުސް ކުރަން ފާސްނުވި ނަމަވެސް އެ މައްސަލައިގައި ގޮތެއް ނުނިންމާ އިތުބާރު ނެތްކަމުގެ މައްސަލަ ކުރިއަށް ނުގެންދެވޭނެ ކަމަށް އިދިކޮޅުން ވަކާލާތު ކުރި އެވެ. ރިޔާސަތުން ނިންމެވީ އިތުބާރުގެ ނެތްކަމުގެ މައްސަލަ ބާއްވާފައި އެޖެންޑާގައި ދެން އޮތް މައްސަލައަށް ދިޔުމަށެވެ.
އޭގެ އިތުރުން ވެސް, މަޖިލީހަށް އިދކޮޅުން ހުށަހަޅާ ގަރާރުތަކާއި ކުއްލި މައްސަލަތައް އެޖެންޑާގެ ކުރިއަށް ޖައްސަައި ސަރުކާރުން ހުށަހަޅާ ބިލުތައް ލަސްކުރާ ކަމަށް ބުނެ އެމްޑީޕީގެ ނުރުހުން ނަޝީދަށް އޮތީ އަމާޒުވެފަ އެވެ.
އޭގެ އިތުރުން, އެމްޑީޕީން ވަކިވި މަޖިލިސް ނައިބު ރައީސް އީވާ އަބްދުالله ގެ އިތުބާރު ނެތް ކަމުގެ މައްސަލައެއް ވެސް އެމްޑީޕީން ވަނީ ވައްދާފަ އެވެ. ރިޔާސަތުން ނަޝީދު ދުރުކުރަން ޖެހޭ ފަދަ ހާލަތެއް ނެތް ކަމަށް ދާދި ފަހަކާ ޖެހެން ދެން ވެސް އެމްޑީޕީން ދިޔައީ ބުނަމުންނެވެ.
އެކަމަކު, އެމަނިކުފާނު އިސްވެ ހުންނަވައި އާ ސިޔާސީ ޕާޓީއެއް އުފެއްދުމުގެ މަސައްކަތް ކުރަމުންދާތީ އެ މަގާމުން އެމަނިކުފާނު ދުރުކުރުމަށް އެމްޑީޕީގެ ބައެއް މެމްބަރުން ދިޔައީ ގޮވާލަމުންނެވެ. މިއަދާ ހަމައަށް ވެސް ނަޝީދު ހުންނެވީ އެމްޑީޕީގެ ރައީސްގެ މަގާމުގައި އެ ޕާޓީގެ މެމްބަރެއްގެ ގޮތުގަ އެވެ. އާ ޕާޓީއާ ގުޅިވަޑައިގަތުމާ ގުޅޭގޮތުން މިހާތަނަށް އެއްވެސް ވާހަކަފުޅެއް އެމަނިކުފާނު ދައްކަވާފައި ނުވެ އެވެ.
