އެޓާނީ ޖެނެރަލް އިބްރާހީމް ރިފްއަތުގެ އިތުބާރު ނެތް ކަމަށް ކަނޑައަޅަން ރައްޔިތުންގެ މަޖިިލީހަށް ހުށަހެޅި މައްސަލާގައި މަޖިލީހަށް ޖަވާބުދާރީ ވެވަޑައިގަންނަވަން ހާޒިރުވުމުގެ ބަދަލުގައި ފުރަތަމަ ލިޔުމުން ޖަވާބު ދެއްވުމަށް ފަހު މިއަދު ވަޑައިގެންނެވުމުން އިދިކޮޅު މެމްބަރުންގެ ޝަކުވާ ބޮޑުވެއްޖެ އެވެ.
ރިފްއަތުގެ އިތުބާރުގެ މައްސަލަ އިދިކޮޅުން މަޖިލީހަށް ހުށަހެޅީ ޗާގޯސް ޖަޒީރާތަކަކީ މޮރިޝަސްގެ ބައެއް ކަމަށް ބަލައިގެން ރާއްޖެއާ އެ ޖަޒީރާތަކާ ދެމެދު ކަނޑުގެ އިން ކަނޑައެޅުމުގައި ރާއްޖޭގެ ކަނޑުގެ ސަރަހައްދެއް ގެއްލޭ ގޮތަށް އަމަލުކުރެއްވި ކަމަށް ކުރާ ތުހުމަތަކާ ގުޅުވައިގެންނެވެ.
މަޖިލީހުގައި މިދިޔަ ބުދަ ދުވަހު ބޭއްވި ޖަލްސާއަށް އެ މައްސަަލަ އެޖެންޑާކުރި އިރު ޖަވާބުދާރީ ވެވަޑައިގަންނަވަން ވަޑަައިގެންނެވުމުގެ ބަދަލުގައި ރިފްއަތު ޖަވާބު ފޮނުއްވީ ލިޔުމަކުންނެވެ. އެއީ ބޮޑު މައްސަލައަކަށްވެ، އިތުބާރުގެ މައްސަލަ އެ ދުވަހު ކުރިއަކަށް ނުގެންދެ އެވެ.
އެހެން ނަމަވެސް މިއަދުގެ ޖަލްސާއަށް މައްސަލަ އެޖެންޑާ ކުރުމުން ރިފްއަތު މިއަދު މަޖިލީހަށް ވަޑައިގެންނެވި އެވެ. އެއީ ކީއްވެކަން އޭނާގެ އަރިހުން ސާފުކުރައްވަން މިއަދުގެ ޖަލްސާގައި ފުރަތަމަ އެދިވަޑައިގެންނެވީ މައްސަލަ ހުށަހެޅުއްވި، މަޑުއްވަރީ ދާއިރާގެ އިދިކޮޅު ޕީއެންސީ މެމްބަރު އާދަމް ޝަރީފެވެ.
"އިއްޒަތްތެރި ރައީސް އަޅުގަނޑު މި މައްސަަލަ ހުށަހަޅަން ބޭނުން އެހެން ނަމަވެސް ، މި ދިމާވީ ކިހިނެތްތޯ، ކުރީ ދުވަހު ވަޑައިނުގަންނަވާފައި ލިއުމުން ޖަވާބުފޮނުވީމާ އިއްޒަތްތެރި ރިޔާސަތުން ނިންމެވީ ސުޕްރީމްކޯޓުގެ އިޝްތިޝާރީ ލަވައެއް ހޯދަން،" އޭނާ ވިދާޅުވި އެވެ.
އެހެން ވިދާޅުވެ، އިތުބާރުގެ މައްސަލަ ހުށަހަަޅުއްވަން އޭނާ ދެކޮޅު ވެސް ހެއްދެވި އެވެ.
އާދަމް ޝަރީފަށް ޖަވާބު ދެއްވަމުން ރިޔާސަތުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ ރިފްއަތު ލިއުމުން ޖަވާބު ދެއްވުމުން މަޖިލީހުގައި އެކަމާ ބަހުސް ކުރިކަން އެނގިވަޑައިގެން، އޭނާ މިއަދު ވަޑައިގެން އިންނެވީމާ އެކަމުގައި މިހާރު މައްސަލައެއް ނެތް ކަމަށެވެ. އެހެންވީމާ އިތުބާރު ނެތްކަމުގެ މައްސަލަ ހުށަހަޅުއްވަން އާދަމް ޝަރީފަށް އެމަނިކުފާނު އިރުޝާދު ދެއްވި އެވެ.
އެހެން ނަމަވެސް އާދަމް ޝަރީފު އަނެއްކާ ވެސް ތަކުރާރުކުރެއްވީ ރިފްއަތު މިއަދު ވަޑައިގެންނެވި ސަބަބު އޮޅުންފިލުއްވުމުގެ ސުވާލެވެ.
"އިއްޒަތްރި މެމްބަރުގެ ތިޔަ ވިދާޅުވާ ކަންބޮޑުވުން ނުވަތަ ސާފުކުރަން ތިޔަ އެދިވަޑައިގަންނަވާ ނުކުތާ އަޅުގަނޑަށް ފެންނަ ފެނުމުގައި ވަނީ ސާފުވެފައި. އެއީ ބަންޑާރަ ނައިބު [ވަޑައިގެން] އެ އިންނެވީ. އެހެންވީމާ އެކަން އެއޮތީ ވަރަށް ބޮޑަށް ސާފުވެފައި،" ދެ ވަނަ ފަހަަރަށް އާދަމް ޝަރީފަށް ޖަވާބުދެއްވަމުން ނަޝީދު ވިދާޅުވި އެވެ.
އޭގެ ފަހުން އެހެން އެތައް މެމްބަރަކު ވެސް ނިޒާމާ ބެހޭ މައްސަލައެއް ކަމަށް ވިދާޅުވެ ފުރުސަތު ހޯއްދަވައިގެން ކުރެއްވީ އޭޖީ ކުރީ ދުވަހު ވަޑައިގެނުގެންފައި މިއަދު ވަޑައިގެންނެވި ސަބަބު ސާފުނުވާ ކަމުގެ ޝަކުވާ އެވެ. ޖަލްސާގެ ހުސްވަގުތުކޮޅާ ހަމައަށް ދެމިގެން ދިޔައީ އެ ޝަކުވާ އެވެ.
