އާދައިގެ މަތިން ރައްޔިތުންގެ މަޖިލީހުގެ ޖަލްސާގެ ރިޔާސަތު ބަލަހައްޓަވަން، މަޖިލީހުގައި މިހާރު ހުންނެވި އުމުރުން އެންމެ ދުވަސްވީ މެމްބަރުގެ ހައިސިއްޔަތުން ވިލުފުށި ދާއިރާގެ މެމްބަރު ހަސަން އަފީފާ ހަވާލުުކުރުމާ އެކު މިއަދުގެ ޖަލްސާގެ ނިޒާމު ގެއްލި، ޖަލްސާ ހުއްޓާލައިފި އެވެ.
ނަވާރަ ވަނަ ރައްޔިތުންގެ މަޖިލިސް ފެށި ފަހުން އެ މަޖިލީހުގެ ރައީސް މުހައްމަދު ނަޝީދުގެ އާދައަކީ މެންދުރުގެ ހުސްވަގުތުކޮޅަށް ޖަލްސާ މެދުކަނޑައިލުމަށްފަހު ޖަލްސާއަށް އަލުން ވަޑައިނުގެންނެވުމެވެ. މެންދުރު ފަހުގެ ދަންފަޅީގައި މަޖިލީހުގެ ރިޔާސަތު ބަލަހައްޓަވަނީ ނައިބު ރައީސް އީވާ އަބްދުﷲ ނުވަތަ ވިލުފުށި ދާއިރާގެ މެމްބަރު ހަސަން އަފީފެވެ. މިއަދުގެ ޖަލްސާގެ ވެސް މެންދުރުފަހުގެ ދަންފަޅީގައި ރިޔާސަތު ބަލަހައްޓަވަން ޖެހިވަޑައިގެންނެވީ އަފީފަށެވެ.
ރިޔާސަތުގައި އަފީފު އިންނަވައިގެން ޖަލްސާގެ މެންދުރުފަހުގެ ދަންފަޅި ފެށި އިރު މަޖިލީހުގައި ބަހުސްކުރަމުން ގެންދައީ އެޓާނީ ޖެނެރަލް އިބްރާހީމް ރިފްއަތުގެ އިތުބާރު ނެތް ކަމަށް ކަނޑައަޅަން އިދިކޮޅުން ހުށަހަޅާފައި އޮތް މައްސަލައިގެ ބަހުސެވެ. ޖަލްސާގެ ނިޒާމު ގެއްލުނީ އެ މައްސަލާގައި ޖަވާބުދާރީ ވެވަޑައިގަންނަވަން ތަޅުމަށް ވަޑައިގެން އިންނެވި އެޓާނީ ޖެނެރަލް އިބްރާހީމް ރިފްއަތަށް ނިސްބަތްކޮށް، އިދިކޮޅު މެމްބަރުން އެކިއެކި ތުހުމަތުތައް ކުރައްވައި އަޑުގަދަ ކުރައްވަން ފެއްޓެވުމުންނެވެ.
"އިއްޒަތްތެރި ރައީސް މިސުވާލުކޮށް އަދި ބަހުސްކުރާކަށް އަޅުގަނޑަކަށް މިތާގެ މާހައުލު ތަނެއް ނުދޭ،" އޭރު ވާހަކަ ދައްކަވަމުން ގެންދެވި ފެލިދޫ ދާއިރާގެ ޕީއެންސީ މެމްބަރު އިބްރާހީމް ފަަޒުލު ރަޝީދު ވިދާޅުވި އެވެ.
އެހެން ނަމަވެސް އޭރު ރިޔާސަތުގެ މޭޒުގެ ކައިރިއަށް އެއްވެ ތިއްބެވި އިދިކޮޅު މެމްމަބަރުންގެ އަމަލުތައް ވެސް އޭނާ ދިފާއުކުރެއްވި އެވެ. އޭނާ ވިދާޅުވީ އަޑުގަދަކުރައްވަނީ ސުވާލުތަކަށް އޭޖީ ޖަވާބު ނުދެއްވާތީ ކަމަށެވެ.
"އިއްޒަތްތެރި މެމްބަރުން، އެޓާނީ ޖެނެރަލަށް ފުރުސަތު ދެއްވީމާ އެއަށް ޖަވާބު ދެއްވާނެ ކަމަށް އަޅުގަނޑު [މިބަލަނީ]،" ފަޒުލްއާއި އެހެން މެމްބަރުންގެ ވާހަކަތަކަށް ރައްދު ދެއްވަމުން އަފީފު ވިދާޅުވި އެވެ.
އެހެން ނަމަވެސް މެމްބަރުން ހަމައަކަށް ނޭޅުމުން ޖަލްސާ ނިމިއްޖެ ކަމަށް އަފީފު އިއުލާނުކުރެއްވި އެވެ. އެހެންކަމުން މިއަދު ވެސް މަޖިލީހުގެ ޖަލްސާ ނިންމާލަންޖެހުނީ ބަންޑާރަ ނައިބުގެ އިތުބާރު ނެތް ކަމަށް ހުށަހަޅާފައިވާ މައްސަލައިގެ ވޯޓަށް ނާހަ އެވެ.
