ވޮޝިންޓަން، އެމެރިކާ (ޖޫން 5) - ސައުދީ އަރަބިއްޔާ އާއި އިޒްރޭލުން ގުޅުން ގާއިމްކުރުމަކީ އެމެރިކާއަށް މުހިއްމު ފިޔަވަޅެއް ކަމަށް ވިދާޅުވެ، އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން އެކަމަށް ބާރު އަޅުއްވައިފި އެވެ.
އިޒްރޭލްގެ ހައްގުތަކަށް ލޮބީ ކުރާ ބާރުގަދަ ގްރޫޕަަކާ އެކު ބޭއްވި ބައްދަލުވުމުގައި ބްލިންކެން އިތުރަށް ވިދާޅުވީ އިރާނަށް ނިޔުކްލިއާ ހަތިޔާރު ހޯދުމުގެ ފުރުސަތު އެމެރިކާއިން ދުވަހަކު ވެސް ނުދޭނެ ކަމަށާއި އެކަން ހުއްޓުވާނެ ކަމަށެވެ.
"އިޒްރޭލާއި ސައުދީ އަރަބިއްޔާއިން ގުޅުން ގާއިމްކުރަން ބާރު އެޅުމަކީ އެމެރިކާގެ ގައުމީ ސަލާމަތީ މަސްލަހަތާ ވަރަށް ބޮޑަށް ގުޅިފައި އޮތް ކަމެއް،" އެމެރިކަން އިޒްރޭލް ޕަބްލިކް އެފެއާޒް ކޮމިޓީގެ މެމްބަރުންނާ އެކު ބޭއްވި ބައްދަލުވުމުގައި ބްލިންކެން ވިދާޅުވި އެވެ.
ބްލިންކެން އެގޮތަށް ވިދާޅުވި އިރު، އަންގާރަ ދުވަހު ސައުދީއަށް ވަޑައިގަންނަވަން ވެސް ހަމަޖެހިފައިވެ އެވެ. އިޒްރޭލާއި އަރަބި ގައުމުތަކާ ދެމެދު ގުޅުން ގާއިމްކުރަން ހެދި އަބްރަހަމް އެކޯޑްސް ދަހަމައްޓައި ކުރިއަރުވަން އެމެރިކާގެ ސަރުކާރުން ބޭނުންވެ އެވެ.
އެހެން ނަމަވެސް މިހާތަނަށް ސައުދީ އަރަބިއްޔާއިން ބުނެފައި ވަނީ އިޒްރޭލާ އެކު ގުޅުން ގާއިމްނުކުރާނެ ކަމަށެވެ. އެކަމަކު އިޒްރޭލްގެ ކޮމާޝަލް ފްލައިޓުތަކަށް ސައުދީ ވައިގެ ސަރަހައްދު ހުޅުވާލަން އެއްބަސްވެ، ތަފާތު މަޝްވަރާތައް ބާއްވާފައިވެ އެވެ.
